<Мәсәлә 26

[1] Чаwа бәрф ль һавине у баран ль нандьруне, ӧса жи qәдьр ль ахмах нак'әвә.

[2] Чаwа кӧ ч'ьвик дьвьр'вьр'ә у дувмәqәск дьфьр'ә, ӧса жи ньфьр'а бадиһәwа найе сери.

[3] Qамчи бона һәспа йә, qәйд бона к'әра йә, ле зохал бона навмьла ахмаха йә.

[4] Ль ахмах ль гора ахмахтийа wи вәнәгәр'инә, кӧ нәбә бьби йәки мина wи.

[5] Ль ахмах ль гора ахмахтийа wи вәгәр'инә, wәки әw хwә дәwса зана данәйнә.

[6] Йе бь дәсте ахмах хәбәре дьшинә, әw ньге хwә дьбьр'ә у зьраре дьк'ьшинә.

[7] Мәсәла дәве ахмаха, мина ләрьзәка ньге сәqәта.

[8] Йе qәдьр ахмахр'а дькә, мина чаwа кәвьрәк кәwканийеда бьwалә.

[9] Мәсәла дәве ахмаха, чаwа ч'ьqьле стьрийайи дәсте сәрхwәша.

[10] К'ьрекьре ахмаха у р'еwийа, әw зьраре дьда һ'әмуйа.

[11] Ахмахе кӧ ахмахтийа хwә дьwәк'ьлинә, әw мина чаwа сә кӧ вәдьгәр'ә ль сәр вәр'әшандьна хwә.

[12] Тә әw мәрьве кӧ хwә аqьл дьбинә дитийә? Жь йе ахмах һе гӧман һәйә, нә кӧ жь wи.

[13] Хwәр'анәдити дьбежә: «Шер ль сәр р'е йә! Шер ль мәйдане йә!»

[14] Чаwа дәри ль сәр дәргьра хwә дьчә-те, ӧса жи хwәр'анәдити ль сәр ньвина хwә.

[15] Хwәр'анәдити дәсте хwә дькә т'аса хwә, ле жер'а зә'мәт ә кӧ әw бьбә дәве хwә.

[16] Хwәр'анәдити һе хwә сәрwахт дьбинә нә кӧ һ'әфт меред кӧ щабед аqьл дьдьн.

[17] Р'еwийе кӧ т'әви шәр'-дә'wе хәлqе дьбә, мина чаwа йәк дәст бавежә гӧһе сәки.

[18] Дини-һаре кӧ пьриске агьр у тире кӧштьне давежә,

[19] мина wи йә, йе кӧ йәки дьхапинә у паше дьбежә: «Мьн һ'әнәк кьр».

[20] Сәр агьр кӧ дар т'ӧнәбьн, агьре весә, ӧса жи гава бӧхданбеж т'ӧнәбьн шәр'е бьтәмьрә.

[21] Чаwа к'омьр бона пьриска у дар бона агьр ә, ӧса жи йе шәр'уд бона шәр'-т'әвр'акьрьне йә.

[22] Готьнед бӧхданбеж мина тә'мә-тиска нә у әw һ'әта к'ураийа навдьл дьчьн.

[23] Левед алавийә т'әви дьле хьраб мина чаwа дәрдана ахинә пе т'орта зив кьраскьри.

[24] Нәйар бь заре хwә һ'ьләк'арийе дькә, дьле хwәда жи мьхәнәтийе хwәй дькә,

[25] һәгәр әw заре хwәш жи хәбәр дә, баwәр нәкә, чьмки һ'әфт һ'әрами дьлада һәнә.

[26] Әw к'ина хwә кӧ бь мьхәнәтийе вәшерә, йәкә щьватеда хьрабийа wи wе дәре.

[27] Йе ч'ә'ле дьк'олә әw хwәха дьк'әве у йе кәвьр һол дькә, әw ль сәр wида те.

[28] Зьмане дәрәw дьжәнә дәрбдайе хwә у дәве һ'ьләк'ар мерьв сәр-сери тинә.