[1] Pablo osai Silas domalan sa mga bayan Ampipolis osai Apolonya, rateng sa bayan Tisalonika. In mga Odyo asin apo balay pagpaniponan,
[2] kalbas Pablo misoroy, angkataw ina kansiyo ogali. Tolo ka Ibeng Pamainga siyo osai in mga mangyan, kansiro piyagpolong in mga Agisolat.
[3] Pablo agpaliwanag in mga beet siyabi keyen, Atai pag mga Agisolat kantam piyagngitan kailangan ngani in Kiristo piyaidap, matay, kalbas miyorog wakay. Isos in kangay ngona piyagbarita sa kanyo, siyo in Kiristo.
[4] Kalbas in amat piyamaakay, miyanggat kay Pablo, osai kay Silas, kadayo din in mga yewed Odyo datiyan agsamba aronaw, kadayo mga mabwat pag kagbaiyan, aronaw din.
[5] Kamay in mga Odyo agpanagiri. Siro agpaanggat mga daet pag mangyan batang sa palingki, agpatipon karowan, agpanggolo sa bayan. Kalbas kiyaig in kay Ason balay, agpamangkit kay dokalaki Pablo, batay nges biyaba sa karowan,
[6] kamay in dokalaki idapo asin. Kalbas Ason wa in diyakep, osai in mga amat kay agpaniwala, giyoyod sa mga poon bayan, agiplaong maksen keyen, Ina pag dokalaki Pablo agpagolo sa boo kobat, rateng wa din atai sa kantam bayan,
[7] osai Ason agpabelag sa kansiro. Siro boo dayo maniwala sa kay Sisar mga batas. Siro keyen apo osai wakay ka poon, in ngaran Isos.
[8] Paka karengey ina, in mga mangyan agkariyaban, kadayo in mga poon.
[9] Paka kora Ason agbayad wa in kowarta pampalpas, na siro piyalpas wa.
[10] Yabi wa in dokalaki Pablo toloy piyapanaw in mga belag siyogo sa bayan Biriya. Paka rateng wa, siro misoroy sa balay pagpaniponan mga Odyo.
[11] In mga Odyo, osai sa Tisalonika, osai sa Biriya, in sa Biriya agbangen in maal in remrem, angkataw siro agkaanggay agparengey sa barita. Ibengibeng siro agpamangkit sa mga Agisolat no ngani betek in piyagsabi Pablo,
[12] matang aronaw in maniwala, aronaw din mga yewed Odyo maniwala, mga kaliyakiyan, mga mabwat pag kagbaiyan.
[13] Kamay in mga Odyo sa Tisalonika abaritaan keyen, Sa Biriya din Pablo agpatoldo in siyo keyen agiplaong Diyos. Kalbas siro ista pataboy, agpamaakay agpanggolo sa karowan.
[14] Kalbas Pablo toloy wa piyapanaw in mga belag, pataboy sa balabaan dagat. Kamay Silas mataw kay asin, osai Timotiyo.
[15] Pablo tiyonton kansiyo mga sarig anggan sa bayan Atinas. Kalbas in mga sarig moli wakay, agbaba barita kay Silas osai kay Timotiyo keyen, Mga laki, kamo piyagpanaya Pablo sa Atinas. Ayaw wa agpabeya.
[16] In Pablo sa Atinas agpanaya kay dokalaki Silas osai Timotiyo, kansiyo remrem malingetnget, angkataw kansiyo ngiitan in mga yewed Diyos asin pag bayan aronaw wano.
[17] Sa balay pagpaniponan mga Odyo siyo agpanggisodan osai in mga Odyo, osai in yewed Odyo pag mga agsamba. Ibengibeng siyo sa palingki agpanggisodan, kamayba nakay in kansiyo atagbo asin.
[18] Siyo agpalmatiwidan osai in mga agpatoldo in adar Ipikoros, osai in mga piyagawit Istowiko pag agpatoldo. In amat keyen, Nakay in piyagsabi ina pag agyabang agpanggisodan waget? In amat wakay keyen, Tomag siyo agpatoldo osai wakay ka mga diyos, in osai kansiyo piyagawit Isos, in osai kansiyo piyagawit Boway wakay.
[19] Matang siyo piyaanggat sa tiponan piyagawit Ariyopago, keyen, Amba, kami patoldowen in bayo pag adar kaimo piyagpanggisodan.
[20] Angkataw in kaimo piyagsabi bayo wakay sa kanyam, matang ngani kami beet nges katawan in beet siyabi ina.
[21] Siro in boo mga taga Atinas, osai in mga taga amat kobat agbalay asin, siro baatte agpatoldo osai agparengey kamayba nakay pag barita in bayo.
[22] Kalbas Pablo tomaydek sa kagwaraan in tiponan keyen, Laki mga taga Atinas, in kangay atawanan kamo maloba agsamba sa boote.
[23] Angkataw in ako agipanawan, kangay ngiitan kanyo mga piyagsambaan. Apo din ngiitan osai ka piyagsambaan apo solat keyen, Sa Diyos yewed atawanan. Na ina pag Diyos in kanyo piyagsamba kamayba yewed kanyo atawanan, ina in kangay piyagpatoldo sa kanyo.
[24] In Diyos in agpangwat in kobat, anggan in boo asin, siyo din in Kapwan langit, Kapwan din kobat, siyo yewed agbalay sa mga balay piyangwat waget mangyan,
[25] siyo yewed piyagtolong mangyan, siyo idapo kailangan sa kantam, angkataw siyo daan in agpakan payeng sa boo mangyan, agtaboy boway, in boote siyo in agtaboy.
[26] In boo mga mangyan kansiyo piyangwat batang osai waget ka bilog mangyan, matang kitam agbalay sa boo kobat. Siyo in agsabi no nangkadogay kitam agkaboway, osai no saano in kantam mga pagbalayan.
[27] Kaya in mga mangyan piyangwat matang kitam mamangkit sa Diyos, matang kitam karemrem sa kansiyo, katawan sa kansiyo. Kamay siyo yewed adayonaw kamayba kay nakay pag mangyan.
[28] Angkataw apo keyen, Kaya kitam atai sa kobat, angkataw Diyos in agpangwat sa kantam, agpaboway sa kantam osai agpakan eyat sa kantam. Ina din in siyabi in amat kanyo mga koyay lakoy keyen, Kitam ngani mga bodang Diyos.
[29] Na no kitam mga bodang Diyos, ayaw kitam agremrem keyen in Diyos kagwali ginto, kagwali pilak, kagwali bato. Ayaw keyen siyo kagwali rarawan piyangwat mangyan batang sa kansiyo remrem.
[30] Piyabayaan wa Diyos in mga kabetek tangona in mga mangyan yewed katawan sa kansiyo. Kamay ngona siyo agsogo sa boo mga mangyan sa boo kobat keyen benglayen wa in kansiro mga daet.
[31] Angkataw siyo apo wa tarato batay agpaosap sa boo mga mangyan. In batay tanongan osai ka mangyan kansiyo iidang. Betek ngani in kansiyo batay pasiya. Siyo batang wa matay piyaboway wakay Diyos, matang kantam atawanan ina ngani in kantam tanongan.
[32] Paka siro karengey keyen in mga matay piyagpaboway wakay, siro in amat agpatawa wa. Kamay in amat wakay keyen, Kami batay wakay agparengey sa kaimo asin pag barita.
[33] Kalbas Pablo panaw wa sa kansiro.
[34] Kamay apo maniwala sa kansiyo, in osai Diyonisyo, osai ka koyay sa tiponan. Apo din osai ka kagbaiyan, in ngaran Damaris. Apo kay din mga amat.