[1] Sa bayan Sisariya apo mangyan yewed Odyo, in ngaran Kornilyo. Siyo kapitan osai ka daan ka sondalo, sakop sa barkadaan mga sondalo piyagawit Barkadaan taga Italya.
[2] Siyo agpansamba sa Diyos, agmaal sa Diyos, osai in boo kansiyo mga kamalay. Siyo baatte agtolong sa maidap pag mga Odyo, osai mapret agpandalangin sa Diyos.
[3] Mangiriyan wa in ibeng siyo agkaanapen, kansiyo wa gayed ngiitan misoroy sa kansiyo balay osai ka angil batang sa Diyos. Keyen in angil, Laki Kornilyo.
[4] Kornilyo alimowan, agterek sa angil keyen, Nakay, Laki? Keyen in angil, In kaimo mga pandalangin makaanggay sa Diyos, osai in kao agtolong sa mga maidap.
[5] Ngona kao agsogo mga mangyan sa Oppi, atai paanggaten Simon in piyagawit din Pidro.
[6] Siyo agpamataw sa balay Simon, in agpakapya balat ayop, in balay sa balabaan dagat.
[7] Paka in angil kalbas agiplaong siyo panaw wa. Kalbas Kornilyo agberya sa dowai ka sogowan, in katolo sondalo. In sondalo kay Kornilyo katolong, agsamba din sa Diyos.
[8] Kalbas Kornilyo agbarita sa kansiro in barita angil, kalbas siro siyogo wa sa Oppi.
[9] Goribas wa tangali siro agipanaw kay agkabangen wa rateng sa bayan Oppi, Pidro monaik wa sa ogbos balay sa atep agipatag, batay agpandalangin.
[10] Kalbas siyo agkayawes wa, beet wa mamangan. Piyagtongtong kay in pamangnen siyo agkaanapen,
[11] kangitan maboswang in langit, apo piyagpalooy teem lakoy piyageket sa opat ka sokol, piyagparateng sa diya.
[12] In galem karowan, kamayba nakay in mga agipanawan, in mga aginanapan, in mga agilayogan.
[13] Kalbas apo miplaong keyen, Laki Pidro, miyorog wa, agbono wa, mamangan wa.
[14] Kamay Pidro keyen, Ablayan, laki Kapwan. Ako idbatang mamangan in sa mga Odyo piyagawit keyen piyagayaw.
[15] Kalbas tagoli wakay miplaong keyen, In liinis wa Diyos, ayaw kaimo agawiten keyen piyagayaw.
[16] Anggan makatolo mipangwat kataw ina, kalbas giyoyod wakay sa langit in teem.
[17] Kadogayte in Pidro agremrem kay keyen, Nakay lames in beet siyabi ina in kangay ngiitan, rateng wa in mga siyogo Kornilyo. Siro piyatoldo wa kay Simon balay, agtaydek wa sa sakbawan,
[18] agberya keyen, Atai lames apo mangyan agpamataw in ngaran Simon, piyagawit din Pidro?
[19] Pidro agpanremrem kay in beet siyabi kansiyo ngiitan, kalbas miplaong in Abyan Diyos sa kansiyo keyen, Baina wa, tolo ka mangyan, kao piyagpamangkit.
[20] Dali wa, lomabo wa, kao miyanggat wa. Ayaw manremrem, ako dayem in agsogo sa kansiro.
[21] Lomabo ngani Pidro, pataboy sa dokalakiyan keyen, Ako in kanyo piyagpamangkit. Nakay in kanyo panawen sa kangay?
[22] Siro keyen, Kami piyagsogo Kornilyo. Siyo kapitan mga sondalo, maalno pag mangyan, agmaal sa Diyos, siyo piyagmaal din in boo mga Odyo. Siyo siyogo osai ka angil batang sa Diyos keyen, Pidro pataboyen atai, mamarengey sa kansiyo barita.
[23] Kalbas siro piyaonaik wa Pidro sa balay, piyaesek wa asin. Paka ibeng wakay panaw wa, siro maysarigan wa. Apo din miyanggat mga belag agpaniwala taga Oppi.
[24] Goribas wakay kora Pidro rateng wa sa Sisariya. Kornilyo agpanaya sa kansiyo kadayo in kansiyo mga kabelagan osai in kansiyo mga pagbelag gayed, angkataw siro kansiyo biyerya keyen, Matipon wa, agrateng wa dokalakiyan Pidro.
[25] Paka Pidro agrateng wa, Kornilyo toloy patagbo, patalegeb sa bangen kay Pidro bitis, agmaal sa kansiyo.
