[1] Paka kalbas wa ina Pablo panaw wa sa Atinas, pataboy sa bayan Korinto.
[2] Siyo katagbo asin Odyo, in ngaran Akwila, tangona taga Ponto, osai kansiyo babai, in ngaran Pirisila. Ngona siro bayo kay rateng batang sa kobat lakoy Italya, angkataw in boo mga Odyo sa bayan Roma piyamoyaw Kalaodyo in poon lakoy asin. Kalbas Pablo agpasabangen sa kansiro.
[3] Osai Pablo osai kora Akwila, osai waget in anap boway, in agpangwat torda, matang siyo agpamataw sa kansiro, siro agpalpamanawen.
[4] Baatte Ibeng Pamainga Pablo sa balay pagpaniponan mga Odyo agmatiwid agpilit sa mga Odyo, osai sa mga yewed Odyo.
[5] Paka rateng wa Silas osai Timotiyo batang sa Masidonya, Pablo idwa katokor aganap boway, angkataw ibengibeng siyo agpatoldo waget sa mga Odyo keyen, Totoo ngani Isos in Kiristo.
[6] Kamay Pablo piyaglabanan in mga Odyo, piyaglibak. Kalbas siyo agpigpig kansiyo damit keyen, Piyawa, no kamo yewed piyaboway na sa kanyo agbangen in daet, yewed sa kangay. Sogod ngona ako batay wa sa mga yewed Odyo.
[7] Kalbas siyo panaw wa sa kansiro, pataboy sa balay Tisiyo Osto, osai ka datiyan agsamba sa Diyos. Ina pag balay sa bangen gayed in balay pagpaniponan mga Odyo.
[8] In ngaran in poon sa balay pagpaniponan Kirispo. Siyo maniwala wa sa Kapwan, kadayo in boo kansiyo mga kamalay. In mga taga Korinto, aronaw in agparengey kay Pablo, aronaw in maniwala, kalbas biyaotismowan.
[9] Osai ka yabi Pablo manainep, in Kapwan miplaong sa kansiyo keyen, Ayaw agkalimo miplaong, ayaw agempet,
[10] angkataw ako in kaimo sarig. Idapo batay agpangwat daet sa kaimo. Angkataw in kangay mga mangyan atai pag bayan aronaw.
[11] Matang Pablo asin agpamataw osai ka dagon kalaati, agpatoldo sa kansiro in agiplaong Diyos.
[12] Kamay in betek Galyon piyangwat in gobirnador sa kobat Akaya, in mga Odyo malpanonggab kay Pablo. Siyo biyaba sa mga poon,
[13] keyen, Anda pag lalaki agpamaakay sa mga mangyan agsamba sa Diyos, bago piyagayaw sa mga batas in kataw ina pag agsamba.
[14] Pablo batay nges miplaong, kamay tokaw miplaong Galyon keyen, Kamo mga Odyo, ai. No karai agpangwat ngani daet, no manampalas, na in maal nges ako agaway kay agparengey sa kanyo.
[15] Kamay no in sombong panawen waget sa mga agiplaong, mga waget ngaran sa kanyo mga Batas, na kamo wa in baala. Ako ayaw wa agtanongen asin pag mga kataw ina.
[16] Kalbas siro kansiyo piyamoyaw sa tiponan.
[17] Kalbas kansiro wakay siyonggaban Sosinis, siyo in poon sa balay pagpaniponan mga Odyo, kansiro biyogbog sa pangkit in mga poon, kamay Galyon idwa agkalawagen asin.
[18] Kalbas Pablo dogay kayte asin agpamataw sa Korinto, kalbas agpamaalam sa mga belag, somakay sa parkado, pataboy sa Siriya. Miyanggat kora Pirisila osai Akwila. Paka rateng sa bayan Singkiriya, Pablo pagopit kansiyo abok, angkataw mibaloy wa in kansiyo osai ka pangako sa Diyos.
[19] Rateng wakay sa Ipiso. (No isag Pablo agipanaw wakay asin na in taybalang mataw wa.) Siyo misoroy sa balay pagpaniponan agpalpamatiwidan osai in mga Odyo.
[20] In kansiro beet siyo dogay kayte agpamataw asin, kamay siyo dayo.
[21] In siyo agsakay batay wa panaw sa Ipiso, siyo miplaong keyen, Ako agipanaw wa. No beet in Diyos ako atai wakay moli, na ako atai wakay. Kalbas panaw wa.
[22] Paka rateng sa Sisariya, Pablo monaker wa, pataboy wa sa Irosalim, manggisodan ista sa barkadaan mga bodang Diyos. Kalbas mongali wakay, pataboy sa Antiyokya.
[23] Siyo dogay kayte asin agpamataw. Kalbas panaw wakay, domalan sa mga bayan sa kobat Galasya, kadayo sa kobat Pirigya, agsabi in mga agpakaeyat sa remrem sa mga agpaniwala.
[24] Osai ka Odyo rateng sa Ipiso, in ngaran Apolos. Siyo taga Aliyanriya, maalen in kansiyo agiplaong osai lakonaw in kansiyo atawanan sa mga Agisolat.
[25] Siyo batang piyaadar sa adar keyen Isos in Kapwan, kalbas agkasadapan agbarita sa mga amat. In kansiyo piyagpatoldo in barita Isos boo betek, kamay in kansiyo atawanan agbaotismo kataw waget in piyatoldo Owan.
[26] Siyo yewed agkalimo agpatoldo sa balay pagpaniponan in mga Odyo. Taybalang Pirisila osai Akwila karengey kansiyo agiplaong. Kalbas Apolos piyagpaanggat, in kansiyo atawanan mga ogali Diyos diyagdagan in taybalang.
[27] Siyo beet pataboy sa kobat Akaya. In mga belag keyen, Dali. Kalbas siro agsolat sa mga barkadaan mga bodang Diyos ista, keyen, Apolos pabelagen wa. Paka rateng sa Akaya, siyo agtolong lakoy sa mga piyagpakayawte Diyos, sa mga agpaniwala ista,
[28] angkataw siro kangitan in kansiyo lakoy matiwid agpandaeg ngani sa mga Odyo. Kansiyo piyagpaliwanag in beet siyabi in mga Agisolat keyen, Isos ngani in Kiristo.