[1] Paka kadalan tolo ka ibeng sogod in Pisto rateng sa kobat kansiyo batay pagsakopan, siyo panaw wa sa Sisariya pataboy sa Irosalim.
[2] Ista Pablo siyombong kay Pisto in mga poon sasirdoti, osai in mga koyay sa mga Odyo.
[3] Kansiro piilit sa gobirnador keyen, No kao mabait sa kanyam na Pablo atai babaen sa Irosalim. Kamay siro apo polong Pablo elegen sa dalan, bonowen.
[4] Keyen wakay Pisto, Pablo piyagbilanggo sa Sisariya. Kalbas ako batay wa din agoli ista.
[5] Na miyanggat wa sa kangay in kanyo mga koyay. Kalbas ista wa osapen ina pag mangyan no siyo apo piyangwat daet.
[6] Pisto mataw sa Irosalim walo kay ka ibeng no yewed sampo bayo moli sa Sisariya. Paka goribas siyo tomokkaw sa pagpangosapan, agsogo keyen, Pablo atai babaen.
[7] Paka rateng Pablo siyo riibok in mga Odyo batang sa Irosalim. Aronaw in kansiro mga piyalowas mga maloba pag sombong sa kansiyo, kamay siro idapo piyalowas patonay sa kansiro mga siyabi.
[8] Kalbas miplaong Pablo keyen, Ako idapo piyangwat daet sa mga Batas in mga Odyo, kamayba sa balay lakoy Diyos, kamayba din kay Poon Lakoy Sisar.
[9] Pisto beet kiyaanggayan in mga Odyo matang kansiyo siyabi kay Pablo keyen, Kao lames beet pataboy sa Irosalim matang kao ista kangay osapen panawen asin pag mga sombong?
[10] Keyen wakay Pablo, Ako atai piyagosap sa kabaloyan Poon Lakoy Sisar. Kailangan atai wa ako osapen. Ako idapo piyangwat daet sa mga Odyo. Ina kaimo daan ngani atawanan.
[11] No ako apo somala sa batas, agpangwat kamayba nakay pag daet sibay bonowen na ako idbatay agayaw. Kamay no yewed mga totoo in kansiro mga pasaen sa kangay, na ako yewed mayadi tiyaboy sa kansiro. Ako paadapen kay Poon Lakoy Sisar angkataw ako liista taga Roma.
[12] Pisto papolong sa kansiyo mga konsiyal. Paka kalbas keyen, Kataw kaimo siyabi kao paadapen kay Poon Lakoy Sisar, na kao ista batay biyaba sa kansiyo.
[13] Paka dogay wakay, in poon lakoy asin pag kobat in ngaran Agripa, siro rateng sa Sisariya osai kansiyo babai in ngaran Birnisi. Siro agpabelag kay Pisto.
[14] In siro dogay kayte ista agpamataw giisod Pisto kay Agripa in osap taite kay Pablo. Kansiyo siyabi keyen, Apo atai osai ka kaliyakiyan biyaliwan Pilis sa bilanggowan.
[15] In ako taite sa Irosalim siyo siyombong sa kangay in mga poon sasirdoti osai in mga koyay mga Odyo. Kansiro yaayay siyo parosaen.
[16] Kamay kangay siyabi sa kansiro keyen yewed ogali in mga taga Roma in agparosa sa mangyan siyombong no yewed kay maltagbo osai in siyombong osai in agsombong, matang in siyombong kaiplaong no nangkataw in siyabi panawen sa pasaen.
[17] Matang paka siro atai wa rateng ako yewed aglimbang. Kagoribasan wa daan ako tomokkaw sa pagpanokkawan tanongan, Pablo kangay wa piyaadap sa osap.
[18] In kangay remrem karam in kansiro batay sombong lakonaw pag daet, kamay paka miplaong in mga agsombong na yewed mana lakonaw.
[19] In kansiro waget piyagpalsisagotan in panawen waget sa kansiro piyagpaniwalaan, osai panawen sa osai ka mangyan in ngaran Isos. Ina pag mangyan matay wa, kamay piyagrigen Pablo keyen siyo agkaboway.
[20] Kalbas yewed kangay atawanan no nangkataw in pangwaten sa mga kataw ina, matang kangay tiyanong kay Pablo no siyo beet pataboy sa Irosalim matang ista wa osapen.
[21] Kamay kay Pablo yaayay keyen siyo damayen kay atai, paadapen kay Poon Lakoy Sisar. Matang kangay siyogo keyen damayen kay anggan kangay wa piyagpababa kay Sisar.
[22] Siyabi wakay Agripa kay Pisto keyen, Ako din nges agkaparengey in kay Pablo agiplaongan. Keyen wakay Pisto, Na goribas wa kao agparengey.
[23] Paka goribas lomwas wakay Agripa, osai Birnisi, misoroy wa sa balay pagpangosapan, agyanggat in mga mabwat pag mga kapitan sondalo, osai in lakonaw pag mga mangyan asin pag bayan. Siro boo agmaal kay Agripa. Pisto agsogo, kalbas Pablo piyaadap.
[24] Kalbas keyen Pisto, Poon Lakoy Agripa, osai kamo in boo mga atai, anda wa Pablo in kaliyakiyan siyombong sa kangay in boo mga Odyo. Kamayba atai kamayba sa Irosalim siro agpango keyen idwa maal siyo boway.
[25] Kamay ako idapo atawanan dailan matang siyo bonowen. Kamay kataw kansiyo yaayay siyo paadapen kay Poon Lakoy Sisar, na kangay remrem siyo kangay piyagpababa ista.
[26] Kamay ako yewed katawan no nakay in batay kangay siyabi sa solat kay Sisar lakoy panawen asin pag mangyan. Na ina in dailan kaya siyo kangay piyaadap sa kanyo, labi kayno gayed sa kaimo, laki poon lakoy Agripa, matang paka kalbas siyo kaimo biyotog, na ako apo wa batay asabi sa solat.
[27] Kataw kangay remrem yewed mayadi piyababa ista in osai ka piyagbilanggo no yewed siyabi sa solat in mga sombong panawen sa kansiyo.