[26] Kamay siyo kay Pidro toloy yoorog keyen, Tomaydek kao, ako beken mangyan waget din.
[27] Siro agpanggisodan kay misoroy wa sa balay, aronaw ngani mangyan agkatipon wa.
[28] Kalbas Pidro miplaong sa kansiro keyen, Kamo katawan in mga Odyo piyagayaw agyanggat, piyagayaw misoroy sa balay yewed Odyo. Kamay siyabi in Diyos sa kangay keyen kamayba nakay pag mangyan ayaw agawiten keyen piyagayaw.
[29] Matang ngani in ako piyagpaanggat, ako yewed manremrem, ako toloy miyanggat. Na nakay wa in kanyo kailangan sa kangay?
[30] Kalbas keyen Kornilyo, Ngona in kaopat ka ibeng, kataw ngona mangiriyan in ibeng, ako atai sa balay, agpandalangin. Kalbas toloy lomwas mangyan sa kangay bangen, makasolap in lambong, maboksi.
[31] Miplaong keyen, Laki Kornilyo, in kaimo pandalangin makaanggay sa Diyos, osai in kao agtolong sa mga maidap.
[32] Na kao agsogo sa Oppi, atai pataboyen Simon in piyagawit din Pidro. Siyo agpamataw sa balay Simon in agpakapya balat ayop, in balay sa balabaan dagat.
[33] Kalbas toloy ngani ako agsogo komwa sa kaimo. Kalbas salamat ngani sa kaimo, laki, kao rateng atai. Kaya ngona kami boo atai sa pangkit Diyos, matang agparengey sa kaimo in boo agiplaong Diyos.
[34] Kalbas Pidro miplaong keyen, Ngona wa ngani ako katawan in Diyos yewed agpangidang sa mga mangyan.
[35] Kamayba nakay pag mga mangyan, no siyo agmaal sa Diyos osai agpangwat in betek, na siyo piyagpabodang Diyos.
[36] Kanyo atawanan in agiplaong Diyos piyababa sa mga kasokponan Israil, in Maal pag Barita keyen, IsoKiristo in agpakapya, siyo in Kapwan sa boo.
[37] Kanyo din atawanan in lakonaw pag mibaloy atai sa boo kobat in mga kasokponan Israil, agparakay sa Galiliya in Owan agpatoldo osai agbaotismo sa mga mangyan.
[38] In kangay beet siyabi Isos taga Nasarit piyakan Diyos in Betek pag Abyan, osai kabaloyan. Siyo agipanawan, agpangwat maal, agpaoraw sa boo piyagpaidapan in diyablo, angkataw in Diyos agyanggat sa kansiyo.
[39] Kami kangitan in boo kansiyo piyangwat sa kobat mga Odyo, anggan sa Irosalim. Kalbas siyo biyono, piyako sa kodos,
[40] kamay sa katolo ka ibeng siyo yoorog wakay Diyos, piyapangkit wakay,
[41] yewed sa boo mangyan, dayem sa kanyam, kami waget in iidang Diyos matang kangitan. Paka siyo miyorog wakay batang wa matay, siyo mamangan pamangnen, kanyam kalanglang.
[42] Kami kansiyo siyogo agbarita sa mga mangyan, osai agpatoldo keyen siyo piyangwat Diyos tanongan, kadayo sa mga agkaboway kay, kadayo sa mga matay wa.
[43] Siyo in piyagpanggisodan in boo mga poropita keyen, Kamayba nakay in agpasandig sa kansiyo, na in kansiyo mga daet piyaglibangaw sa kabaloyan Isos.
[44] Pidro agiplaongan kay, in boo agparengey sa piyagpatoldo toloy wa riyatengan in Betek pag Abyan.
[45] In mga agpaniwala in miyanggat kay Pidro, siro mga Odyo. Kalbas siro agsoyo keyen kadayo mana yewed mga Odyo piyakan din Diyos in Betek pag Abyan.
[46] Baina, siro agiplaongan sa yewed kansiro agiplaong agmaal sa Diyos. Kalbas miplaong Pidro
[47] keyen, Nakay mga laki? Apo lames agayaw agbaotismo atai pag mga mangyan? Baina, siro piyakan in Betek pag Abyan, kataw daan kitam tangona.
[48] Kalbas kansiyo siyogo keyen, Siro baotismowen wa sa ngaran IsoKiristo. Kalbas siro keyen, Laki Pidro, kao dogay kayte mamataw atai.