[1] Paka kami panaw wa sa mga taga Ipiso kami somakay wa sa parkado, toloytoloy pataboy sa Koos. Paka goribas wakay kami rateng sa Rodas. Panaw wakay asin rateng sa Patara.
[2] Asin kanyam wakay ngiitan osai ka parkado batay sa Pinisya. Asina wakay somakay, panaw wakay.
[3] Kami lomawey sa kobat Sipri, ina kanyam ngiitan sa tagwala agbangen, agipanaw kay anggan rateng sa bayan Tiro sa kobat Siriya. Asin kami lompot wa angkataw asin piyagpalompot in mga palnowan sa parkado.
[4] Kanyam piyamangkit asin in mga agpaniwala kay Isos, ngiitan. Kami agpamataw sa kansiro anggan pito ka ibeng. Siro piyatoldo in Abyan Diyos agsabi kay Pablo keyen, Kao ayaw wa ista pataboy sa Irosalim.
[5] Kalbas paka lampas wa in pito ka ibeng kami panaw wa batay wakay somakay sa parkado. Siro baatte talnakiyan boo miyanggat sa kanyam anggan lampas wa sa bayan. Paka sa balabaan wa dagat kami boo asin omaron pasongo, mandalangin.
[6] Kalbas kami agpaalam wa, kami agbangen somakay wa sa parkado, siro agbangen moli wakay.
[7] Panaw wakay sa Tiro agipanaw in parkado anggan sa bayan Tolimayda. Asin kami patagbo sa mga belag, kami asin mesek yabi.
[8] Kagoribasan kami panaw wakay, rateng sa bayan Sisariya. Kami asin agpamataw sa balay Pilipi in misyoniro. Siyo in osai sa Pito ka iidang tangona agbagi pamangnen sa Irosalim.
[9] Siyo apo opat ka bodang daraga boo poropita.
[10] Sa mga ibeng kami asin agpamataw apo rateng batang sa Odiya osai wakay ka poropita in ngaran Agabo.
[11] Siyo pataboy sa kanyam, kiyowa in kay Pablo bayakes, kalbas piyabakos sa kansiyo daan mga bitis, osai sa bakwaw. Kansiyo siyabi keyen, Anda in piyagsabi in Betek pag Abyan keyen, Kataw tai batay piyagbakos mga Odyo sa Irosalim in kapwan anda pag bayakes, kalbas batay piyagtaboy sa mga yewed Odyo.
[12] Paka kami karengey ina kami kadayo in mga taga asin agpilit nges kay Pablo keyen, Ayaw wa pataboy sa Irosalim.
[13] Kamay siyabi wakay Pablo keyen, Nakay batang kamo agpanangis, agpagolo sa kangay remrem? Ako beken sandata wa pabakos sa Irosalim, kamayba biyono, panawen sa Kapwan Isos.
[14] In siyo idwa kanyam aayaw, kami omempet wa keyen, Na mibaloy wa in beet in Kapwan.
[15] Paka kalbas ina pag mga ibeng kami mangimis wa, pataboy sa Irosalim.
[16] Apo agpaniwala miyanggat sa kanyam mga taga Sisariya. Kami kansiro tiyonton sa balay Manason in kanyam batay pagpamatawan. Siyo taga Sipri, dogay wa agpaniwala.
[17] Paka kami rateng sa Irosalim kami piyagkaanggayan in mga belag ista.
[18] Kagoribasan kami kora Pablo pataboy kay Santiyago. Asina din in boo mga koyay sa barkadaan.
[19] Pablo anggayan sa kansiro. Kalbas kansiyo giisod in boo wanote mga piyangwat Diyos sa mga yewed Odyo sa kansiyo piyanawen.
[20] In siro karengey ina siro agmaal sa Diyos. Kalbas kansiro siyabi kay Pablo keyen, Laki belag, kaimo atawanan aronaw wano in mga Odyo agpasandig wa kay Isos, anggan mga libo wa in karowen. Siro boo agpilit wano agpaniwala sa mga Batas Mowisis.
[21] Kalbas siro abaritaan keyen in kao agpatoldo sa mga Odyo agbalay sa mga kobat mga yewed Odyo, na in kaimo kono piyagpatoldo keyen siro ayaw wa maniwala sa mga Batas Mowisis. In kaimo kono piyagsabi ayaw wa kansiro toliyen in kansiro mga bodang, osai ayaw wa agalapeten in ogali mga Odyo.
[22] Kalbas kansiro batay wa ngani atawanan keyen kao atai wa, na nangkataw wa in maal pangwaten matang atawanan keyen kaimo din piyagalapet in mga Batas Mowisis?
