[1] Kataw daan din ina in mibaloy sa Ikonyo. In dokalaki Pablo osai Birnabi misoroy sa balay pagpaniponan mga Odyo. Siro agiplaong maal anggan aronaw in maniwala, mga Odyo, mga yewed Odyo.
[2] Kamay in dayo maniwala pag mga Odyo agpamaakay sa mga yewed Odyo, matang siro agremrem daet sa mga agpaniwala.
[3] Dogay kayte agpamataw asin in dokalaki. Siro yewed agkalimo agbarita keyen in Kapwan agpakayawte. Siro piyakan in Kapwan kabaloyan agpangwat din mga makasoyo, mga tanda matang atawanan totoo in kansiro barita.
[4] Kamay in mga mangyan asin pag bayan piyagsaliit, in amat sa mga Odyo agbangen, in amat wakay sa mga katiwala.
[5] Kalbas apo mga Odyo, kadayo mga yewed Odyo, anggan mga poon maypolongan wa, batay agpangwat daet, agbenglay bato sa dokalaki.
[6] Paka ina atawanan in dokalaki siro domalagan wa, pataboy sa Lisra anggan sa Dirbi, mga bayan sa Likaonya, anggan din sa mga kobat sa balabaan.
[7] Asin pag mga kobat siro agpatoldo in Maal pag Barita.
[8] Sa Lisra apo osai ka mangyan sogod biyoslot pilaw, yewed kapaodoy in mga bitis, idbatang panaw.
[9] Siyo agtokkaw agparengey kay Pablo agiplaong. Kalbas Pablo agterek sa kansiyo, kangitan in kansiyo paniwala siyo batay piyaboway.
[10] Miplaong Pablo maksen keyen, Kao tomaydek wa maal. Kalbas siyo lomokso, agipanawan wa.
[11] In piyangwat Pablo ngiitan in karowan, kalbas siro miplaong maksen, kamay sa agiplaong Likaonya, keyen, Atai wa maypanlowas sa kantam in mga diyos, kagwali mangyan.
[12] Matang Birnabi kansiro wa piyagawit diyos Siyos, Pablo piyagawit diyos Irmis, angkataw siyo agbangen in agiplaongan.
[13] In pagsambaan kay Siyos sa bosngawan bayan. In agpapoon agsamba kay Siyos, kadayo in mga mangyan, siro agbaba mga baka agbogwayan betakan sa bangen sakbawan, batay nges piyagbono matang agsamba kay dokalaki.
[14] Kamay paka ina atawanan Birnabi osai Pablo, in mga katiwala, siro agrognit kansiro lambong, in beet siyabi siro maloba wano aglaban sa batay piyagpangwat. Siro bigla domalagan, somaray sa karowan, agpango lakoy keyen,
[15] Mga laki, nakay batang kamo agkataw ina? Kami dayem mangyan daan, kataw daan kamo. Kami yewed mga diyos. Kami dayem agbaba in Maal pag Barita panawen kay Isos keyen benglayen wa ina pag mga idapo kabolowan, agmaal wa sa agkaboway pag Diyos, in agpangwat in langit osai in diya, osai in dagat, anggan in boo sa galem asin.
[16] Tangona in Diyos pomayag sa boo mga mangyan agogali in kansiro daan mga ogali,
[17] kamay kansiyo datiyan piyagpapangkit sa kantam no kataw nakay siyo, in siyo agpangwat maal, agtaboy sa kantam odan batang sa langit, osai mga ani sa tagani, anggan kitam siyawaan pamangnen, piyakaanggay wano.
[18] Kamayba in dokalaki agayaw kataw ina in karowan mangyan idbatay wa nges maempet agsamba sa kansiro, kamay maempet din.
[19] Kamay apo asin rateng mga Odyo batang sa Antiyokya sa Pisidya, osai batang sa Ikonyo. Kansiro piyaakayan in mga mangyan, kalbas Pablo biyenglayan wa bato, giyoyod lampas sa bayan. Siro keyen, Matay wa ina.
[20] Kamay paka in mga agpaniwala agtipon sa kansiyo bangen, tomaydek wa siyo, moli wakay sa bayan. Paka omaga siro dokalaki Birnabi pataboy wa sa Dirbi.
[21] In Pablo osai Birnabi agpatoldo in Maal pag Barita sa Dirbi, aronaw wa in kansiro aakay agpaniwala wa. Kadogayte siro moli wakay sa Lisra, anggan sa Ikonyo, anggan sa Antiyokya sa Pisidya.
[22] Siro agpatoldo sa mga agpaniwala, agpakaeyat sa remrem keyen, Ayaw aglimbang in agpaniwala. Kailangan kitam aronaw maidap, bayo misoroy sa sakopan Diyos.
[23] Sa baatte barkadaan mga agpaniwala in dokalaki in agidang kansiro mga koyay. Kalbas paka agpandalangin wa idwa mamangan, siro piyaalapet in dokalaki sa Kapwan, in kansiro piyagpasandigan.
[24] Paka in dokalaki kadalan wa sa Pisidya, siro rateng sa Pampilya.
[25] Siro agpatoldo in barita sa bayan Pirga, kalbas mongali agtaboy sa bayan Atalya.
[26] Paka asin siro somakay sa parkado, pataboy sa Antiyokya, sa kansiro riyakayan tangona in siro piyaalapet sa agpakayawte pag Diyos matang siro agpanawen. Ngona mibaloy wa ina pag panawen.
[27] Paka rateng wa, kansiro tiipon in barkadaan mga bodang Diyos, piyanggisodan in boo piyangwat Diyos, sa kansiro mga panawen keyen, In mga yewed Odyo piyagpakan din Diyos padalan agpasandig sa kansiyo.
[28] Kalbas siro dogay wakay agpamataw asin sa mga agpaniwala.