[1] Osai ka ibeng mangiriyan wa, kabetek wa agsamba, Pidro osai Owan agonaik sa balay lakoy Diyos.
[2] Sa sakbawan piyagawit Maalen, apo kaliyakiyan piyagbaba, siyo pilaw sogod siyo biyoslot. Ibengibeng siyo piyagpatokkaw asin sa sakbawan matang agpangayay sa mga agrateng.
[3] Siyo kangitan Pidro osai Owan batay wa monaik sa balay lakoy Diyos, kalbas siyo mangayay sa kansiro.
[4] Kalbas dokalaki Pidro osai Owan agroris sa kansiyo. Kalbas keyen Pidro, Amba, kao mangkit kanyam.
[5] Kalbas mangkit ngani, agpanaya nges no batay piyakan.
[6] Kamay keyen Pidro, Ako idapono kowarta, kamay in atai sa kangay kangay piyagtaboy sa kaimo. Sa kabaloyan IsoKiristo taga Nasarit, amba, kao panaw wa.
[7] Siyo yaatang Pidro sa pamalang, yoorog. Kalbas kansiyo bitis, kansiyo darapa toloy piyakan eyat,
[8] siyo lomokso, tomaydek. Agparakay wa siyo agipanawan, kalbas miyanggat sa kansiro, misoroy sa balay lakoy Diyos. Siyo agipanawan, agloksowanan, agmaal sa Diyos.
[9] In boo asin mga mangyan kangitan siyo agipanawan agmaal sa Diyos,
[10] siro katawan ina in datiyan agitokkaw agpangayay sa Maalen pag sakbawan sa balay lakoy Diyos. Kalbas siro agsoyo wano idwa mayadi sa mipangwat sa kansiyo.
[11] Kalbas in siyo agatang kay Pidro osai kay Owan, in boo mga mangyan agsoyo, agdalagan, agtaboy sa dokalakiyan, sa piyagawit kay Solomon Solambi.
[12] Paka Pidro kangitan ina, siyo miplaong sa kansiro, keyen, Laki mga kasokponan Israil, nakay batang kamo agsoyo asin pag mibaloy? Nakay batang kami kanyo piyagpanroris? Kanyo lames remrem keyen kaya kami kabaloy agpaoraw sa kansiyo panawen kami in apo kabaloyan, panawen kami agsamba sa Diyos?
[13] Yewed kataw ina, dayem in Diyos in piyagmaal Abraam, osai Isaak, osai Akob, in Diyos piyagmaal in kantam mga kakoyayan, siyo in agpaoraw, matang Isos in kansiyo Sogowan piyagpakalakonaw. Isos in kanyo tiyaboy sa mga poon, siyo kanyo piyamangyan sa pangkit Pilato, siyo in batay nges piyalpas Pilato kanyo siyombong.
[14] Kanyo siyombong in Betek, in Maal wano pag Mangyan. Kalbas in kanyo yaayay palpasen in agpamono agbangen pag mangyan.
[15] Kataw ina kanyo biyono in Agpamaboway, kamay siyo piyaboway wakay Diyos, kanyam wakay ngiitan.
[16] In kabaloyan Isos in agpaoraw asin pag mangyan pilaw. Ina mibaloy panawen sa agpasandig kay Isos. In agpasandig kay Isos in agpaoraw gayed sa kansiyo, kataw ina kanyo boo piyagngitan.
[17] Pidro keyen kay, Kalbas ngona, laki mga belag, kangay atawanan, kaya kamo agbono kay Isos, angkataw kamo yewed katawan in beet siyabi in kanyo piyagpangwat, kadayo in kanyo mga poon.
[18] Kamay tangona piyagsabi in Diyos sa boo kansiyo mga poropita keyen in kansiyo Kiristo dogayan apo ina pag kaidapan. Na sa kanyo piyangwat kataw ina piyangwat wa Diyos in boo kansiyo tangona siyabi.
[19] Na ngona benglayen wa in kanyo mga daet, pasabangen wa sa Diyos, matang kansiyo liibangaw in kanyo mga daet.
[20] Na kamo batay piyakan in Kapwan mga kabetek piyagpakaeyat in kanyo mga remrem. Osai kansiyo batay siyogo sa kanyo in kansiyo tangona iidang batay Kiristo, in kansiyo piyangako batay tiyaboy sa kanyo. Na ina Isos.
[21] Kailangan siyo mataw sa langit anggan sa kabetek in boote piyagpangwat wakay bayo, kataw in piyasabi Diyos tangona sa kansiyo maalno pag mga poropita.
[22] Alimbawa in siyabi Mowisis keyen, In Diyos kanyo Kapwan batay agsogo wakay sa kanyo osai ka poropita batang sa kanyo mga kabelagan, kataw daan in ako siyogo. Na kamo maniwala sa boo kansiyo batay siyabi.
[23] Kamayba nakay in yewed maniwala asin pag poropita, na siyo batay ngani piyasoway sa mga mangyan, batay biyono Diyos. Ina in siyabi Mowisis.
[24] Kadayo in boo mga poropita, sogod kay Samwil anggan in boo mga paori sa kansiyo, siro din agbarita panawen sa mga agibaloy ngona pag mga ibeng.
[25] Sa kantam in mga piyangako Diyos in piyasabi sa mga poropita. Kamo din apo bagiyan sa kasondowan piyangwat Diyos sa kantam mga kakoyayan, in kansiyo siyabi kay Abraam keyen, In kaimo mga kasokponan dogayan in kangay batay padalan agpakamaal sa boo mga mangyan sa boo kobat.
[26] Na iidang in Diyos Isos in kansiyo Sogowan, kalbas siyogo, kitam in tokaw riyatengan, matang kitam piyagpakamaal in kitam piyagpakan kabaloyan agbenglay in kantam mga daet.