[1] Kalbas in mabwat pag poon sa mga sasirdoti miplaong kay Istiban keyen, Nakay laki, betek ngani ina pag mga sombong?
[2] Miplaong Istiban keyen, Laki mga belag, laki mga koyay, kamo mamarengey sa kangay piyagsabi. In Diyos in lakonaw sa boo, siyo lomwas sa kantam tangona kakoyayan Abraam, in siyo agbalay kay sa Misapotamya, ikkay agbalay sa Aran.
[3] Siyabi sa kansiyo in Diyos keyen, Kao panaw wa sa kaimo kobat, sa kaimo mga kabelagan, pataboy sa kobat kangay batay piyagpatoldo sa kaimo.
[4] Kalbas siyo panaw wa ngani asin pag kobat, agbalay wa sa Aran anggan in kansiyo amang matay wa. Kalbas siyo piyapanaw wakay Diyos, anggan atai pag kobat, sa kantam pagbalayan ngona.
[5] Kamay siyo idapo piyakan kobat atai, kamayba kaslangte darapa. Kamay in pangako Diyos keyen anda pag kobat batay ngani dogayan kansiyo, osai sa kansiyo mga kasokponan, kamayba asin pag betek siyo idapo kay bodang.
[6] In siyabi Diyos keyen, In kaimo dogayan mga kasokponan batay agbalay sa kobat yewed siro in kapwan. Siro batay mga sogowan batay piyagpaidapan 400 ka dagon.
[7] Keyen in Diyos, Kamay ako batay agparosa sa mga agpansakop sa kansiro. Na no kalbas wa, siro batay wakay panaw asin, atai wakay pag kobat agpandalangin sa kangay.
[8] Kalbas in Diyos agsogo kay Abraam keyen, In mga kaliyakiyan toliyen, tanda sa kanta kasondowan. Kalbas Abraam apo wa bodang, Isaak. Paka ngani sa kawalo ka ibeng kansiyo tiyoli. Kalbas Isaak apo wa bodang, Akob. In bodang Akob labing dowai, in kantam tangona mga kakoyayan.
[9] Keyen kay Istiban, In kantam mga kakoyayan agpanagiri kay Osi. Kalbas Osi piyabili, matang sogowan waget sa Iipto. Kamay in Diyos agaway kay agalapet sa kansiyo.
[10] Siyo piyaboway Diyos sa boo mga kaidapan, piyakan in maal pag remrem, anggan siyo piyagmaal in poon lakoy sa Iipto. Osi piyangwat Paraon poon sa Iipto. Kadayo kay Paraon balay Osi katiwala wa din asin.
[11] Istiban keyen kay, Kalbas apo domalan agkayawes sa boo Iipto, kadayo sa Kanaan, agkaidapan wano, in kantam mga kakoyayan idapo piyagngitan pamangnen.
[12] Kalbas abaritaan Akob keyen apo pamangnen sa Iipto, kalbas kansiyo siyogo kansiyo mga bodang in kantam mga kakoyayan. Ina in tokaw pag siro pataboy ista.
[13] Kalbas in tagoli wakay keyen Osi sa kansiyo mga belag, Mga laki, ako Osi. Kalbas in kabelagan Osi piyatoldo wa kay Paraon.
[14] Kalbas Osi agsogo keyen, Atai wa pataboyen kantam amang Akob, anggan in kantam kabelagan. Siro pitompo lima ka mangyan.
[15] Kalbas Akob malkoyog wa sa Iipto, siyo ista wa matay, kadayo kantam mga kakoyayan ista wa din matay.
[16] Kansiro mga bilog biyaba wakay sa Sikim, asina wa liyebeng. Ina pag lebengan biili tangona Abraam sa mga kasokponan Amor sa Sikim, in bayad kowarta daan.
[17] Keyen kay Istiban, Paka batay wa mibaloy in pangako Diyos in kansiyo siyabi kay Abraam, na agkakarowan wa gayed in mga kasokponan Israil sa Iipto.
[18] Kalbas apo wakay bayo pag poon sa Iipto, siyo idapo katawan panawen kay Osi.
[19] Siyo agpadaya, piyagpaidapan in kantam mga kakoyayan, piyanggais biyenglay in kansiro mga bodang, matang mangatay.
[20] Asin pag betek Mowisis biyoslot. Siyo maalen wano pag bodang sa pangkit Diyos. Tolo ka bolan siyo piyaistobo sa balay daan kansiyo mga koyay.
