[1] Kamay apo rateng sa Antiyokya mga kaliyakiyan batang sa Odiya. Siro agpatoldo sa mga belag agpaniwala keyen, No yewed tiyoli kataw in Batas Mowisis, na kamo idbatay apaboway.
[2] Pablo osai Birnabi maloba agmatiwid aglaban sa kansiro. Kalbas in polong keyen, Dokalakiyan Pablo osai Birnabi osai in amat kay pataboy sa Irosalim, ista maypolongan osai in mga katiwala osai din in mga koyay, no ngani toliyen.
[3] Kalbas siro siyogo wa in barkadaan mga bodang Diyos. In siro agdalan sa Pinisya, kalbas sa Samariya, siro agbarita keyen, In mga yewed Odyo agpasabangen wa din sa Diyos. Ina makaanggay wano sa boo asin agpaniwala.
[4] Paka rateng sa Irosalim, siro piyabelag in barkadaan mga bodang Diyos, osai in mga katiwala, osai in mga koyay. Kalbas kansiro piyanggisodan in boo piyangwat Diyos, sa kansiro mga panawen.
[5] Apo mga Parisiyo agpaniwala, siro tomaydek, miplaong keyen, Kailangan toliyen in mga yewed Odyo pag mga agpasandig kay Isos, kailangan siro maniwala sa mga Batas Mowisis.
[6] In mga katiwala anggan in mga koyay agkatipon matang agpolong no ngani toliyen in mga yewed Odyo.
[7] Dogay wa agpolong, kadogayte tomaydek wa Pidro, miplaong keyen, Laki mga belag, kanyo atawanan in Diyos tangona omidang sa kantam. Kalbas ako in kansiyo siyogo sa mga yewed Odyo, matang agpatoldo sa kansiro in Maal pag Barita, matang siro maniwala.
[8] Kalbas siro piyabodang in Diyos in katawan in mga remrem mangyan, baina siro kansiyo piyakan in Betek pag Abyan, kataw daan din kitam.
[9] In Diyos yewed agpangidang osai sa kansiro sa mga yewed Odyo, osai sa kantam sa mga Odyo. Baina in kansiro din mga daet liibangaw wa panawen siro agpasandig kay Kiristo.
[10] Na nakay batang ngona kamo agtepeng no in Diyos batay agkagalit? Kanyo piyagpakabyat in panawen sa mga agpaniwala. Ina pag mga Batas idbatay abaloyan kamayba kantam mga kakoyayan, kamayba kitam.
[11] Ayaw wa. In kantam piyagtiwala, kaya kitam piyagpaboway panawen kitam piyagpakayawte Isos in Kapwan. Na kadayo din siro kataw daan ina.
[12] Kalbas in boo tiponan idwa agiplaong, in siro agparengey kay Birnabi osai kay Pablo, in kansiro piyagpanggisodan in mga tanda, in mga makasoyo piyangwat Diyos sa mga yewed Odyo, sa kansiro mga panawen.
[13] Paka siro kalbas wa, Santiyago wakay in miplaong keyen, Laki mga belag, mamarengey sa kangay.
[14] Giisod wa Simon no nangkataw tangona piyalowas Diyos in siyo agpakayawte sa mga yewed Odyo. Baina, iidang sa kansiro in mga batay kansiyo.
[15] Kataw din ina in siyabi in mga poropita, sa mga Agisolat keyen,
[16] In siyabi in Kapwan keyen, Paka kalbas wa, ako batay wakay moli, batay wakay kangay piyakapya in kasokponan Dabid, in masida wa. Kamayba masida wa gayed batay wakay kangay piyangwat, batay wakay kangay tiyadyok,
[17] matang in mga amat mangyan agpamangkit sa kangay, osai in boo kangay piyagapo sa mga yewed Odyo.
[18] Ina in piyagsabi in Kapwan, ibat tangonanaw kataw ina in kansiyo datiyan piyagsabi. Ina in siyabi sa mga Agisolat.
[19] Santiyago keyen kay, Na in kangay remrem ayaw kantam pagpaidapanen in mga yewed Odyo, in mga agpasabangen sa Diyos.
