<Уньс 3

[1] Хәбәра Хӧдан щара дӧда Уньсрʼа һат у гот:

[2] «Рʼабә һәрʼә бажаре Нинәwайа мәзьн wе йәке нава wеда даннасин кә, чь кӧ әз тәрʼа дьбежьм».

[3] Һьнге Уньс ль гора готьна Хӧдан рʼабу чу Нинәwайе. Нинәwа жи бажарәки беһʼәсаб мәзьн бу, мьскʼәне wе wәкә рʼийа се рʼожа бу.

[4] Уньс рʼабу кʼәтә бажер, рʼийа рʼожәке qәданд, даннасин дькьр у дьгот: «Һәла һе чьл рʼож һәйә, кӧ Нинәwа wеран бә».

[5] Бьналийед Нинәwайе баwәрийа хwә Хwәде анин, qьрар кьрьн кӧ рʼожи бьгьрьн у жь чʼука һʼәта мәзьна кʼӧрх ль хwә кьрьн.

[6] Гава әв дәнг кʼәтә гӧһе пʼадше Нинәwайе, әw жь сәр тʼәхте хwә рʼабу у чӧхе ль сәр хwә ехьст, кʼӧрх ль хwә кьр у ль нава кʼозийеда рʼуньшт.

[7] Нав Нинәwайеда дәнг да бәлакьрьне у гот: «Анәгори готьна пʼадше у гьрәгьра, бьра мәрьв у һʼәйwан, пәз у дәwар тʼӧ тьшти тәʼм нәкьн, нәчʼерьн нә жи вәхwьн.

[8] Бьра мәрьв у һʼәйwан кʼӧрх ль хwәкьн у бькьн зарин гази Хӧдан кьн. Бьра һәр мәрьв жь рʼийа хwәйә хьраб вәгәрʼә у дәсте хwә жь һʼәрамийе бькʼьшинә.

[9] Кʼи занә? Бәлки Хӧдан готьна хwә бьгӧһезә у ль мә вәгәрʼә, wәки һерса wи ль мә дайнә, кӧ әм ӧнда нәбьн».

[10] Гава Хwәде әв кьрьна wан дит, кӧ әw жь рʼийа хwәйә хьраб вәгәрʼийан, Хwәде бона wе хәзәба кӧ готьбу wе банийа ль сәре wан, готьна хwә гӧһаст у әw йәк нә ани ль сәре wан.