<Мәсәлә 18

[1] Йе жь хwә р'ази хwәстьна дьле хwә дьгәр'ә у мьqабьли һәр шеwьр у qьраре йә.

[2] Ахмах билантийе һ'ьз накә, ле т'әне дькә кӧ йа хwә бежә.

[3] Гава нәп'акәк те, беqәдьри жи те, т'әви бер'умәтийе беһӧрмәти те.

[4] Готьнед дәве мерьв авед к'ур ьн, жь канийа сәрwахтийе ч'әм дьк'ьшьн.

[5] Әв нә р'аст ә кӧ пьшта нәп'ак бьгьрьн, диwанеда йе р'аст нәр'аст дәрхьн.

[6] Дәве йе ахмах шер' т'әвр'адькә у готьна wи гази ледане дькә.

[7] Дәве ахмах бәла сәре wи йә у заре wи т'әла нәфса wи йә.

[8] Готьнед бӧхданбеж мина тә'мә-тиска нә у әw һ'әта к'ураийа навдьл дьчьн.

[9] Әwе кӧ шьхӧле хwәда сьст ә, әw бьре мәрьве зийанк'ар ә.

[10] Наве Хӧдан бьльндщикә qайим ә, р'асте кӧ хwә ль wьр дьгьрә, ле сьт'ар дьбә.

[11] Һәбука дәwләти бона wи, чаwа бажарәки зор ә у бь дитьна wи мина сурәкә бьльнд ә.

[12] Бәри к'әтьне дьле мерьв к'ӧбар дьбә, ле хwә ньмьзкьрьне р'успи дьбә.

[13] Йе һе нәбьһисти щабе дьдә, әw беһ'ьш у qара wи йә.

[14] Р'ӧһ'е мерьв ль нәхwәшийа сәбьр дькә, ле р'ӧһ'е бьриндар к'и дькарә тәйах кә?

[15] Дьле йе аqьл заньстийе дәст тинә у гӧһе йе сәрwахт заньстийе дьгәр'ә.

[16] Хәлата мерьв р'е ль бәр wи вәдькә, һ'әта ль бәр гьрәгьра жи wи дьбә.

[17] Йе пешийе готьна хwә дьбежә, кӧ әw р'аст дәре, ле гава дә'wкьре wи бе, wе бе ә'нәнәкьрьне.

[18] П'әшк-авитьн шәр'-дә'wа дьдә сәкьнандьне у йед зор ль һәв дьдә р'уньштандьне.

[19] Бьраки хәйиди мина бажарәки суркьри йә у шәр'-дә'w мина зәр'за qәсьре йә.

[20] Зьке мәрьв жь бәре дәве wи т'ьжи дьбә у жь дәрәмәта заре wи т'ер дьбә.

[21] Мьрьн у жийин дәсте зьмен ьн, йе кӧ же һ'ьз дькьн жь бәред wи дьхwьн.

[22] К'и жьне дьбинә, хер у хьзне дьбинә у жь Хӧдан р'ә'м-к'әрәме дьстинә.

[23] К'әсиб бь лава-диләка дьпьрсә, ле дәwләти һ'ьшк щабе дьдә.

[24] Мәрьве хwәйе гәләк һәвал, бәла сәре wи йә, ле һәвал жи һәнә жь бьраки четьр ьн.