[1] Kalbas in mga katiwala Isos osai in mga belag agpaniwala sa boo kobat Odiya kabarita keyen anggan din in mga yewed Odyo, siro maniwala wa din sa agiplaong Diyos.
[2] Kalbas paka Pidro monaker sa Irosalim, siyo piyangelel in mga beet agtoli sa mga yewed Odyo.
[3] keyen, Nakay batang kao monaik sa balay mga yewed Odyo, mga yewed tiyoli, kao agpalanglang kay din asin?
[4] Kalbas giisod wa gayed Pidro in boo mibaloy.
[5] Pidro keyen, In ako sa bayan Oppi agpandalangin, ako agkaanapen, ako kangitan kagwali lakoy teem piyageket sa opat ka sokol, piyagpalooy batang sa langit, piyarateng sa kangay.
[6] Kalbas kangay riyoris, in galem aronaw, kamayba nakay in mga agipanawan, in mga aginanapan, in mga agilayogan.
[7] Kalbas apo miplaong sa kangay keyen, Laki Pidro, miyorog wa, agbono wa, mamangan wa.
[8] Kamay ako keyen, Ablayan, laki Kapwan, ako idbatang mamangan marames, idbatang mamangan in sa mga Odyo piyagawit keyen piyagayaw.
[9] Kamay tagoli kay miplaong batang sa langit keyen, In liinis wa Diyos, ayaw kaimo agawiten piyagayaw.
[10] Makatolo mipangwat kataw ina, kalbas giyoyod wakay lakoy boo sa langit.
[11] Ina daan betek sa balay kanyam pagpamatawan apo rateng tolo ka lalaki siyogo sa kangay batang sa Sisariya.
[12] Keyen in Abyan Diyos sa kangay, Kao miyanggat, ayaw wa manremrem. Anda pag enem ka belag agpaniwala, siro miyanggat din sa kangay. Kami misoroy kay Kornilyo balay.
[13] Kalbas Kornilyo agbarita in kansiyo ngiitan angil agtaydek sa kansiyo balay, miplaong keyen, Kao agsogo mangyan sa Oppi, atai pataboyen Simon, in piyagawit din Pidro.
[14] Siyo batay agsabi barita agpaboway sa kaimo, osai sa kaimo boo kamalay. Ina in siyabi in angil.
[15] Kalbas ako bayo kay agiplaong kay kora Kornilyo, siro toloy riyatengan in Betek pag Abyan, kataw daan in kitam tangona.
[16] Kalbas ako manremrem tangona in Kapwan apo siyabi keyen, Owan agsogbo sa sapa, kamay kamo batay siyogbo sa Betek pag Abyan.
[17] Na no siro piyakan Diyos kataw din in tiyaboy sa kantam tangona in kitam agpasandig kay IsoKiristo in Kapwan, na nangkataw ako? Ako dayo aglaban sa Diyos.
[18] Paka karengey ina in mga Odyo, siro idapo wa masabi. Siro agmaal wa sa Diyos keyen, Na mana kamayba in mga yewed Odyo, no siro agbenglay in kansiro mga daet, na siro piyagpaboway wa din Diyos.
[19] In mga maypandalagan sa kaidapan in betek Istiban biyono, in amat pataboy anggan sa Pinisya, sa Sipri, sa Antiyokya. Siro agbarita panawen kay Isos, kamay sa mga waget Odyo.
[20] Apo wakay mga taga Sipri, mga din taga Sirini pataboy sa Antiyokya. Siro agbarita din sa mga yewed Odyo, agpatoldo in Maal pag Barita Isos in Kapwan.
[21] Siro apo in kabaloyan in Kapwan, aronaw wano in maniwala, pasandig wa sa Kapwan.
[22] In barita batang sa Antiyokya rateng sa barkadaan mga bodang Diyos sa Irosalim, matang kansiro siyogo Birnabi sa Antiyokya.
[23] Paka rateng wa, kansiyo ngiitan in agpakayawte in Diyos sa kansiro, siyo agkaanggay. Kalbas siro boo kansiyo piyatoldo keyen, Ayaw agempet agpaniwala sa Kapwan, ayaw aglimbang.
[24] Birnabi maal pag mangyan, maeyat in remrem batang sa Betek pag Abyan, marigen in paniwala. Kalbas aronaw mangyan kansiyo maakay sa Kapwan.
[25] Kalbas Birnabi pataboy sa Tartos, agpamangkit kay Saolo.
[26] Paka ngiitan, Saolo kansiyo piyaanggat sa Antiyokya. Osai ka boo dagon siro malageman asin pag barkadaan mga bodang Diyos, agpatoldo sa karowan mangyan. Sa Antiyokya in parakayan piyagawit Kiristiyano in mga agpaniwala kay Isos.
[27] Asin pag betek apo rateng sa Antiyokya mga poropita batang sa Irosalim.
[28] In osai, in ngaran Agabo. Siyo piyatoldo in Abyan in batay agrateng, kalbas siyo tomaydek keyen, Batay apo domalan lakoy agkayawes sa boo kobat. (Ina mibaloy ngani sa betek Kalaodyo in poon lakoy.)
[29] Kalbas in mga agpaniwala maypolongan keyen, Kitam agpababa tolong sa mga belag agbalay sa Odiya, no nangkalakoy in abaloyan kitam in baatte osai.
[30] Kalbas ina ngani in piyangwat. In tolong piyababa sa mga koyay sa barkadaan ista mga bodang Diyos. In agbaba dokalaki Birnabi, osai Saolo.