[1] Siyabi Agripa kay Pablo keyen, Maal wa kao miplaong. Kalbas Pablo agodoy kansiyo bakwaw matang agmaal kay Agripa. Kalbas siyo agparakay wa miplaong.
[2] Pablo keyen, Laki Poon Lakoy Agripa, ngona ako agkaanggay in kao agparengey sa kangay mga piyagsabi panawen sa mga pasaen in mga Odyo sa kangay.
[3] Angkataw kaimo wa gayed atawanan in boo mga ogali in mga Odyo kadayo in kansiro mga piyagpalsisagotan, na in kangay piyagayay kao agbanta agparengey sa kangay.
[4] In kangay mga ogali atawanan in boo mga Odyo, angkataw sogod ako bodang kay ako agbalay sa kangay bayan osai sa Irosalim.
[5] Dogay wa ako kansiro atawanan, matang no nges kansiro beet, siro wa daan in kasabi ako agogali in mga ogali Parisiyo, in maloba pag adar sa kanyam mga piyagpaniwalaan.
[6] Bago ngona ako piyagosap panawen ako agpanaya sa piyangako in Diyos sa kanyam tangona mga kakoyayan.
[7] Kaya kami in labing dowai ka tiribo mga Odyo maloba agsamba sa Diyos kamayba ibeng kamayba yabi panawen din ina pag piyangako in kansiro piyagpanaya. Laki Poon Lakoy Agripa, kaya ako siyombong in amat mga Odyo panawen asina pag piyagpanaya.
[8] Nakay batang kamo yewed batay maniwala in Diyos agpaboway wakay sa mga matay wa?
[9] In kangay remrem tangona kailangan kangay pangwaten in boo kangay abaloyan aglaban sa mga agpaniwala kay Isos in taga Nasarit.
[10] Kataw ngani ina in kangay piyangwat sa Irosalim. Ako piyakan kabaloyan in mga poon sasirdoti, kalbas karowan pag mga bodang Diyos in kangay piyabilanggo. Osai in siro piyagbono ako agiyayon wa din.
[11] Mapret wano siro kangay piyagparosa sa mga balay pagpaniponan matang siro kangay piyagpilit nges agsabi daet kay Isos. Sa kalobaen in ako agkagalit sa kansiro siro kangay piyagpaidapan kamayba sa adayonaw pag mga bayan lakoy.
[12] Ina in dailan kaya ako pataboy sa Damasko, ako siyogo apo in kabaloyan in mga poon sasirdoti.
[13] Tangali wa in ibeng, laki Poon Lakoy, in kami agipanaw kangay ngiitan in rawa lakoy batang sa ogbos, makasolap labi kay sa ibeng. Agrawa in boo kobat sa kabetek kami agpaysarigan.
[14] Kami boo malabo sa diya. Ako karengey agiplaongan sa agiplaong Ibriyo, agsabi sa kangay keyen, Laki Saolo, Saolo, nakay batang ako kaimo piyagpaidapan? In kao aglaban sa kangay kataw ina na kao daan in piyagkaskitan.
[15] Kalbas ako keyen, Laki Kapwan, kao nakay? Siyabi in Kapwan keyen, Ako Isos, in kaimo piyagpaidapan.
[16] Tomaydek kao. Kaya ako papangkit sa kaimo matang kao sogowen. Kaimo sabiyen sa mga mangyan in ako kaimo ngiitan ngona kadayo in kangay mga batay kay piyagpapangkit sa kaimo.
[17] Kao kangay batay piyagpaboway sa mga Odyo kadayo sa mga yewed Odyo. Kao kangay piyagsogo sa mga yewed Odyo,
[18] matang siro piyakan katawanan matang siro dayo wa sa lened dayem pataboy wa sa rawa, siro kiyowa wa sa kabaloyan Katanas, kalbas tiyaboy wa sa Diyos. Kataw ina, in siro agpasandig sa kangay, batay liibangaw in kansiro mga daet, osai siro batay piyaagem sa mga bodang Diyos.
[19] Na ngani, laki Poon Lakoy Agripa, ako maniwala wa ngani sa agpapangkit sa kangay batang sa langit.
[20] Ako agpamarita tokaw sa mga taga Damasko, kalbas sa mga taga Irosalim, sa boo kobat Odiya, kadayo din sa mga yewed Odyo. In kangay piyatoldo keyen, Benglayen wa in daet, pasabangen wa sa Diyos, alisen wa in kanyo mga ogali matang atawanan biyenglay wa ngani in daet.
[21] Ina in dailan kaya ako diyakep in mga Odyo in ako sa balay lakoy Diyos, batay nges biyono.
[22] Kamay ako baatte tiyolong Diyos matang ngona ako agtaydek atai, in kangay ngiitan kangay piyagbarita sa mga mabwat, kadayo sa mga kabwatte. In kangay piyagsabi in siyabi daan in mga poropita osai Mowisis in keyen batay mibaloy,
[23] in siro keyen kailangan piyagpaidapan in Kiristo, biyono. Kalbas siyo in tokaw batay piyaboway wakay matang agbarita sa mga Odyo, kadayo sa mga yewed Odyo keyen maal wa siro piyaboway.
[24] Pablo agiplaong kay, yewed kay lobos in kansiyo piyagsabi, Pisto miplaong maksen keyen, Pablo kao agkalibed wa. Masida wa in kaimo bait, sa kaimo lakonaw pag atawanan.
[25] Kamay Pablo somagot keyen, Laki Pisto lakoy, ako yewed agkalibed. In kangay mga piyagsabi boo totoo, in kangay bait maal daan.
[26] In kangay boo piyagsabi atawanan in Poon Lakoy Agripa matang yewed maidap sa kangay in agiplaong sa kansiyo. Ako katawan idapo piyagbetang sa kansiyo angkataw ina ngiitan in boo.
[27] Laki Poon Lakoy Agripa, kaimo lames piyagpaniwalaan in siyolat in mga poropita? Ako katawan kao agpaniwala asin.
[28] Siyabi Agripa kay Pablo keyen, Kaimo lames piyagremrem kadogayte waget ako batay kaimo maakay agpaniwala kay Kiristo?
[29] Keyen wakay Pablo, Kamayba kadogayte, kamayba dogay, in kangay piyagpandalangin sa Diyos yewed waget kao no yewed in boo din karengey ngona sa kangay, mibaloy wa kataw ako kay Kiristo. Kamay ayaw kataw tai piyageket karakara.
[30] Kadogay tomaydek wa in poon lakoy, osai in gobirnador, kadayo din Birnisi, anggan in boo mga sarig.
[31] Paka siro lompot wa siro agpolongpolong keyen, Ina pag mangyan idapo piyangwat daet matang maal bonowen, kamayba biilanggo waget.
[32] Siyabi Agripa kay Pisto keyen, No nges ina pag mangyan yewed omayay keyen paadapen kay Poon Lakoy Sisar, na maal wa nges palpasen.