<Уньс 2

[1] Һьнге Хӧдан әʼмьри ль сәр һʼутәки кьр кӧ Уньс даqӧртинә у Уньс се рʼож у се шәва зьке һʼутда ма.

[2] Пәй ве йәкерʼа Уньс зьке һʼутда гази Хӧдан Хwәде хwә кьр.

[3] У гот: «Мьн тәнгасийа хwәда гази Хӧдан кьр у wи щаба мьн да, жь зьке дийаре мьрийада һәwар кьр у тә дәнге мьн бьһист.

[4] Тә әз авитьмә нав дьле кʼурайийа бәʼре у һʼәжед ава әз ньхамтьм, һʼәму авед тә пелед wанва ль сәр мьнрʼа чун.

[5] Һьнге мьн гот: ‹Әз жь бәр чʼәʼвед тә һатьмә авитьне, ле бәле әзе диса бьбиньм пʼарьстгәһа тәйә пироз›.

[6] Ава әз мьна кьрьм у бин ль мьн дьчʼькийа, кʼурайийа бәʼре әз ньхамтьм у гиһайе бәʼре ль сәре мьн пʼечʼийа.

[7] Һʼәта рʼькʼьне чʼийа әз чумә харе, әʼрде чаwа ахьле һʼәта һʼәтайе дора мьн гьртьбу. Ле те әʼмьре мьн жь горʼьстен дәрхи, Хӧдан Хwәдейе мьн.

[8] Гава әз кʼәтьмә ль бәр рʼӧһʼ, Хӧдан мьн тӧ бир ани у дӧайе мьн гьһиштә пʼарьстгәһа тәйә пироз.

[9] Әwед кӧ пәй тьштед пʼучʼә дәрәw дькʼәвьн, әw дәст жь йе хwәйи рʼәʼм у кʼәрәм дькʼьшиньн.

[10] Ле әзе бь дәнге шькьрдарийе qӧрбане тәрʼа бьдьм у чь мьн соз дайә жи әзе биньмә сери. Хьлазбун тʼәне жь дәсте Хӧдан ә».

[11] У һьнге Хӧдан әʼмьр ль һʼут кьр, һʼут кьрә һоqин Уньс авитә бәже.