<Мәсәлә 16

[1] Т'ьвдиред дьле мерьвда йе wи нә, ле щабдарийа зьмен жь Хӧдан ә.

[2] Һ'әму р'ийе мерьв ль бәр ч'ә'ве wи паqьж ьн, ле Хӧдан р'ӧһ'а дьдә ль сәр мезине.

[3] Шьхӧле хwә бьдә дәсте Хӧдан у те бьгьһижи нет-мәрәме хwә.

[4] Һәр тьшт Хӧдан бь мәрәм кьрийә, нәп'ак жи бона р'ожа охьрме гьран.

[5] Хӧдан жь һ'әму к'ӧбар-бабаха зьвер ә у әw т'ӧ щар бе бәла наминьн.

[6] Бь дьлшәwатийе у амьнийе гӧнә тенә к'әwандьне у хофа Хӧдан мерьв жь хьрабийе дур дьхә.

[7] Гава Хӧдан р'ийа йәки бәгәм дькә, һ'әта дьжмьне wи жи т'әви wи ль һәв тинә.

[8] Qәнщә һьндьк бь р'астийе, нә кӧ мале п'ьр' бь нәһәqийе.

[9] Дьле мерьв р'ийа дьдә ль бәр хwә, ле Хӧдан гаве wи р'аст дькә.

[10] Һ'ӧкӧме Хwәде ль сәр дәве п'адше йә у дәве wи диwанеда шаш набә.

[11] Т'әрәзи у мезин р'аст йе Хӧдан ьн, кәвьред мезинейә т'орпәда кьред Wи нә.

[12] П'адша жь хьрабикьрьне зьвер ьн, чьмки т'әхтед wан бь р'астийева qәдим ьн.

[13] П'адша ль йе заре бехельф хwәш ьн, әwана йе р'аст хәбәр дьдә һ'ьз дькьн.

[14] Һерса п'адше мина р'ӧһ'ьстин ә, ле мәрьве сәрwахт wе дьсәqьр'инә.

[15] Р'онайа р'уйе п'адше жийин ә у херхwәзийа wи мина ә'wре баранейи бьһаре.

[16] Сәрwахти стандьн жь зер' һежатьр ә у биланти дәстанин жь зив четьр ә.

[17] Р'ийа р'астайә сәрәкә жь хьрабийе дурк'әтьн ә, к'и мьqати р'ийа хwә дьбә, әw ә'мьре хwә хwәй дькә.

[18] Бәри wеранбуне к'ӧбари те у бәри к'әтьне р'ӧһ'е бабахийе.

[19] Һе qәнщ ә т'әви бәләнгаза шкәсти бьн, нә кӧ т'әви к'ӧбара т'алан п'арәвәкьн.

[20] К'и шьхӧле хwә бь сәрwахтийе дькә к'аре дьк'әвә у йе кӧ хwә дьсперә Хӧдан хwәзьли йә.

[21] Мәрьве дьлда сәрwахт аqьл һ'әсаб дьбә у йе заре ширьн заньстийе зедә дькә.

[22] Һ'ьш, бона хwәйиһ'ьша канийа жийине йә, ле бона беһ'ьша ширәт ахмахти йә.

[23] Мәрьве дьлда сәрwахт сәрwахтийе дьдә зьмен у занәбуне ль заре wи зедә дькә.

[24] Хwәшхәбәрдан мина һьнгьве т'ор'һелуне йә, ль р'ӧһ' хwәшә у ль һәстуйа дәрман ә.

[25] Р'е һәйә кӧ мерьвр'а р'аст хӧйа дькә, ле хьлазийа wе р'ийа мьрьне йә.

[26] Мәрьвед хәбатк'ар бона хwә дьхәбьтә, чьмки дәве wи п'ейи сәр wи дькә.

[27] Мәрьве нәһәq хьрабийе дьгәр'ә у заре wи алава агьр ә.

[28] Мәрьве мьхәнәт шер' т'әвр'адькә у бӧхданбеж пьсмама жь һәв дур дьхә.

[29] Мәрьве зорбә һәвале хwә дьхапинә у дьбә дькә р'ийа хьрабийе.

[30] Йе кӧ ч'ә'ве хwә дьгьрә бона фькьра хьраб у лева хwә дьгәзә, хьрабийе дькә.

[31] Р'у-гӧлийе сьпи к'офийа р'умәте йә, кӧ әw нава р'ийа р'астийеда йә.

[32] Мәрьве хwәйисәбьр жь мерхас четьр ә у йе хwәгьрти жь йе бажар-һьлдайи.

[33] П'әшкавитьн жь т'әхт у бәхт ә, ле һәр qьраре Хӧдан дьдә.