Уньс 1
[1] Хәбәра Хӧдан Уньсе кӧрʼе Амиттайрʼа һат у гот:
[2] «Рʼабә һәрʼә бажаре Нинәwайа мәзьн даннасин кә у wе щьмәʼте һьле, чьмки нәһәqийед wан гьһиштьнә ль бәр пʼәрʼе әʼзмен».
[3] Ле Уньс рʼабу кӧ жь бәр чʼәʼве Хӧдан бьрʼәвә Тʼаршише. Әw бәрʼжери Йафайе бу, гәмик дит кӧ дьчу Тʼаршише, әwи һәqе рʼийа хwә дайе, кʼәтә гәмийе кӧ тʼәви wан һәрʼә Тʼаршише, wәки жь дәсте Хӧдан бьрʼәвә.
[4] Ле Хӧдан баки qайим ль бәʼре рʼакьр у бәʼреда фьртонәкә мәзьн рʼабу, әw бу кӧ гәми һурдәхwәши буйа.
[5] Һьнге гәмиван тьрсийан у һәр мәрьвәки һәwара хwә хwәдейе хwә ани у әw дәрданед кӧ гәмийеда һәбун авитьнә бәʼре, wәки баре гәмийе сьвьк кьн. Ле Уньс чубу кʼәтьбу лап бьне гәмийе, пʼалдабу у кʼәтьбу хәwа кʼур.
[6] Сәрwере гәмийе һатә щәм Уньс у готе: «Әв чь хәwтʼешә кʼәтийә чʼәʼве тә? Һәла рʼабә гази хwәде хwә кә! Бәлки хwәде тә мә бир бинә у әм ӧнда нәбьн».
[7] Һьнге готьнә һәв: «Wәрьн әм пʼәшк бавежьн кʼа әва qәзийа рʼуйе жь мә кʼижанида һатийә ль сәре мә» у пʼәшк авитьн, пʼәшк пʼара Уньс кʼәт.
[8] Һьнге готьнә Уньс: «Дә ньһа мәрʼа бежә, рʼуйе кʼеда әва qәзийа һатийә ль сәре мә? Тӧ хwәйе чь шьхӧли йи? Тӧ жь кʼӧ те йи? Жь кʼижан wәлати йи у жь чь мьләти йи?»
[9] Ле әwи ль wан вәгәрʼанд у гот: «Әз Ибрани мә. Жь Хӧдан Хwәдейе әʼзмен, әʼфьрандаре бәʼр у бәже хоф дькьм».
[10] Һьнге хоф кʼәтә ль сәр wан у готьнә wи: «Тә чьма әв йәк кьрийә?» Чьмки әw мәрьвана пе һʼәсийабун кӧ әва жь дәсте Хӧдан дьрʼәвә, пешда әwи wанарʼа гьли кьрьбу.
[11] Паше готьне: «Ньһа әм тә чаwа бькьн, wәки бәʼр ль мә вәгәрʼә бьсәqьрʼә?» Чьмки чьqас дьчу пелед бәʼре һе рʼадьбун.
[12] Һьнге Уньс готә wан: «Мьн һьлдьн бавежьнә бәʼре у бәʼре ль wә вәгәрʼә бьсәqьрʼә, чьмки әз заньм кӧ рʼуйе мьнда әва йәка һатийә ль сәре wә».
[13] Wан мәрьва һе бер дькʼьшандьн, дькьрьн кӧ хwә ль бәже бьгьрьн, ле жь qәwата wан дәр бу, чьмки пелед бәʼре чьqас дьчу һе ль wан рʼадьбун.
[14] Һьнге wана һәwара хwә Хӧдан ани у готьн: «Йа Хӧдан, әм рʼәща жь тә дькьн, нә бә кӧ ль рʼуйе ви мәрьвида әм ӧнда бьн у хуна ви ль щийе һәqи нәһәq ль сәр мәда нәйнә, чьмки тә Хӧдан, wәкә qьрара хwә кьр».
[15] У Уньс һьлдан авитьнә бәʼре у бәʼр жь wе тʼәврʼабуна хwә сәqьрʼи.
[16] Әw мәрьвана жь Хӧдан гәләки тьрсийан, qӧрбан Хwәдерʼа дан у ад qьрар кьрьн.