[20] Kitam agsolat waget sa kansiro keyen ayaw agkoman in pansola, osai ayaw agpanggaraw, osai ayaw agpamangan daya osai in mga ablasen siyesel.
[21] Angkataw ibat tangona apo agpatoldo in kay Mowisis mga Batas sa boo mga bayan. Ina piyagbasa sa mga balay pagpaniponan mga Odyo baatte Ibeng Pamainga.
[22] Kalbas in mga katiwala, anggan in mga koyay, kadayo in boo barkadaan mga bodang Diyos, in kansiro polong keyen, Kitam agidang mga mangyan, sogowen sa Antiyokya, in sarig Pablo osai Birnabi. Kalbas in siyogo Odas piyagawit Barsabas, osai Silas, angkataw siro piyagmaal in mga belag agpaniwala.
[23] Siro agbaba solat batang sa barkadaan keyen, Kami kanyo mga belag, mga katiwala, mga koyay in agsolat sa kanyo. Laki mga belag yewed Odyo sa Antiyokya, osai sa Siriya, osai din sa Silisya,
[24] sa kanyam apo rateng barita keyen apo mga mangyan batang kono sa kanyam agpatoldo sa kanyo maidap, anggan malingetnget kono in kanyo remrem. Kamay siro yewed kanyam siyogo.
[25] Matang in polong kami boo keyen, Kami agsogo sa kanyo in kanyam iidang mangyan. In sarig Pablo osai Birnabi, in kanyam mga piyagmaal.
[26] Ina pag dokalaki yewed agaman kansiro boway in siro agpanawen kay IsoKiristo kantam Kapwan.
[27] Kaya ngani kanyam siyogo Odas osai Silas, matang anda pag barita kansiro din batay piyagsabi gayed sa kanyo.
[28] In beet in Betek pag Abyan, osai in kanyam polong, kamo ayaw wa agpaidapanen. No yewed anda waget in kailangan,
[29] in ayaw agpamangan in pansola, ayaw agpamangan daya osai in mga ablasen siyesel, osai ayaw agpanggaraw. No in mga ina idwa kanyo piyagpangwat na kamo boway wa. Ina waget, mga laki.
[30] Kalbas in dokalakiyan siyogo wa, mongali, pataboy sa Antiyokya. Paka rateng, kansiro tiipon in barkadaan mga bodang Diyos, tiyaboy in solat.
[31] Paka mabasa wa, in mga agpaniwala agkaanggay sa siyabi.
[32] Kalbas in dokalaki Odas, in osai Silas, siro din mga poropita, siro agpatoldo aronaw sa mga belag, agpakaeyat sa kansiro mga remrem.
[33] Siro dogay kayte asin, kalbas siro piyalpas wa in mga belag, piyaoli sa mga agsogo sa kansiro.
[35] In dokalaki Pablo, in osai Birnabi, agaway sa Antiyokya, agpatoldo, agpaliwanag in agiplaong in Kapwan. Aronaw din in amat agpatoldo.
[36] Paka dogay kayte, Pablo miplaong kay Birnabi keyen, Amba, kita wa, ista wakay mangkit sa mga belag sa boo mga bayan kanta piyatoldowan in agiplaong in Kapwan, no nangkataw wa lames siro.
[37] In beet Birnabi paanggaten Owan Markos.
[38] Kamay in remrem Pablo ayaw wa agpaanggaten in moli tangona batang sa Pampilya, in idwa miyanggat anggan mibaloy wa in kansiro panawen.
[39] Kalbas siro agpalaway, anggan siro malsoway wa. Birnabi agpaanggat kay Markos, somakay sa parkado, pataboy sa Sipri.
[40] Kamay kay Pablo iidang Silas wa in kansiyo sarig. Paka siro piyandalangin in mga belag, piyaalapet sa Kapwan in agpakayawte, siro panaw wa,
[41] domalan sa Siriya osai sa Silisya, agsabi in mga agpakaeyat sa remrem sa mga barkadaan mga bodang Diyos.