[1] Asin pag mga betek agkakarowan in mga agpaniwala. Kalbas malawayan wa osai in mga Odyo agiplaong Girigo, osai in mga Odyo agiplaong Odyo. In sa mga agiplaong Girigo agbangen keyen in kansiro mga balo piyagapi sa piyagbagi ibengibeng.
[2] Kadogayte in labing dowai ka katiwala agpatipon sa boo mga agpaniwala, keyen, Yewed maal in kami agempet agpatoldo in agiplaong Diyos, matang agbagi.
[3] Na laki mga belag, in maal kamo mangidang sa kanyo pito ka lalaki, mga piyagmaal, mga lakonaw in remrem batang sa Betek pag Abyan, mga apo katawanan. Na siro kanyam piyagsogo asin pag panawen,
[4] matang idwa piyagsalag in kanyam panawen agpandalangin osai agpatoldo in agiplaong Diyos.
[5] Kalbas in boo mga barkadaan agkaanggay sa siyabi in mga katiwala, in kansiro iidang in osai Istiban, siyo marigen in paniwala, lakonaw in remrem batang sa Betek pag Abyan. In kadowai Pilipi, in katolo Porokoro, in kaopat Nikanor, in kalima Timon, in kaenem Parminas, in kapito Nikolas siyo taga Antiyokya kamay mibaloy wa Odyo.
[6] Ina pag pito piyaadap sa mga katiwala, kalbas yaatang, piyandalangin.
[7] Kalbas labi kay karowan mangyan in karengey in agiplaong Diyos. In mga agpaniwala agkakarowan wano sa Irosalim, kadayo in mga sasirdoti, aronaw din in maniwala.
[8] Piyagngitan wano Istiban piyagpakayawte Diyos, angkataw siyo aronaw piyagpamangwat sa pangkit mga mangyan makasoyo mga tandaan sa kabaloyan lakoy tiyaboy Diyos sa kansiyo.
[9] Apo barkadaan mga Odyo piyagawit Piyalpas wa. Siro apo kansiro balay pagpaniponan, siro mga taga Sirini, osai in mga taga Aliyanriya. Apo din barkadaan mga Odyo taga Silisya, osai mga taga Asya. In kalaati sa kansiro lomaban kay Istiban agmatiwid,
[10] kamay siro idbatay kapandaeg sa kansiyo maal pag remrem, sa Abyan in agpaiplaong sa kansiyo.
[11] Kadogayte siro agtago agsogo sa mga mangyan agsabi keyen, Kami ngani karengey Istiban aglibak kay Mowisis, osai sa Diyos.
[12] Kataw ina kansiro riyengke in galit in mga mangyan, osai in mga koyay, osai in mga agpatoldo in mga Batas. Kalbas Istiban kansiro siyonggaban, diyakep, biyaba sa mga tanongan in mga Odyo.
[13] Kadogayte kansiro piyaadap in mga agbintang keyen, Ina pag mangyan agpansabi waget daet sa kantam balay lakoy Diyos, osai sa mga Batas Mowisis.
[14] Angkataw kami karengey siyo keyen ina pag Isos taga Nasarit batay agpokan sa kantam balay lakoy Diyos, batay agalis sa kantam mga ogali, in tiyaboy Mowisis.
[15] Kalbas in boo tiponan agroris sa kay Istiban mata, siro kangitan kagwali mata angil.