<Мәсәлә 23

[1] Гава тӧ т'әви ахаки р'унийи нан бьхwи, р'ьнд дина хwә бьдә пешийа хwә.

[2] Һәгәр тӧ хwәйе запа мәзьн и к'ере бьдә ль сәр qьр'ька хwә.

[3] Бьра тәме тә нәк'ьшинә тә'мә-тискед wи, чьмки әw хӧрәкед хапанок ьн.

[4] Нәк'әвә дәмана дәwләтибуне, жь wе фькьра хwә пашда бьсәкьнә.

[5] Ч'ә'ве тәйе ль сәр wи тьште п'уч' бә, ле әwе хwәр'а баска чекә у мина тәйра бьфьр'ә ә'змен.

[6] Нане мәрьве нәмәр'д нәхwә у тәме тә нәк'ьшинә хwарьна wи,

[7] чьмки ч'ә'ве wийе хwарьна тә бә, wе тәр'а бежә: «Бьхwә-вәхwә», ле дьле wи нә т'әви тә йә.

[8] Әw парийе кӧ тә хwарьбә те вәр'әши у готьнед хwәйә хwәш те ӧнда ки.

[9] Гӧһе ахмахда тьштәки нәбежә, чьмки әwе заньстийа готьна тә беһӧрмәт кә.

[10] Синоре кәвьн щигӧһасти нәкә у нәк'әвә ә'рде жьнәбийа,

[11] чьмки пьсмаме wани незик зор ә, әwе ише wан т'әви тә сафи кә.

[12] Дьле тә ль сәр ширәта бә, гӧһе тә жи ль сәр готьнед сәрwахт бә.

[13] Ширәткьрьнеда бехатьрийа зар'а бькә, пе шьве жи һәгәр бьк'ӧти, әw намьрә.

[14] Ле һәгәр тӧ пе шьве жи wи дьк'ӧти, нәфса wи тӧ жь дийаре мьрийа хьлаз дьки.

[15] Кӧр'е мьн! Һәгәр дьле тә сәрwахт ә, дьле мьн жи ша дьбә.

[16] Гава жь дәве тә готьнед р'аст дәрен, әзе жи ль нава хwәда ша бьбьм.

[17] Бьра дьле тә һ'әвсудийа гӧнәк'ар нәкә, ле һәр р'ож хофа Хӧданда бә.

[18] Чьмки ә'сәйи ахьри һәйә у гӧмана тәйе ӧнда нәбә.

[19] Бьбьһе, кӧр'е мьн у сәрwахт бә, дьле хwә бәр бь р'ийа р'астда кә.

[20] Нәчә нава вәхwарийа, нә жи нава п'ьр'хӧред гошт.

[21] Чьмки йе вәхwари у п'ьр'хӧри бәләнгаз дьбьн у к'ьнщед п'оньжийа дьп'ьзьньн.

[22] Гӧр'а баве хwә бькә, кӧ тӧ же к'әтийи у дийа хwә беһӧрмәт нәкә, гава пир бьбә.

[23] Һәqийе бьк'ьр'ә, сәрwахтийе, ширәта, билантийе жи нәфьрошә.

[24] Баве йе р'аст әшq у ша йә, йе сәрwахт пәй хwә дьхә пе wи ша дьбьн.

[25] Бьра де баве тә пе тә әшq бьн, бьра ша бә йа кӧ тӧ же к'әти.

[26] Дьле хwә бьдә мьн, кӧр'е мьн! у ч'ә'ве тә бьра сәр р'ийа мьн бьн.

[27] Чьмки йа qав ч'ә'ла к'ур ә, жьна ч'ә'вдәр бира тәнг ә.

[28] Әwа мина qачахәки хwә дьтәлинә, нава мәрьвада беамьна зедә дькә.

[29] Ахин йа к'е йә? Wахин йа к'е йә? Шәр'-дә'w йе к'е нә? Хәм у хьйал йе к'е нә? Бьринед бесәбәб йе к'е нә? Ч'ә'вед сорбуйи йе к'е нә?

[30] Әw йе ль бәр шәраве нә, йед кӧ шәрава т'әвһәвкьри дьгәр'ьн.

[31] Р'әнге шәравейи сор нәньһер'ә, чаwа әw к'аседа бь ч'ә'ва дькә у р'ийа хwәда хwәш-хwәш дьчә!

[32] Әw мина мә'ра паше дьгәзә у мина тирәмә'р әw ле дьдә.

[33] Һьнге qәрәт'уйе бенә ль бәр ч'ә'вед тә у дьле тә жи wе тьштед бет'әwшә бежә.

[34] Те бьби мина йәки бә'реда п'алдайи у чаwа йәки ль сәр сәре бап'еша гәмийе р'азайи.

[35] Те бежи: «Мьн хьстьнә, әз нә ешийамә, әз дамә ль бәр дә'фа, мьн хwә дәрнәхьстийә. Әз к'әнге сәр һ'ьше хwәда бьм, wәки диса wе йәке бькьм?»