[1] In rateng wa ngani in ibeng piyagawit Pintikostis, in boo mga agpaniwala agkatipon sa osai ka balay.
[2] Kalbas toloy apo agaleng batang sa langit, kagwali kowaya lakoy lakonaw. Kamayba saano sa balay pagtiponan maloba in agaleng.
[3] Kalbas apo lomwas sa kansiro kagwali baya agdildila, omarabang, baatte mangyan yaaponan.
[4] Kalbas siro boo toloy wa piyakan in Betek pag Abyan, siro toloy agiplaong in roma wakay pag mga agiplaong, angkataw siro piyaiplaong in Abyan.
[5] Apo mga agbalay sa Irosalim mga Odyo datiyan agsamba, batang sa boo daan kobat.
[6] Kalbas in siro karengey ina pag aglalae, omarigbo asin in karowan, agkagolo in remrem angkataw baatte mangyan karengey kansiyo daan agiplaong.
[7] Kalbas siro boo agsoyo wano, agpaypolongan keyen, Nakay ina, yewed lames boo taga Galiliya ina pag mga agiplaongan?
[8] Na nakay batang lames kitam boo wanote karengey siro agiplaong wa sa kantam mga agiplaong?
[9] Kitam mga taga Partiya, mga taga Midya, mga taga Ilam, mga agbalay sa Misapotamya, sa Odiya, sa Kapadosya, sa Ponto, sa Asya,
[10] sa Pirigya osai sa Pampilya, sa Iipto, osai sa mga sakop Libya sa bangen bayan Sirini, osai mga batang sa Roma, mga Odyo, osai mga mibaloy wa Odyo,
[11] mga taga Kiriti osai mga taga Arabya. Na nakay batang kitam karengey sa kantam mga agiplaong siro agsabi in mga lakonaw pag piyangwat Diyos?
[12] Kalbas siro boo agsoyo, osai magolo in remrem, agpanggisodan anggan keyen, Nakay lames in beet siyabi ina?
[13] Kamay in amat wakay agpatawa keyen, Siro mga lasing waget.
[14] Kalbas tomaydek kora Pidro, siro in labing dowai ka katiwala. Pidro miplaong maksen sa karowan mangyan keyen, Laki mga kabelagan, osai kamo boo mga agbalay sa Irosalim, ngona ako agpaliwanag in beet siyabi. Mamarengey sa kangay piyagsabi,
[15] angkataw anda pag mga mangyan yewed mga lasing kataw in kanyo piyagpanremrem, angkataw pangitlogan waget in ibeng.
[16] Anda dayem in siyabi tangona in poropita Owil keyen,
[17] In Diyos keyen, Anda in kangay batay piyagpangwat. Sa kalobosan pag mga ibeng in boo mga mangyan batay piyakan in kangay Abyan. Na in kanyo mga bodang batay agpalowas in kangay agiplaong, in kanyo mga begle batay agkaanapen, in kanyo mga aplaki batay din manaynep.
[18] Asin pag mga ibeng in kangay mga sogowan kaliyakiyan osai kagbaiyan batay piyakan kangay Abyan, na siro batay agpalowas in kangay agiplaong.
[19] Kalbas ako batay agpapangkit in mga makalimo sa langit, mga makasoyo sa kobat, daya, osai baya, osai elep aglibo.
[20] In ibeng batay kiyelep, in bolan batay mapola idwa mayadi kagwali daya. Paka kataw ina, na batay wa rateng in Ibeng in Kapwan, in ibeng lakoy makasoyo.
[21] Na batay piyaboway in baatte agberya sa Kapwan.
[22] Keyen kay Pidro, Laki mga kabelagan, mamarengey sa kangay piyagsabi. Isos taga Nasarit siyogo Diyos. Kaya kitam katawan, angkataw siyo apo lakoy kabaloyan agpangwat tanda, mga makasoyo. In Diyos in agpangwat, Isos in sogowan. Ina kantam atawanan angkataw ina kantam daan ngiitan.
[23] Kamay in Diyos apo tangona remrem, kansiyo atawanan in batay mibaloy. Kalbas ina mibaloy ngani in Isos tiyaboy sa kanyo, kalbas kanyo tiyaboy sa mga daeten pag mangyan, kanyo piyabono, piyapako sa kodos.
[24] Kalbas siyo piyaboway wakay Diyos, piyalpas wa sa kabaloyan katayan, angkataw idwa mayadi siyo piyagbakos in katayan.
