[1] Kamay apo taybalang, in lalaki Ananiyas, in babai Sapira, siro apo piyabili osai ka kobat.
[2] Siro taybalang maypolong, in kalaati kowarta biyetang wa, kadogayte in amat biyaba, tiyaboy sa mga katiwala.
[3] Kalbas Pidro miplaong keyen, Laki Ananiyas, nakay batang in kanyo remrem kanyo piyadaeg kay Katanas matang kamo agpadaya nges sa Betek pag Abyan? Kanyo biyetang in kalaati kowarta kanyo abel bayad sa kobat.
[4] In yewed kay piyabili, na kanyo daan, aon? Paka piyabili wa, in kanyo kowarta kanyo daan. Na nakay batang in kanyo remrem agpangwat kataw ina? In Diyos in kanyo nges piyagpadaya, yewed mangyan.
[5] Paka karengey ina pag agiplaong, Ananiyas toloy maligan, matay wa. In boo mga mangyan in karengey ina pag mibaloy agkalimo wa gayed.
[6] In mga begle pataboy kay Ananiyas, kansiro tiyeem, biyaba sa kobat, liyebeng.
[7] Paka kadalan mga tolo ka oras rateng in babai, siyo yewed katawan in mipangwat.
[8] Keyen Pidro, Kalakoy waget lames ina in bayad kanyo kobat? Amba, sabiyen sa kangay. Keyen in babai, Aon ngani, kalakoy waget ina.
[9] Siyabi Pidro, Nakay batang kamo maypolong agtepeng no in Abyan in Kapwan batay apadaya? Baati, sa sakbawan wa in aglalae in batang aglebeng kaimo lalaki. Kao din batay biyaba.
[10] Kalbas toloy maligan wa din in babai sa adapan Pidro, matay wa. Paka misoroy in mga begle, kansiro piyangkit, matay wakay in osai. Biyaba wakay din, piyaagem sa bangen lalaki, liyebeng.
[11] Kadogayte in boo barkadaan mga bodang Diyos maloba wano agkalimo, osai in boo karengey ina.
[12] In mga katiwala agpangwat sa pangkit in mga mangyan aronaw mga tandaan sa kabaloyan Diyos, mga makasoyo. In ogali in mga agpaniwala siro boo agtipontipon sa balay lakoy Diyos sa piyagawit kay Solomon Solambi.
[13] Kamayba in mga mangyan agmaal sa mga agpaniwala siro agkalimo miyagem sa kansiro.
[14] Kamay aronaw wakay in maniwala sa Kapwan, midagdag sa barkadaan, mga kaliyakiyan aro, mga kagbaiyan din aro.
[15] Panawen sa mga makasoyo piyagpangwat in mga katiwala in mga apo maskit piyagbaba sa balabaan karsada, piyagpapalibay sa mga damig, matang no asin domalan Pidro, na in amat kansiyo batay piyaganongan.
[16] Aronaw in mga mangyan sa mga bayan bangen sa Irosalim agrateng din agbaba in mga apo maskit, osai in mga piyaglowasan mamaw agpanrames, siro boo piyaoraw wakay.
[17] In mabwat pag poon sa mga sasirdoti maloba wano agpanagiri sa mga katiwala Isos, osai in boo kansiyo mga sarig, in mga Sadosiyo.
[18] Matang kansiyo diyakep in mga katiwala, biilanggo.
[19] Kamay ina daan pag yabi in sakbawan bilanggowan biyoswang osai ka angil siyogo in Kapwan, in dokalakiyan kansiyo piyapanaw. Miplaong in angil keyen,
[20] Kamo ista wakay sa balay lakoy Diyos, agpatoldo sa mga mangyan asin ina pag bayo wakay pag mga ogali.
[21] In mga katiwala maniwala sa angil, siro pasodip wa pataboy sa balay lakoy Diyos, agpatoldo ngani. In mabwat pag poon sa mga sasirdoti, anggan in kansiyo mga sarig, agberya sa boo mga koyay mga Odyo matang agtipon in boo mga tanongan, agsogo mga polis sa bilanggowan keyen, Atai wa babaen in dokalakiyan.
