<Мәсәлә 5

[1] Лаwе мьн! Дина хwә бьдә сәрwахтийа мьн у гӧһе хwә бьдә сәр билантийа мьн,

[2] wәки фьрасәта тә һәбә у левед тә занәбуне хwәй кьн.

[3] Чьмки жь левед жьна хәриб, чаwа һьнгьве һелуне же бьньqьтә у дәве wе жи жь р'ун нәрмтьр ә,

[4] ле ахьри тә'л ә мина зьрич'ке у бьр'айә мина шуре дӧдәви.

[5] Ньгед wе бәрбь мьрьне дьбьн у гавед wе дьгьһиньнә дийаре мьрийа.

[6] Р'ийа жийинеда әw т'ӧ щар начә, р'е-дьрбе wе сьбә-еваре әw нә йәк ьн, тӧ хwәха ньзани әw к'ӧда дьчә .

[7] Дә ньһа лаwно, гӧһ бьдьнә мьн, жь готьнед дәве мьн дур нәк'әвьн.

[8] Жь wе к'ӧлфәте хwә дур хwәй кьн у незики дәре мала wе нәбьн,

[9] wәки qәwата хwә нәди һьнәкә дьн у салед хwә нәди йәки зӧлмк'ар.

[10] Нәбә кӧ һьнәкә дьн пе qәwатә тә т'ер бьн у к'әда тә бьк'әвә мала хәлqе

[11] у тӧ ахьрийе ахә-ах нәки, гава гоште щане тә бьһ'әлә-бьмашә,

[12] һьнге бежи: «Мьн чьма ширәт qәбул нәкьр у дьле мьн һьлатьн беһӧрмәт кьр,

[13] мьн дәнге ширәтк'аред хwә нәбьһистьн у гӧһед хwә нәданә ль сәр дәрсдаред хwә?

[14] Һьндьк мабу әз ль бәр ч'ә'ве к'оме у щьмә'те бьк'әтама нава һәр хьрабийе».

[15] Тӧ ава жь һ'әwзе хwә вәхwә у йа кӧ жь бира тә дәрдьк'әвә.

[16] Бьра канийед тә к'учеда бәла нәбьн, ньхалед аве мәйданада нәһәр'ькьн.

[17] Бьра әw т'әне йед тә бьн, нә кӧ йед тә у хәриба бьн.

[18] Канийа тә бьра бьмбарәк бә у пе жьна хортанийа хwә ша бә,

[19] бьра әw хәзала һ'ьзкьри бә у әw кара һ'әwаск'ар бә, синг-бәре wе һәр гав тә т'ер кьн у һәр т'ьм машоqе һ'ьзкьрьна wе бә.

[20] Чьма лаwе мьн, бьби машоqе жьна зьнек'ар у синг-бәре жьна хәриб тӧ һ'әмез ки?

[21] Чьмки р'е-дьрбед мерьв ль бәр ч'ә'ве Хӧдан ьн у Хӧдан һаш жь һ'әму гавед wан һәйә.

[22] Хьрабе пе ә'мәлед хwәйә хьраб бе гьртьне у пе wәрьсе гӧнед хwә бе гьредане.

[23] Әwе жь дәст ширәтqәбулнәкьрьне бьмьрә у жь дәст гәлә ахмахтийа хwә wе ӧнда бә.