Мәсәлә 1
[1] Әв ьн мәсәлед Сьлеман п'адше Исраелейи кӧр'е Даwьд.
[2] Бона кӧ сәрwахтийе у ширәта бьзаньбьн, готьнед билана фә'м бькьн,
[3] ширәтед сәрwахтийе, р'астийе, qьраре у һәqийе qәбул кьн,
[4] кӧ фьрасәте бьдьнә дьлсаха, занәбуне у аqьл бьдьнә щаһьла,
[5] wәки йе сәрwахт бьбьһе һе занәбуна хwә зедә кә у йе билан һе р'е-дьрба жь һәв дәрхә,
[6] кӧ мәсәла у мә'на тедәрхьстьнока, к'ельмед занәйа у фькьред wан фә'м бькә.
[7] Сәре сәрwахтийе хофа Хӧдан ә, т'әне йе беһ'ьш qәдьре биланийе у ширәте ньзанә.
[8] Лаwе мьн, ширәта баве хwә qәбул кә у һинкьрьна дийа хwә п'епәс нәкә.
[9] Чьмки әwе чаwа к'офийа р'әwш-к'әрәме ль сәре тә бьн у мори-мьрщан стуйе тәда.
[10] Лаwе мьн! Гава йед гӧнәк'ар бьхwазьн тә жь р'е дәрхьн, тӧ гӧһ нәдә wан.
[11] Һәгәр бежьн: «Т'әви мә wәрә әм бона кӧштьне тә'лдә чекьн, щийе бесәбәб хwә ль мәрьве бесущ бьтәлиньн,
[12] мина дийаре мьрийа әм сахә-сах wан һ'уфи хwә кьн, мина гор'ьстен кӧ чаwа мьрийа дадьqӧртинә.
[13] Һәр щур'ә хер-хьзнә әм хwәр'а бьбьн у мале хwә бь т'аленва т'ьжи кьн,
[14] wәрә тӧ жи п'әшка хwә бавежә нава мә, к'иське мә һ'әмуйа бьбә йәк».
[15] Лаwе мьн! Т'әви wан wе р'ейеда нәчә, ньгед хwә жь шьвәр'ийед wан пашда бьгьрә.
[16] Чьмки ньгед wан бәр бь хьрабийе дьбәзьн у хунр'етьнер'а дьләзиньн.
[17] Ле бәле бадиһәwа т'ор' те авитьне ль бәр ч'ә'ве тәйрәда,
[18] ле әвана дьбьнә байисе хуна хwә, бона кӧштьна хwә хwә дьтәлиньн.
[19] Әв ә р'ийа wан мәрьвед кӧ ч'ә'ве wан һәбука хәлqе йә, әв йәк дьбә р'ӧһ'ьстине wан.
[20] Сәрwахти к'учада дькә гази, мәйданада дәнге хwә бьльнд дькә.
[21] Әw щийе qалмә-qалма щьвата мьхӧлqәтада дькә дәнги, ль бәр дәргәһе бажер готьна хwә дьбежә:
[22] «Гәли беһ'ьша, һ'әта к'әнге һуне беһ'ьшийе һ'ьз бькьн? Һ'әта к'әнге qәрфе ль qәрфкьра хwәш бе? У ахмахе бьжәньнә заньстийе?
[23] Бәре хwә бьдьнә ширәтед мьн, әзе р'ӧһ'е хwә ль сәр wәда бьр'ежьм, готьнед хwә ль wә бьдьмә фә'мкьрьне.
[24] Әз гази wә дькьм һун набьһен, дәсте хwә дьрежи wә дькьм кәсәки гӧһдар т'ӧнә,
[25] ле ширәтед мьн давежьнә пьшт гӧһе хwә у һьлатьна мьн qәбул накьн.
[26] Әзе жи ль сәр к'әтьна wә бьк'әньм, дьле хwә ль wә ша кьм, гава тьрс-хоф ль сәр wәда бе,
[27] чахе зарин у тәнгаси бе сәре wә, гава тьрс-хоф мина тә'вийа тәйроке wә бинфьшки кә у чаwа фьртонә ль сәр wәда бьгьрә.
[28] Һьнге wе гази мьн кьн ле әзе щабе нәдьм, әwе дәмана мьнда бьн, ле мьн нәбиньн.
[29] Чьмки вана жәнандә заньстийе у хофа Хӧдан хwәр'а нәбьжартьн,
[30] ширәтед мьн qәбул нәкьрьн, qәрфе хwә һ'әму һьлатьнед мьн кьрьн.
[31] Ләма жи әw гәрәке бәре ә'мәлед хwә бьхwьн у пе шеwьред хwә т'ер бьбьн.
[32] Чьмки жь р'ек'әтьна беһ'ьша wан дькӧжә у бехәмийа ахмаха wан ӧнда дькә.
[33] Ле йе гӧһ дьдә мьн wе сах-сьламәт бьжи у жь саwа хьрабийе т'әвһәв нәбә».