[21] Kalbas paka biyenglay wa, siyo kiyowa wakay kay Paraon bodang, yaalapet wa ina pag kagbaiyan, mibaloy wa kansiyo bodang.
[22] Kalbas Mowisis piyaadar wa sa boo atawanan in mga taga Iipto, maeyat in kansiyo agiplaong, maeyat din in kansiyo panawen.
[23] Istiban agiplaong kay keyen, Paka Mowisis apatnapo wa ka dagon, siyo manremrem keyen, Ako paya batay mangkit sa kangay mga belag kasokponan Israil.
[24] Kalbas kansiyo ngiitan in osai sa kansiro piyagpangwatan daet osai ka taga Iipto. Kalbas kansiyo tiyolong in kasokponan Israil, in taga Iipto kansiyo diyaeg, biyono.
[25] In kansiyo remrem in kansiyo mga kabelagan batay wa agremrem keyen siyo piyagsogo Diyos agpalpas sa kansiro. Kamay siro idapo agremrem kataw ina.
[26] Goribas wakay Mowisis apo wakay ngiitan dowai ka kasokponan Israil agpalaway. Kalbas siyo agosay nges keyen, Mga laki, kamo taybelag daan, na nakay batang kamo agpalaway?
[27] Kamay siyo diyekse in agpamangwat daet agbangen keyen, Nakay in agsogo sa kaimo agpoon, matang tanongan sa kanyam?
[28] Kao lames batay agbono sa kangay, kataw kaponi sa taga Iipto?
[29] Paka Mowisis karengey ina, siyo toloy wa domalagan asin sa Iipto, ista wa naw agbalay sa kobat Midyan. Ista wa siyo mamangkit babai, kalbas mamodang, dowai ka kaliyakiyan.
[30] Istiban keyen kay, Paka kadalan apatnapo ka dagon, Mowisis agipanawan sa moyod sa boksor Sinai, apo lomwas angil sa kansiyo sa osai ka yangawte agigang baya.
[31] Mowisis agsoyo sa kansiyo ngiitan, siyo pasabangen kay, kansiyo piyagroris. Kalbas siyo karengey in agiplaong in Kapwan keyen,
[32] Laki Mowisis, ako in Diyos piyagmaal kaimo mga kakoyayan, Abraam, Isaak, osai Akob. Kadogayte Mowisis mangirabot, siyo yewed kapangaas agpangkit.
[33] Keyen in Kapwan, Kowaen wa in kaimo tapatos, angkataw ina pag kobat kaimo paglaedan piyagtalaga sa kangay.
[34] Kangay ngani ngiitan in kangay mga mangyan maloba wano piyagpaidapan sa Iipto. Ako karengey siro mga agpalpangadedek wa. Kaya ako lompot, ako batay agpalpas sa kansiro. Amba, kao kangay piyagpaoli wakay sa Iipto.
[35] Istiban keyen kay, Kamay in kantam mga kakoyayan dayo kay Mowisis. Kansiro siyabi keyen, Nakay in agsogo sa kaimo agpoon, matang tanongan sa kanyam? Kamay Mowisis daan in siyogo Diyos agpoon, osai agpalpas sa kansiro sa tolong in angil in kansiyo ngiitan sa yangawte.
[36] Mowisis daan in agpalpas sa kantam mga kakoyayan sa Iipto. Asin siyo agpangwat lakoy mga tandaan mga makasoyo, kadayo sa dagat Mapola, kadayo din sa moyod apatnapo ka dagon.
[37] Ina daan pag Mowisis in agsabi sa mga kasokponan Israil keyen, In Diyos batay wakay agsogo poropita batang sa kanyo mga kabelagan, kataw daan in ako siyogo.
[38] Mowisis sarig in mga kasokponan Israil agkatipon sa moyod. Siyo in sarig in kantam mga kakoyayan osai sarig in angil in miplaong sa kansiyo sa boksor Sinai. Siyo in piyakan Diyos mga agiplaong agkaboway, matang kansiyo wakay tiyaboy sa kantam.
[39] Keyen kay Istiban, Kamay in kantam mga kakoyayan dayo maniwala kay Mowisis. Siyo biyenglay. Kansiro remrem keyen, Dayem nges kitam kaoli wakay sa Iipto.
