<Мәсәлә 6

[1] Лаwо! Гава тә жь бәр һәвале хwәва wәк'илти кьр у жь бәр йәкива дәйн һьлда стуйе хwә,

[2] тӧ пе готьна дәве хwә к'әти т'әле, тә пе готьнед дәве хwә хwә да гьртьне.

[3] Аһа бькә кӧ хьлаз би, лаwе мьн, чьмки тӧ к'әти дәсте һәвале хwә, һәр'ә хwә бавежә ньге һәвале хwә у лавайа тӧ же бькә.

[4] Бьра хәw нәк'әвә ч'ә'ве тә у бьжангед тә нәчьнә ль сәр һәв.

[5] Хwә хьлаз кә чаwа хәзал жь т'әле, чаwа тәйрәдә жь дәсте неч'ирван.

[6] Бехирәто! Һәр'ә щәм мурийа, дина хwә бьдә р'е-дьрбед wан у сәрwахт бә.

[7] Нә ахе wан һәйә, нә запьде wан нә жи сәрwер,

[8] ле бәле хӧрәке хwә әw һавине дьдьн сәр һәв, хwарьна хwә жи wәхте нандьруне т'оп дькьн.

[9] Бехирәто, һ'әта к'әнге те п'алди? Те жь хәwа хwә к'әнге һ'ьшйар би?

[10] Һ'әта һьнәки р'азейи, һьнәки бьп'оньжи, һьнәки дәстед хwә бьди ль сәр һәв п'алди,

[11] һьнге к'әсибийа тәйе мина р'еwики дьз ль сәр тәда бьгьрә, дәсттәнгийа тәйе жи мина qачахәки.

[12] Мәрьве бекер, мәрьве нәп'ак бь дәве дәрәwин дьгәр'ә,

[13] әw ч'ә'ве хwә дьqӧрч'ьминә, бь ньгед хwә хәбәр дьдә у бь т'ьлийа тьшта һин дькә,

[14] мьхәнәти дьлада һәйә, әw т'ьме ль сәр нета хьрабийе йә у әw хәлqе бәри һәв дьдә.

[15] Бона ве йәке хәзәбе ньшкева сәр wида бе, дәрбәкер'а wе бьшке у ду-дәрмане ле нәбә.

[16] Ванә шәш тьштед кӧ Хӧдан дьжәнә wан, һәла һ'әфт ьн кӧ ль бәр Wи һ'әрам ьн:

[17] Ч'ә'вед к'ӧбар, зьмане дәрәwин, дәстед кӧ хуна бесущ дьр'ежьн,

[18] дьле кӧ т'ьвдира хьраб дәртинә, ньгед кӧ бона хьрабийе зу дьр'әвә,

[19] шә'де дәрәw, кӧ дәрәwа дькә у бьра бәри һәв дьдә.

[20] Лаwе мьн! Т'әмийа баве хwә хwәй кә у һинкьрьна дийа хwә пьшт гӧһе хwәва нәвежә.

[21] Әвана һәр т'ьм бьра сәр дьле тә гьредайи бьн, ль стӧкӧра тә wаланди бьн.

[22] Гава тӧ һәр'и, әwе р'ебәрийа тә бькьн. Гава тӧ р'азейи, әwе тә хwәй кьн. Гава һ'ьшйар би, әwе т'әви тә хәбәр дьн.

[23] Чьмки т'әми ч'ьра йә у һинкьрьн р'онайи, һьлатьнед ширәте р'ийа жийине йә.

[24] Әве тә жь жьна хьраб хwәй кә, жь зьмане жьна хәрибә зархwәш.

[25] Дьле хwәда нәбә машоqе бәдәwийа wе, бьра тә нәчәлqинә пе бьри-бьжанга.

[26] Чьмки р'уйе жьна qавда, мәри дьбә һ'әwще пари нане т'ьси у жьна ч'ә'вдәр, неч'ирване нәфса маqула йә.

[27] Дьбә кӧ йәк агьр текә п'ашьла хwә у к'ьнщед wи нәшәwьтьн?

[28] Дьбә кӧ йәк ль сәр к'ура егьр бьгәр'ә у ньге wи нәшәwьтьн?

[29] Әв жи аһа йа, йе кӧ незики жьна хәлqе дьбә, һәгәр дәст бавежә wе, әw бе бәла наминә.

[30] Ломә дьзе бьр'чи найе кьрьне, гава дьзи зьке хwә т'ер кьр,

[31] ле бәле гава бе гьртьне, гәрәке һ'әфт щар ле вәгәр'инә, wе һ'әму һәбука мала хwә бьдә.

[32] Ле йе кӧ зьнек'арийе дькә, һ'ьше wи т'ӧнә, әwе аһа дькә нәфса хwә ӧнда дькә.

[33] Әwе ледайи у бер'умәт бә, жь р'ур'әшийе хьлаз нәбә.

[34] Чьмки к'ӧмр'әши qалп'ахе сәре мер р'адькә у р'ожа һ'әйфһьлдане һәwа пе дьк'әвә,

[35] жь бәр ве йәкева т'ӧ тьшт бәр ч'ә'ва найе, чьqас тьшт жи жь бәрва бьди, йәкә диса wе йа хwә бькә.