[25] Angkataw siyo in biyarita Dabid keyen, Kangay ngiitan baatte sa bangen kangay in Kapwan. Siyo kangay sarig matang ako idbatay apaglebey.
[26] Panawen ina din agkaanggay in kangay bait, agkaanggay in kangay agiplaong. Anggan in kangay bilog agkaanggay agpanaya.
[27] Angkataw in kangay abiyan idbatay kaimo biyenglay sa pagbalayan in mga matay. Kaimo batay piyagayaw mabolok in bilog kaimo Betek pag Sogowan.
[28] Kaimo piyatoldo sa kangay in mga padalan ako batay agkaboway. Kaya ako batay agkaanggay wano, angkataw kao in kangay sarig.
[29] Pidro keyen kay, Laki mga belag, tiyak in kangay piyagsabi sa kanyo panawen sa kantam tangona kakoyayan Dabid. Siyo matay, siyangat, in kansiyo sangatan baywi kay atai sa kantam anggan ngona.
[30] Kamay Dabid osai ka poropita. Siyo katawan in Diyos mangako sa kansiyo keyen, In osai sa kaimo mga kasokponan dogayan batay agpoon sa kaimo sakopan.
[31] Ngiitan Dabid in batay piyangwat Diyos in Kiristo batay wakay piyaboway. Ina in dailan kaya kansiyo siyabi ina pag kasokponan idbatay biyenglay sa pagbalayan mga matay, in kansiyo bilog yewed piyayagan mabolok.
[32] Ina wa daan Isos in piyaboway wakay Diyos, kami boo kangitan wakay.
[33] Ngona siyo piyaonaik sa pamalang agbangen Diyos kansiyo Amang. Tangona Siyo piyakan in Betek pag Abyan in piyangako in Amang. Kalbas ngona ina kansiyo wakay tiyaboy sa kanyam. Siyo in agpangwat in kanyo ngona piyagngitan, kanyo piyagparengey.
[34] Dabid yewed monaik sa langit kataw Isos, kamay siyo daan in agsabi keyen, Siyabi in Diyos sa kangay Kapwan keyen, Kao tomokkaw sa kangay pamalang,
[35] anggan kangay wa piyasakop sa kaimo in mga agkabais sa kaimo.
[36] Na kailangan ngani atawanan in boo mga kasokponan Israil keyen ina daan pag Isos in kanyo piyako sa kodos, siyo wa daan piyangwat ngani Diyos in Kapwan osai Kiristo.
[37] Kalbas paka in mga mangyan karengey ina, siro maloba wa abiyatan in remrem, agsabi kay Pidro osai sa mga amat katiwala keyen, Na laki mga belag, kami nangkataw wa?
[38] Kalbas keyen Pidro, Kailangan baatte osai sa kanyo benglayen wa in kanyo mga daet. Kalbas pabaotismo wa sa ngaran IsoKiristo, matang liibangaw wa in kanyo mga daet. Na kamo batay wa din piyakan in Betek pag Abyan.
[39] Angkataw ina piyangako Diyos sa kantam boo, osai sa kantam mga kasokponan, anggan sa boo mga mangyan, kamayba sa nakay in piyagberya in Kapwan, in kantam Diyos.
[40] Kalbas Pidro aronaw kay siyabi sa kansiro, agpilit keyen, Kamo pasoway wa matang yewed piyarosa sarig in ngona pag mga Odyo mga daeten.
[41] Ina pag ibeng mga tolo ka libo ka mangyan maniwala sa kansiyo siyabi, biyaotismowan wa, mipaagem sa barkadaan mga agpaniwala.
[42] In mga agpaniwala baatte agparengey sa mga katiwala agpatoldo, agpaybelagan, agpalbagiyan pamangnen, osai agpaysipandalanginan.
[43] In mga katiwala agpangwat lakoy aronaw mga makasoyo. Kalbas in boo mga mangyan agsoyo.
[44] In boo mga maniwala agpaysarigan, piyalageman in kansiro boo sangkap.
[45] Kalbas in kansiro ogali siro agpabili kansiro mga sangkap, in abel kowarta biyagi sa boo mga agpaniwala no nangkalakoy in piyagkailangan in baatte osai.
[46] Ibengibeng siro agkatipon sa balay lakoy Diyos, agpalbagiyan pamangnen sa mga balay. Siro agpalpamangan, agkaanggay ngani agpalbagiyan.
[47] Siro agmaal sa Diyos, osai siro piyagmaal in boo mga mangyan. Ibengibeng in barkadaan piyagdagdagan in Kapwan in kansiyo mga piyagpaboway.