[40] Kansiro siyabi kay Aaron keyen, Ina pag Mowisis in agpalpas kantam sa Iipto, saken wa no manakay siyo. Na kami pangwatanen wakay mga rarawan batay kanyam mga diyos agpatoldo dalan sa kantam.
[41] Kalbas kansiro piyangwat kagwali bodang baka. Siro agbono mga ayop, yaandog asin sa kansiro piyagawit diyos, agpiyasta agmaal sa kansiro waget piyangwat.
[42] Kalbas in Diyos paawak wa, siro piyabayaan wa sa agsamba sa mga magirem sa langit. Kataw in siyolat sa aklat in mga poropita keyen, Laki mga kasokponan Israil, in kamo sa moyod apatnapo ka dagon, in kanyo mga biyono ayop, mga pansola, tiyaboy lames kay nakay? Yewed sa kangay.
[43] Kanyo biyaba in torda in yewed Diyos piyagawit Molok, kanyo biyaba in rarawan magirem in yewed Diyos piyagawit Ripan, in mga rarawan kanyo piyangwat matang pagsambaan. Na kamo kangay batay piyagbenglay sa ripay Babilon.
[44] Keyen kay Istiban, Sa moyod in kantam mga kakoyayan apo in torda tanda in Diyos kansiro sarig. Mowisis siyogo Diyos agpangwat, kalbas kansiyo ngani piyangwat kataw in pagtoladan piyapangkit sa kansiyo.
[45] Paka Oswi wakay in poon, in torda piyagbaba din in kantam mga kakoyayan in siro mandaeg sa mga tiribo piyamoyaw Diyos atai pag kobat. In torda kansiro biyaba atai, ina atai kay anggan sa kabetek Dabid.
[46] Dabid piyagmaal in Diyos, kalbas siyo mandalangin keyen, Ako batay agpangwat balay lakoy sa kaimo, kao in Diyos piyagmaal in mga kasokponan Israil.
[47] Kamay Solomon wakay in agpangwat in balay lakoy Diyos.
[48] Kamay in Mabwat sa Boo yewed agbalay sa mga piyangwat mangyan. Kataw in siyabi in Diyos siyolat in poropita keyen,
[49] In langit in kangay pagtokkawan, in kobat in kangay paglaedan. Na kataw nakay pag balay in kanyo batay piyangwat sa kangay? Saano in kangay batay pagpamatawan?
[50] Ako daan in agpangwat ina pag boo.
[51] Keyen kay Istiban sa mga tanongan, Kamo mga dayo padaeg, dayo pasakop sa Diyos, dayo agparengey sa Diyos. Kamo din baatte aglaban sa Betek pag Abyan. In kanyo ngona piyagpangwat kataw in piyangwat tangona kanyo mga kakoyayan.
[52] In kanyo mga kakoyayan agpaidap sa boo mga poropita, kansiro tangona biyono in mga poropita in mga keyen batay rateng in betek gayed pag Sogowan Diyos. Kalbas ngona siyo kanyo piyadakep, kanyo biyono.
[53] Kamo in piyakan Diyos kansiyo mga Batas biyaba mga angil, bago yewed kanyo piyaniwalaan.
[54] Paka karengey ina in mga tanongan, siro agkaibengan wa labi sa galit kay Istiban.
[55] Kamay siyo lakonaw in remrem batang sa Betek pag Abyan. Siyo agtangra sa langit, kansiyo ngiitan in rawa Diyos, osai Isos agtaydek sa pamalang agbangen Diyos.
[56] Miplaong Istiban keyen, Baati, ako kangitan mabolwat in sakbawan sa langit, Isos in Bodang Mangyan agitaydek sa pamalang agbangen Diyos.
[57] Kalbas in mga poon mango lakoy maksen, piyangkopot in talinga. Istiban diyarosog,
[58] giyoyod piyalampas sa bayan, piyamenglayan bato. In mga agsombong karai in kansiro mga lambong piyapataw sa osai ka begle, in ngaran Saolo.
[59] In Istiban piyagpamenglayan bato siyo mandalangin maksen keyen, Laki Isos, Kapwan, kowaen wa in kangay abyan.
[60] Kadogayte kansiyo piyataydek kansiyo dolang, miplaong lakoy maksen keyen, Laki Kapwan, kaimo libangawen anda pag daet, in mga mangyan ayaw agparosaanen. Paka kalbas wa miplaong siyo matay wa.