<Мәсәлә 30

[1] Әв ьн готьнед дайи, к'ижан кӧ Агуре кӧр'е Йаqәһе готә Ит'ийел у Ук'ал:

[2] Р'аст әз жь һәр мәрьви беһ'ьштьр ьм у һ'ьше мерьв сәре мьнда т'ӧнә,

[3] әз сәрwахтийе һин нәбум у Йе Һәри Пироз әз нас накьм.

[4] К'и р'абу ә'змен у жь wьр һат? К'е к'ӧлма Хwәда ба т'оп кьр? К'е пеша Хwәда ав гол кьрьн? К'е һ'әму qӧлбед дьнйайе данин? Наве Wи чи йә? Наве кӧр'е Wи чи йә? Гәло тӧ зани?

[5] Һ'әму готьнед Хwәде паqьж ьн, бона йед хwә спартьнә Wи, Әw мәрт'ал ә.

[6] Тьштәки ль сәр готьнед Wи зедә нәки, кӧ Әw тә һьле у тӧ дәрәw дәрейи.

[7] Әз жь Тә дӧ тьшта дьхwазьм, на-на нәкә һ'әта кӧ әз нәмьрьмә:

[8] Бош-бәталийе у дәрәwийе жь мьн дур хә, нә мьн бәләнгаз кә, нә жи дәwләти кә, пе нане р'оже Тӧ мьн т'ер кә.

[9] Нәбә кӧ әз т'ер бьм, Тә инк'ар кьм у бежьм: «Хӧдан к'и йә?» Нә жи к'әсиб бьм дьзийе бькьм у наве Хwәде хwә беһӧрмәт кьм.

[10] Хәйба хӧлам ль бәр ахайе wи нәкә, кӧ әw ньфьр'а ль тә нәкә у бәла нәйе сәре тә.

[11] Мәрьв һәнә кӧ ньфьр'а баве хwә дькьн у дӧа дийа хwә накьн.

[12] Мәрьв һәнә кӧ ль бәр ч'ә'ве хwә паqьж к'ьфш дьбьн, ле жь гәмара хwә нәһатьнә шуштьне.

[13] Мәрьв һәнә ч'ә'в ль сәр сери дьр'әqьсьн у бьри-бьжангед wи бьльнд ьн.

[14] Мәрьв һәнә дьранед wан мина шура нә, чәнгийед wан жи мина к'ера нә, wәки к'әсиба жь сәр дьне даqӧртиньн у бәләнгаза жи жь нава мәрьва.

[15] Дӧ qизед т'ернәбуйе һәнә, кӧ дьбежьн: «Бьдә, бьдә!» Се тьшт һәнә кӧ т'ер набьн у чар тьшт һәнә кӧ набежьн: «Бәс ә!»

[16] Дийаре мьрийа, жьна бебәр, ә'рде кӧ т'ер аве вәнахwә у агьр кӧ набежә: «Бәс ә!»

[17] Әwе кӧ qәрфа баве хwә дькә у гӧһдарийа дийа хwә накә, qар'qар'ед нәwала у щущукед тәйра wе ч'ә'вед wи дәрхьн у даqӧртиньн.

[18] Се тьшт һәнә кӧ әз те һьлнайем у чар тьшт кӧ әз wан фә'м накьм:

[19] Р'ийа тәйрайә һәwеда, р'ийа мә'райә qәйада, р'ийа гәмийайә нава бә'рада у р'ийа мерайә бәрбь qиза.

[20] Р'ийа жьна ч'ә'вдәр аһа йә, дьхwә у дәве хwә паqьж дькә у дьбежә: «Мьн т'ӧ хьраби нәкьрийә».

[21] Се тьшт һәнә кӧ дьнйа бьн wанда дьләрьзә у чар тьшт һәнә кӧ әw нькарә wан бьбә:

[22] Хӧламе кӧ дьбә п'адша, ахмахе кӧ бь нен т'ер дьбә,

[23] к'ӧлфәта нәхунширьн кӧ мер дькә у щарийа кӧ дьбә мират'хӧре ханьма хwә.

[24] Ль р'уйе ә'рде чар тьште бьч'ук һәнә, ле әw йе һәрә сәрwахт ьн:

[25] Мури, кӧ нә ә'фьринәки qәwат ә, ле хӧрәке хwә һавине дьдә ль сәр һәв.

[26] Qотьк, кӧ бинбәрәкә беqәwат ә, ле qӧлед хwә әw qәйада че дькьн.

[27] Кӧли, кӧ п'адше wан т'ӧнә, ле к'ом бь к'ом бь һәвр'а дьфьр'ьн.

[28] Мә'рәгиске ләпьки, кӧ бь чәч'ькед хwә диwерва дьзәльqә, ле әw qәсьред п'адшада дьминьн.

[29] Се бинбәр ьн кӧ р'евачуйина wан һ'әwас ьн у чар бинбәр ьн кӧ р'евачуйина wан бәдәw ьн:

[30] Шер, кӧ ә'гите һ'әйwана йә, әw жь бәр т'ӧ тьшти нар'әвә,

[31] дике һ'ьшьр у нери, ӧса жи п'адше пешийа щьмә'та хwә.

[32] Һәгәр тә жь дәст к'ӧбарийе бефә'ми кьр, йан жи хьраби фькьри йи, дәсте хwә бьдә ль сәр дәве хwә.

[33] Чьмки чаwа деw дьк'ьлен р'ун дәрдьк'әвә у позда дьдьне хун же дьчә, ӧса жи һеланед һерс, шәр' че дьбә.