[1] Kamay Saolo agaway kay agpamosong, agkabono sa mga agpaniwala sa Kapwan. Kalbas siyo pataboy sa mabwat pag poon sa mga sasirdoti,
[2] mangayay mga solat batay biyaba sa mga balay pagpaniponan mga Odyo sa bayan Damasko, matang siro katawan siyo siyogo in mabwat pag sasirdoti. Kalbas no siyo apo ngiitan agpaniwala sa mga ogali Isos, na kansiyo batay diyakep, kamayba kaliyakiyan, kamayba kagbaiyan, biyaba sa Irosalim.
[3] Kalbas siyo agipanaw wa. Paka bangen wa sa bayan Damasko, toloy mangkilat lakoy batang sa langit, agrawa wa lakoy in boo kansiyo balabaan.
[4] Saolo malabo sa diya. Siyo karengey agiplaong keyen, Saolo, laki Saolo, nakay batang ako kaimo piyagpaidapan?
[5] Keyen Saolo, Laki, kao nakay? Keyen, Ako Isos, in kaimo piyagpaidapan.
[6] Miyorog wa kao, kao ista wa sa bayan. Ista kao batay piyatoldo in kaimo batay panawen.
[7] In kay Saolo mga sarig abolaleg wa, idwa kaiplaong. Siro karengey in agiplaongan, kamay idapo ngiitan.
[8] Kalbas miyorog Saolo. Paka mangimata siyo yewed kangitan, matang siyo yaakay, piyarateng sa Damasko.
[9] Saolo tolo ka ibeng beleg, yewed mamangan, yewed din minem.
[10] Sa Damasko apo mangyan agpaniwala kay Isos in ngaran Ananiyas. Siyo agkaanapen, lomwas sa kansiyo in Kapwan, keyen, Laki Ananiyas. Siyo keyen, Laki Kapwan, ako anda daan.
[11] Keyen in Kapwan, Kao panaw wa, ista pataboy sa dalan piyagawit Matoron, pataboy sa balay Odas. Asin pamangkiten mangyan taga Tartos, in ngaran Saolo. Siyo asin agpandalangin.
[12] Siyo batang manainep osai ka mangyan piyagawit Ananiyas misoroy sa balay, omatang sa kansiyo, matang siyo kangitan wakay.
[13] Kamay keyen Ananiyas, Laki Kapwan, in aronaw barita keyen ina pag mangyan agpamangwat lakoy daet sa kaimo mga bodang sa Irosalim.
[14] Kadayo atai siyo apo kabaloyan batang sa mga poon sasirdoti, matang in boo atai agmaal sa kaimo batay kansiyo diyakep.
[15] Kamay keyen in Kapwan, Dali wa, angkataw siyo kangay iidang batay siyogo agbarita panawen sa kangay sa mga yewed Odyo, anggan sa mga poon lakoy, anggan din sa mga kasokponan Israil.
[16] Ako batay agpatoldo sa kansiyo keyen siyo dogayan aronaw kaidapan matang ako batay piyaglakonaw.
[17] Kalbas ista wa ngani pataboy Ananiyas, omakyat sa balay, omatang kay Saolo, keyen, Laki belag Saolo, ako siyogo Isos in Kapwan, in lomwas taite sa kaimo sa dalan, in kao atai agtaboy. Kaya ako kansiyo siyogo sa kaimo, matang kao kangitan wakay, osai matang kao piyakan in Betek pag Abyan.
[18] Kalbas toloy apo maragrag batang sa kay Saolo mata kagwali sariksik. Kalbas siyo kangitan wakay, siyo tomaydek wa, kalbas biyaotismowan.
[19] Kalbas siyo mamangan wakay, apo wakay eyat. Saolo dogay kayte agpamataw sa Damasko, agyanggat sa mga agpaniwala.
[20] Siyo toloy agbarita panawen kay Isos sa mga balay pagpaniponan mga Odyo keyen, Isos in Bodang Diyos.
[21] In boo agparengey, agsoyo keyen, Tomag ina wa in agpamono sa Irosalim sa mga ista agmaal kay Isos. Kadayo atai ina din in kansiyo panawen, in mga agpaniwala batay kansiyo diyakep, batay biyaba sa mga poon sasirdoti.