[22] Rateng sa bilanggowan in mga polis, piyangkit sa galem, idapo mana mangyan. Moli wakay, agbarita keyen,
[23] Kanyam piyangkit, piyagkopot daan gayed in sakbawan sa bilanggowan, in mga agdamay asin daan, kamay paka kanyam wa biyoswang, piyangkit, idapo wa galem.
[24] Paka karengey ina in kapitan sa mga agdamay sa balay lakoy Diyos, anggan in mga poon sasirdoti siro agpanremrem wano keyen, Nakay lames isag in kalobosan ina?
[25] Kalbas rateng in barita keyen, Ista wa mana sa balay lakoy Diyos in kanyo biilanggo, siro agtaydek agpatoldo sa mga mangyan.
[26] Kalbas ista wakay in kapitan, sarig in mga polis, piyaanggat in mga katiwala, kamay idwa giyaroti angkataw in mga polis agkalimo piyamenglayan bato in mga mangyan.
[27] Paka piyarateng wa in dokalakiyan sa tiponan, siro piyataydek sa kagwaraan. Miplaong in mabwat pag poon sa mga sasirdoti
[28] keyen, Maloba taite kanyam piyagayaw in kamo agpatoldo agalapet in ngaran Isos, bago ngona in boo Irosalim kanyo wa piyaratengan ina pag barita. Osai kami kanyo siyombong keyen kami in agbono kay Isos.
[29] Kalbas Pidro meles, anggan in mga katiwala keyen, Osai in mangyan waget, osai in Diyos, in Diyos agbangen in kailangan kanyam piyagpaniwalaan.
[30] Isos kanyo piyako sa kodos, biyono. Kalbas siyo piyaboway wakay in Diyos, in Diyos in piyagmaal in kantam mga kakoyayan.
[31] Kalbas ngona Isos piyaonaik wa Diyos sa kansiyo agbangen pamalang. Siyo in agpapoon osai in agpamaboway, matang in mga kasokponan Israil kabaloy wa agbenglay in kansiro mga daet, matang liibangaw wa Diyos.
[32] Ina wa in kanyam piyagbarita, angkataw kanyam ngani atawanan ina totoo. Ina wa din in barita in Betek pag Abyan, in tiyaboy Diyos sa mga agpaniwala sa kansiyo.
[33] Paka karengey ina in mga poon agkagalit wano gayed, siro boo agkabono sa dokalakiyan.
[34] Kamay apo osai ka Parisiyo sa tiponan, in ngaran Gamalil. Siyo osai ka agpatoldo in mga Batas Diyos, siyo piyagmaal gayed in boo mga mangyan. Siyo tomaydek, agsogo keyen, In dokalakiyan palompoten ngonate.
[35] Kadogayte keyen, Laki mga kasokponan Israil, kantam remremen gayed maal no nakay in maal pangwaten sa dokalakiyan.
[36] Angkataw tangona apo mangyan piyagawit Tiyodas, siyo agyabang agpoon. Kalbas apo miyanggat sa kansiyo mga opat ka daan ka mangyan. Kalbas siyo biyono, kadogayte mandalagan wa in kansiyo mga mangyan, maidapo wa ina pag barkadaan.
[37] Kalbas sa betek piyagbilang in mga mangyan, apo kay mangyan piyagawit Odas, taga Galiliya, siyo din agpaakay sa mga mangyan. Kalbas siyo din biyono, mandalagan wakay din in kansiyo mga mangyan.
[38] Na ngona anda pag dokalakiyan ayaw wa agladowen. Bayansiyo, nangkataw no in kansiro remrem osai in kansiro mga piyagpangwat batang waget sa mga mangyan, na in kansiro panawen idbatay mibaloy.
[39] Kamay no batang sa Diyos, na kitam idbatay kapandaeg. No kataw ina na batay atawanan kitam aglaban sa Diyos.
[40] Kalbas in mga poon maniwala kay Gamalil. Biyerya wakay in dokalakiyan, biyogbog, yaayaw wakay agpatoldo sa kabaloyan Isos. Kalbas piyalpas wa in dokalakiyan.
[41] Siro lomabo wa sa tiponan, agkaanggay wa keyen, In Diyos agmaal sa kantam. Baina, kitam piyarikoy panawen kay Isos.
[42] Kalbas ibengibeng osai sa balay lakoy Diyos, osai sa mga balay, siro agaway agpatoldo, agbarita in Maal pag Barita keyen, Isos in Kiristo.