<Мәсәлә 15

[1] Щаба нәрм һерсе датинә, ле готьна һ'ьшк һерсе р'адькә.

[2] Зьмане йе сәрwахт заньстийе хwәш дькә, ле жь дәве ахмах ахмахти дьр'ьжә.

[3] Ч'ә'ве Хӧдан ль һәр дәра йә, Әw qәнщ у хьраба дьбинә.

[4] Заре ширьн дара жийине йә, ле йе хальфи еша дьла йә.

[5] Ахмах дәрса баве хwә беһӧрмәт дькә, ле йе гӧһ дьдә һьлатьне, фьрасәта wи зедә дьбә.

[6] Малед р'астада хьзна мәзьн һәйә, ле к'әда нәп'акада кӧл у дәрд.

[7] Дәве сәрwахта заньстийе бәла дькьн, ле дьле ахмаха ӧса накә.

[8] Хӧдан жь qӧрбана нәп'ака зьвер ә, ле дӧайе р'аста ль бәр дьле Wида ширьн ә.

[9] Хӧдан жь р'ийа нәп'ака зьвер ә, ле йед ль пәй р'астийе дьчьн һ'ьз дькә.

[10] Йе жь р'е дьк'әвә бе бәла наминә у йе һьлатьне һ'ьз накә wе нәминә.

[11] Дийаре мьрийа у гәлийе һәй-wайе ль бәр Хӧдан ьн, иди к'ӧ ма дьле әwләдед мерьв.

[12] Йе жь хwә р'ази ширәтк'аре хwә һ'ьз накә у начә щәм сәрwахта.

[13] Дьле ша бәшәра хwәш ә, ле дьле кӧл һ'ьнавзәр ә.

[14] Дьле билана заньстийе дьгәр'ә, ле дәве ахмах ахмахтийева т'ьжи йә.

[15] Хwәйе дьле кӧл һәр р'ож шинеда йә, ле хwәйе дьле ша һәр т'ьм шайеда йә.

[16] Qәнщ ә һьндьк бь хофа Хӧдан, нә кӧ хьзна гәләк бь шәр' у дә'w.

[17] Qәнщ ә хwарьна п'ьнщар'е бь һ'ьзкьрьне, нә кӧ гайе дәрмаликьри бь к'ин-бох.

[18] Мәрьве һерс шер' т'әвр'адькә, ле йе бәрбьһер qалмә-qалме дьсәqьр'инә.

[19] Р'ийа хwәр'анәдити мина чита стьри йә, ле шьвәр'ийа р'аста р'аст-дуз ә.

[20] Кӧр'е сәрwахт баве хwә ша дькә, ле мәрьве ахмах qәдьре де ньзанә.

[21] Ахмахти бона кемаqьл шабун ә, ле йе аqьл дьдә ль сәр р'ийа р'аст.

[22] Бе ширәт мәрәм у т'ьвдир бәтал дьбьн, ле бь сайа гәләк ширәтк'ара әw тенә сери.

[23] Мәрьв пе щабдайина хwәйә р'аст ша дьбә, чьqас хwәшә һәр хәбәр wәхте хwәда!

[24] Р'ийа жийине мәрьве аqьл бәрбь жор дьбә, кӧ wан дур хә жь дийаре мьрийайә жерьн.

[25] Хӧдан малед к'ӧбара дәвәр'у дькә, ле синоре жьнәбийа дьшьдинә.

[26] Хӧдан жь фькьре йе хьраб зьвер ә, ле хәбәред йе бехельф ль Wи хwәш тен.

[27] Ч'ә'вбьр'чити шәр'-дә'w дькә мала хwә, ле йе р'ӧшәта һ'ьз накә wе бьжи.

[28] Дьле йе р'аст ль сәр щабдайине дьфькьрә, ле жь дәве нәп'ака хьраби дьр'ьжә.

[29] Хӧдан жь нәп'ака дур ә, ле дӧайе р'аста дьбьһе.

[30] Р'онаийа ч'ә'ва дьл ша дькә, мьзгинийа хер жи һәстуйа дьшьдинә.

[31] Йе кӧ гӧһ дьдә һьлатьна жийине, хwәха жи we нав сәрwахта бе жийине.

[32] Йе ширәта qәбул накә, әw хәниме хwә йә, ле к'и һьлатьне qәбул дькә, аqьл т'оп дькә.

[33] Хофа Хӧдан сәрwахтийе һин дькә, бь мьлуктийе бәрбь р'умәте дьбә.