[1] Asin pag betek in poon lakoy Irodis agparakay agpaidap sa kalaati sa barkadaan mga bodang Diyos.
[2] Kansiyo piyapogot Santiyago, in kay Owan belag.
[3] Kalbas kansiyo ngiitan ina makaanggay sa mga Odyo, matang sa betek piyasta in agkoman tinapay idapo pamaistobo, Pidro din kansiyo diyakep,
[4] piyabilanggo, in agdamay labing enem ka sondalo, siro agpaypalitan baatte opat. In remrem Irodis no kalbas wa in Paskowa, na Pidro batay piyagosap sa pangkit in mga mangyan,
[5] matang Pidro sa bilanggowan kay piyagdamay. Kamay siyo piyagpandalangin gayedte sa Diyos in mga agpaniwala.
[6] Paka in remrem Irodis goribas wa in Pidro piyagpalowas sa mga mangyan. Kamay ina pag yabi Pidro agesek, piyageket karakara sa dowai ka sondalo, sa awak sakbawan apo din mga agdamay sa bilanggowan.
[7] Kalbas toloy lomwas osai ka angil batang sa Kapwan, agrawa in galem bilanggowan. Pidro diyekse sa tagyang, piyolaw keyen, Miyorog wa, ayaw agpabeya. Kalbas toloy malabo in mga karakara sa kansiyo bakwaw.
[8] Keyen in angil, Aglambong wa, soroyen wa in tapatos. Kalbas siyoroy. Keyen, Agislen wa, kao miyanggat wa sa kangay.
[9] Lomabo ngani Pidro, miyanggat. Siyo keyen siyo agkaanapen waget, karam yewed totoo in piyagpangwat in angil.
[10] Siro lomawey sa osai ka agdamay, kalbas sa kadowai anggan rateng sa sakbawan piyagbengbeng bakal, no lampas asin na bayan wa. Mabolwat lakoy in sakbawan siyo wakayte. Siro komislot wa, gomisod sa osai ka dalan, kalbas Pidro toloy wa biyaliwan in angil.
[11] Kalbas Pidro bayo katawan keyen totoo wa ngani, in angil siyogo in Kapwan, matang siyo piyalpas wa sa kabaloyan Irodis, osai sa boo piyagpanaya in mga Odyo.
[12] Paka Pidro katawan wa ina, siyo pataboy sa balay Mariya inang Owan Markos. Asin aronaw agkatipon, agpandalangin.
[13] Kalbas siyo agtoktok sa sakbawan lakoy. Apo sogowan daraga in ngaran Roda, asin pataboy batay agbolwat.
[14] In kansiyo piyarengey kay Pidro agiplaong, siyo agkaanggay, anggayan wa gayed, anggan toloy domalagan sa galem balay, ikkay biyolwat in sakbawan. Siyo keyen, Asina wa Pidro sa sakbawan lakoy.
[15] Keyen in mga mangyan, Kao agkapayagan. Kamay Roda agpilit keyen, Apo ngani. Siro keyen, In angil waget, in agalapet sa kansi yo.
[16] Kamay Pidro agaway agtoktok. Kalbas kansiro biyolwat in sakbawan, piyangkit, Pidro mana ngani. Siro agsoyo.
[17] Kamay kay Pidro solo piyabetek sa bibi in beet siyabi keyen, Ayaw aglalae. Kalbas kansiyo giisod in padalan no nangkataw siyo piyalpas in Kapwan sa bilanggowan. Kalbas keyen, Kanyo wa sabiyen kay Santiyago, osai sa amat kay mga belag. Kalbas siyo panaw wa, ista pataboy sa osai wakay ka kobat.
[18] Paka ibeng wa, magolo wano in mga sondalo agdamay keyen, Saano wa Pidro?
[19] Irodis agpapamangkit kay Pidro, idapo ngiitan. Kalbas kansiyo yoosap in mga agdamay, piyabono. Kalbas Irodis panaw wa sa Odiya, pataboy sa Sisariya, mataw wa asin.
[20] Irodis agkagalit wano sa mga taga Tiro, osai sa mga taga Sidon. Kalbas siro maypolongan pataboy kay Irodis, matang piyasarigan Balasto, in kay Irodis katiwala. Siro batay agdaing kay Irodis angkataw sa kansiro kobat idapo pamangnen no yewed in batang daan sa kobat Irodis.
[21] Paka sa tarato pag ibeng Irodis agsoroy kansiyo damit, maal wano pag damit, tomokkaw sa pagpanokkawan poon lakoy, kalbas agiplaong sa kansiro.
[22] Kalbas in mga mangyan agiplaong maksen keyen, Ina yewed mangyan, ina in agiplaongan osai ka diyos.
[23] Irodis toloy wa piyakaskitan osai ka angil batang sa Kapwan, angkataw yewed piyagpakalakonaw in Diyos, siyo yeeyang, bayo matay wa.
[24] Kamay labi kay karowan mangyan in karengey in agiplaong Diyos, aronaw wa in maniwala.
[25] Kalbas dokalaki Birnabi osai Saolo, paka mibaloy wa in kansiro panawen sa Irosalim, siro moli wakay sa Antiyokya. Kansiro piyaanggat Owan Markos.