[1] Pablo miplaong keyen, Laki mga koyay, laki mga belag, amba kanyo parengeyen in kangay piyaggisod no nakay batang yewed maal ako biyono.
[2] Paka siro karengey siyo agiplaong sa agiplaong Ibriyo na siro agparengey wa gayed. Pablo agaway kay agiplaong keyen,
[3] Ako osai ka Odyo, taga bayan Tarso sa kobat Silisya, kamay mistobo atai sa Irosalim, angkataw ako agadar kay Gamalil. Ako piyatoldo wa gayed in mga Batas in kantam mga kakoyayan. Ako ageyat wano agpaniwala sa mga Batas Diyos kataw din ngona kamo boo.
[4] Kangay piyagpaidapan osai piyagpabono in mga agpaniwala sa Adar Isos. Siro kangay piyagbakos, piyagbilanggo, kamaybawa kaliyakiyan, kamaybawa kagbaiyan.
[5] Amba kanyo tanongen in mabwat pag poon sa mga sasirdoti, kadayo in boo mga koyay. Baina, ako kansiro piyakan mga solat sa mga Odyo sa bayan Damasko, kalbas ako ista pataboy matang dakepen in ista mga agpaniwala asin pag adar, bakosen, babaen sa Irosalim matang parosaanen.
[6] Tangali wa in ibeng ako bangen wa sa bayan Damasko, toloy romawa wa lakoy in boo kobat, balawas lakoy batang sa langit.
[7] Ako toloy wa malabo sa diya. Kalbas ako karengey apo miplaong, siyabi sa kangay keyen, Laki Saolo, Saolo, nakay batang ako kaimo piyagpaidapan?
[8] Kalbas ako keyen, Laki Kapwan, nakay kao? Siyo keyen, Ako Isos taga Nasarit, in kaimo piyagpaidapan.
[9] In rawa lakoy ngiitan in kangay mga sarig, kamay yewed kansiro arengeyan in agiplaong sa kangay.
[10] Kalbas ako keyen wakay, Laki Kapwan, nakay in kangay pangwaten? Kalbas siyabi wakay sa kangay in Kapwan keyen, Kao tomaydek, pataboy wa sa Damasko. Ista batay siyabi sa kaimo in boo kailangan kaimo pangwaten.
[11] Ina daan ako mabeleg wa, piyagsolap in rawa lakoy, matang ako piyagakay wa kangay mga sarig anggan rateng sa Damasko.
[12] Ista apo osai ka kaliyakiyan, in ngaran Ananiyas. Siyo agmaal ngani sa Diyos, agpaniwala sa mga Batas, osai piyagpakalakonaw in boo mga Odyo ista agbalay.
[13] Siyo pasabangen sa kangay, tomaydek sa kangay bangen keyen, Laki belag Saolo, kao kangitan wakay. Kalbas ina daan pag betek ako toloy wakay kangitan, siyo kangay ngiitan.
[14] Kalbas kay Ananiyas kay siyabi keyen, Kao iidang in Diyos in piyagmaal kantam mga kakoyayan matang kaimo atawanan in kansiyo beet, matang din kaimo ngiitan in kansiyo Betek pag Sogowan, anggan din kaimo arengeyan in kansiyo agiplaongan,
[15] angkataw kao batay agbarita panawen sa kansiyo, kaimo batay siyabi sa boo mga mangyan in kaimo ngiitan, osai arengeyan.
[16] Kalbas ngona ayaw wa agpabeya. Kao tomaydek wa, pabaotismo wa. Kao mandalangin wa sa kansiyo ngaran, matang kao malinis wa, idapo wa in kaimo mga daet.
[17] Pablo agiplaong kay keyen, Ako moli wakay atai sa Irosalim. Sa betek ako sa balay lakoy Diyos agpandalangin ako agkaanapen apo ngiitan.
[18] Kangay ngiitan in Kapwan, siyabi sa kangay keyen, Kao ayaw agpabeya, panaw wa sa Irosalim angkataw in mga mangyan atai idbatay maniwala sa kaimo barita panawen sa kangay.
[19] Kalbas ako keyen, Laki Kapwan, kansiro ngani atawanan keyen in mga agpasandig sa kaimo kangay piyamangkit sa baatte balay pagpaniponan matang kangay piyabilanggo, osai piyabogbog.
[20] Osai in Istiban agbarita panawen sa kaimo, in siyo piyagbono ako asina din agiyagem sa mga agbono. Ako in agdamay sa mga lambong in mga agbono sa kansiyo.
[21] Kamay siyabi sa kangay in Kapwan keyen, Panaw wa ngani, angkataw kao kangay piyagsogo sa adayonaw, sa mga yewed Odyo.
[22] Anggan asin pag agiplaong in mga mangyan agparengey kay Pablo, kamay paka siyo keyen mga yewed Odyo siro toloy wa malpangowan keyen, Bonowen in kataw ina pag mangyan. Yewed mayadi siyo boway.
[23] Siro agaway kay agpalpangowan, agribway din kansiro mga islen, osai agsalbon in mga bogabo.
[24] Matang siyogo in mabwat pag kapitan keyen, Pablo paanggaten wa sa galem balay mga sondalo, kalbas bogbogen, botogen no nakay batang kaloba ina in agkagalit sa kansiyo in mga Odyo.
[25] Kamay paka siyo biyakos wa batay piyagbogbog, siyabi Pablo sa kapitan asin agtaydek keyen, Maal lames sa mga batas in agbogbog kataw ina sa mangyan sa listaan mga taga Roma, kamayba idapo kay kasondowan in tanongan?
[26] Paka karengey ina in kapitan siyo pataboy sa mabwat pag kapitan keyen, Ina mana pag mangyan sa listaan mga taga Roma. Nakay in kaimo batay piyangwat asin?
[27] Matang pasabangen kay Pablo in mabwat pag kapitan keyen, Totoo lames ngani kao sa listaan mga taga Roma? Keyen Pablo, Totoo.
[28] Keyen in kapitan, Lakonaw in kangay biyayad matang ako liista sa mga taga Roma. Keyen wakay Pablo, Kamay ako sogod ako biyodang.
[29] Toloy panaw sa kansiyo in mga batay nges agbotog sa kansiyo. Kadayo in mabwat pag kapitan alimowan wa angkataw Pablo kansiyo piyabakos karakara, bago mana siyo liista sa mga taga Roma.
[30] Beet atawanan in mabwat pag kapitan mga sondalo no nakay batang lames in mga Odyo agsombong kay Pablo, matang paka goribas kansiyo wa piyalowat in kay Pablo bakos, kansiyo piyatipon in mga poon sasirdoti, in boo mga tanongan in mga Odyo, Pablo piyaanggat, piyaadap sa tiponan.