[22] Kalbas kay Saolo kabaloyan agistobo, siyo agmatiwid agpatoldo keyen Isos ngani in Kiristo. In mga Odyo agbalay sa Damasko idbatay kapandaeg sa kansiyo mga matiwid.
[23] Paka dogay kayte agpaypolongan in mga Odyo keyen Saolo bonowen wa.
[24] Kansiro piyagdamay in mga sakbawan sa alabat bayan, ibeng din, yabi din, matang siyo mabono. Kamay Saolo abaritaan keyen, Kao kono batay wa biyono.
[25] Kalbas osai ka yabi in kansiyo mga agadar komwa lakoy galang, Saolo siyoroy, piyalooy sa awak alabat.
[26] Saolo pataboy sa Irosalim, siyo beet wa nges miyanggat sa mga agpaniwala, kamay siro boo agkalimo sa kansiyo keyen karam yewed agpaniwala.
[27] Kalbas Birnabi agpaanggat kansiyo sa mga katiwala, agpanggisod sa kansiro keyen, Taite sa dalan Saolo batang kangitan sa Kapwan, in Kapwan miplaong sa kansiyo. Siyo idwa din agkalimo agpatoldo panawen kay Isos sa Damasko.
[28] Kalbas Saolo agpamataw wa sa kansiro, agipanawan wa sa Irosalim, yewed agkalimo agpatoldo panawen sa Kapwan.
[29] Kalbas siyo agiplaongan din sa mga Odyo agiplaong Girigo, siro agpalsisagotan, kamay siro batay nges agbono sa kansiyo.
[30] Paka ina atawanan wa in mga agpaniwala, Saolo kansiro tiyonton sa Sisariya, piyapanaw wa, piyataboy sa Tartos.
[31] Paka kataw wa ina in mga barkadaan mga bodang Diyos sa Odiya apyaan wa, kadayo sa Galiliya, anggan sa Samariya. Siro agkakarowan, in kansiro remrem piyagpakaeyat in Betek pag Abyan, in siro agogali maal, agkamaal sa Kapwan.
[32] In Pidro agipanawan sa mga amat bayan, siyo rateng wa din sa mga bodang Diyos sa bayante Lida.
[33] Asin siyo kangitan mangyan in ngaran Iniyas. Siyo apo maskit, walo wa ka dagon yewed kapaglebey.
[34] Keyen Pidro, Laki Iniyas, kao piyagpaoraw wa IsoKiristo. Miyorog wa, pakapyaen wa in kaimo esekan. Toloy ngani siyo miyorog.
[35] In boo taga Lida, in boo taga Patag Saron, siro kangitan ina, kalbas maniwala wa sa Kapwan.
[36] Sa bayan wakay Oppi apo kagbaiyan agpaniwala, in ngaran Tabita, no sa agiplaong Girigo na Dorkas, na in beet siyabi songayan. Maalno in kansiyo mga panawen, siyo baatte agtolong sa mga maidap.
[37] Asin pag betek siyo apo maskit, kalbas matay wa. In bilog yoogas, kadogayte piyabolalang sa ogbos pag basag.
[38] In bayan Lida bangen sa Oppi matang paka in mga agpaniwala abaritaan keyen Pidro sa Lida, kansiro siyogo dowai ka lalaki, komwa sa kansiyo keyen, Amba, kitam wa sa Oppi, ayaw agpabeya.
[39] Kalbas Pidro panaw wa, miyanggat. Paka rateng wa siyo piyaanggat sa ogbos pag basag. In boo mga balo agpasabangen agpalpanangis. Piyapangkit kay Pidro in mga damit, mga lambong piyangwat taite Dorkas, in siyo agkaboway kay.
[40] Kamay siro boo piyalompot Pidro. Kalbas Pidro piyatadyok in dolang, mandalangin, kalbas patobang sa matay, keyen, Laki Tabita, miyorog wa kao. Kalbas siyo mangimata. Paka kangitan kay Pidro, siyo tomokkaw.
[41] Kalbas kay Pidro yaatang, piyataydek. Kalbas biyerya in mga balo osai in amat mga bodang Diyos, Dorkas piyapangkit, boway wakay.
[42] Kalbas ina biyarita wa sa boo Oppi, anggan aronaw in maniwala sa Kapwan.
[43] Pidro dogay kay agpamataw sa Oppi sa kay Simon balay, in agpamakapya balat ayop batay piyagpangwat damit.