[23] Sa kanyam remrem anda wa in maal kaimo pangwaten. Apo atai opat ka kaliyakiyan apo pangako sa Diyos.
[24] Na siro kaimo paanggaten, kamo boo agpangwat in ogali aglobos pangako in siyabi sa mga Batas. Kao wa in baala sa boo bayad matang maal wa siro agpabolog kansiro olo. No kataw ina na batay atawanan in boo mangyan keyen yewed mana betek in barita panawen sa kaimo, angkataw kaimo din piyagalapet in mga Batas Mowisis.
[25] Kamay in mga wakay yewed Odyo pag mga agpasandig kay Isos, kami batang wa agsolat sa kansiro agpatoldo keyen ayaw siro agkoman in pansola, kamayba daya, kamayba ablasen siyesel, osai ayaw manggaraw.
[26] Matang paka goribas wa piyaanggat Pablo in dokalakiyan. Kansiro wa piyangwat in ogali aglobos pangako, kalbas Pablo misoroy wa sa balay lakoy Diyos matang agsabi no nangkadogay siro batay sandata agtaboy in andog panawen sa baatte osai sa kansiro.
[27] Agkabangen wa rateng in kapito ka ibeng, Pablo ngiitan mga Odyo taga Asya sa balay lakoy Diyos. Kansiro piyagpangolokan in karowan mangyan, kalbas Pablo kansiro wa diyakep.
[28] Siro agpango keyen, Laki mga belag, kami tolongen. Sa boo kobat anda wa pag mangyan in agpatoldo daeten sa mga kasokponan Israil, aglaban sa mga Batas Mowisis, agsabi din daet sa balay lakoy Diyos. Yewed waget ina, siyo agpaanggat kay din mga yewed Odyo atai sa galem balay lakoy Diyos, matang marames wa in tiyalaga nges sa Diyos.
[29] Kaya kataw ina kansiro siyabi, panawen kansiro ngiitan Toropimo taga Ipiso agyanggat kay Pablo sa bayan. Kansiro remrem siyo piyaanggat din Pablo sa galem balay lakoy Diyos.
[30] Magolo wa anggan in boo bayan. In mga mangyan agpaypandalagan asin pataboy. Kansiro siyonggaban Pablo, giyoyod, piyalompot sa balay lakoy Diyos. Kalbas toloy wa kiyopot in mga sakbawan.
[31] Siro agpilit agbono kay Pablo, kamay rateng sa mabwat pag kapitan mga sondalo taga Roma in barita keyen agkagolo wano in boo mangyan sa Irosalim.
[32] Siyo toloy agpaanggat mga sondalo, kadayo mga kapitan, domalagan ista pataboy sa mga mangyan. Paka in mga mangyan kangitan sa kapitan lakoy osai sa mga sondalo, kansiro wa yeempet in agbogbog kay Pablo.
[33] Pasabangen in kapitan, Pablo diyakep, piyabakos dowai ka karakara. Keyen siyo, Nakay pag mangyan anda? Nakay in kansiyo piyangwat?
[34] In mga mangyan agpalpangowan, yewed tikkataw in piyagsabi. Agkagolo wano matang in kapitan idwa katawan no nakay in betek, matang Pablo kansiyo piyababa sa balay mga sondalo.
[35] Paka siro sa poon wa agdan in mga mangyan agpalkatapangan, anggan kailangan wa Pablo yoosong in mga sondalo.
[36] Angkataw agagak sa kansiro in mga mangyan agpango wano keyen, Siyo bonowen.
[37] Paka Pablo batay wa piyasoroy sa balay mga sondalo kansiyo siyabi sa kapitan keyen, Laki, maal lames ako manggisodan sa kaimo? Keyen in kapitan, Kao mana katawan agiplaong Girigo?
[38] Na no kataw ina yewed mana kao in taga Iipto taite in agpangolok sa mga mangyan agpanonggar, kalbas agpaanggat sa moyod 4,000 ka mangyan mga agpamono mangyan.
[39] Kalbas Pablo meles keyen, Laki, ako osai ka Odyo taga bayan Tarso sa kobat Silisya. Ina lakonaw pag bayan. In kangay nges beet ako manggisodan sa mga mangyan.
[40] Keyen in kapitan, Kalobante. Matang Pablo tomaydek sa batingal agdan, siyalbon kansiyo bakwaw in beet siyabi ayaw aglalae. Paka siro idwa aglalae siyo agiplaong wa sa agiplaong Ibriyo.