[1] Saolo agantabay sa agbono. Piyarakay asin pag ibeng, in mga agpaniwala sa Irosalim, siro piyagpaidapan wa gayed. Siro boo maypandalagan wa, omarabang sa mga kobat sa Odiya, osai sa Samariya. In mga katiwala waget in mataw.
[2] Istiban siyangat in mga mangyan agmaal sa Diyos. Siro agrongkot wano anggan maloba agpalpanangis.
[3] Kamay Saolo agkasida gayed sa barkadaan mga bodang Diyos, siyo agpangisoroy sa mga balay, agpanggoyod sa mga agpaniwala, mga kaliyakiyan, mga kagbaiyan din, piyagbenglay sa bilanggowan.
[4] In mga omarabang agipanawan, agpatoldo daan in Maal pag Barita.
[5] Pilipi pataboy sa bayan Samariya, agpatoldo panawen sa Kiristo.
[6] Paka siro karengey kay Pilipi, osai kangitan in mga makasoyo kansiyo piyagpangwat, in karowan malpaniwala sa kansiyo piyagsabi.
[7] Angkataw maypandalagan in mga mamaw sa aronaw mangyan piyaglowasan, agpango maksen. Aronaw din mga mangyan yewed wa kapaglebey, osai mga mangyan pilay, piyaoraw din Pilipi.
[8] Siro agkaanggay wano asin pag bayan.
[9] Asin pag bayan apo mangyan piyagawit Simon. Siyo dogay wa salimangkaan, in mga taga Samariya agsoyo sa kansiyo mga piyagpangwat lakoy. Siyo agpakabwat keyen siyo lakonaw lakoy.
[10] Siyo piyagpaniwalaan in boo, anggan in mga lakonaw, anggan in mga mangyan waget. Ina pag mangyan kansiro piyagawit in Kabaloyan Lakoy batang sa Diyos.
[11] Siro agparengey sa kansiyo, angkataw dogay wa siro agsoyo sa kansiyo salimangka.
[12] Kalbas siro maniwala wakay sa kay Pilipi Maal pag Barita keyen in Diyos agpapoon wa, maniwala wa kamo kay IsoKiristo. Paka siro maniwala wa, siro biyaotismowan, mga kaliyakiyan, mga kagbaiyan din.
[13] Kadayo Simon maniwala din. Paka biyaotismowan wa, siyo miyanggat wa kay Pilipi, siyo agsoyo sa mga lakonaw pag panawen piyagpangwat Pilipi, mga makasoyo.
[14] Kalbas in mga katiwala sa Irosalim abaritaan keyen, In mga taga Samariya agpaniwala wa din sa agiplaong Diyos. Kalbas kansiro siyogo ista dokalaki Pidro osai Owan.
[15] Paka in dokalaki rateng wa sa Samariya, siro agpandalangin sa mga agpaniwala keyen siro pakanen in Betek pag Abyan.
[16] Angkataw kamayba nakay sa kansiro ikkay riyatengan in Betek pag Abyan. In siro biyaotismowan na sa ngaran waget Isos in Kapwan.
[17] Kalbas siro yaatang in dokalaki. Siro piyakan wa in Betek pag Abyan.
[18] Paka Simon kangitan in Betek pag Abyan tiyaboy sa mga yaatang wa in mga katiwala, siyo miplaong kay dokalaki Pidro osai Owan keyen, Kamo pakanen kowarta,
[19] ako din pakanen ina pag kabaloyan, matang kamayba nakay in kangay yaatang, na siyo piyakan din in Betek pag Abyan.
[20] Kamay Pidro keyen, Kadayo kaimo kowarta, kadayo kao ista wa sa toyongan, angkataw kaimo remrem keyen batay mabayad kowarta in kabaloyan piyagtaboy Diyos.
[21] Kao piyagayaw agyanggat atai pag panawen, angkataw in kaimo remrem daet sa Diyos.
[22] Na benglayen wa in kaimo daet, mandalangin sa Kapwan, karam nges mayadi liibangaw in kaimo daet pag remrem in kao agkataw ina.
[23] Ako kangitan kao agpanagiri wano, kao piyagbakos daet.
[24] Kalbas Simon keyen, Ako kanyo dalanginen sa Kapwan, matang yewed rateng kangay in kanyo mga baritaen.
[25] In dokalaki, paka kalbas wa agbarita agpatoldo in agiplaong Diyos, siro moli wakay sa Irosalim. Siro agpatoldo in Maal pag Barita sa mga bayante sa Samariya kansiro diyalan.
[26] Pilipi siyogo osai ka angil in Kapwan keyen, Kao panaw wa ngani, pataboy sa dalan agongali, batang sa Irosalim agtaboy sa Gasa, ina pag dalan apo moyod.
[27] Kalbas siyo panaw wa, ista wa pataboy. Siyo kangitan kaliyakiyan taga Itiyopya, mabwat in tongkolin. Siyo katiwala Kandasi, in poon lakoy kagbaiyan sa mga taga Itiyopya. Siyo in agalapet in kay Kandasi boo mga sangkap. Ina pag lalaki batang pataboy sa Irosalim, agsamba,
[28] kalbas ngona agoli wakay. Siyo agitokkaw agsakay sa kalisa, agbasa sa aklat in apo siyabi Isaiyas in poropita.
[29] Pilipi siyogo in Abyan Diyos keyen, Amba kao pataboy ista pag kalisa, miyanggat.
[30] Domalagan Pilipi, pataboy sa kansiyo. Siyo karengey agbasa in apo tongkolin sa siyabi Isaiyas in poropita. Keyen Pilipi, Kao lames katawan in beet siyabi ina in kaimo piyagbasa?
[31] Keyen in apo tongkolin, Nangkataw ako batay katawan, no idapo agpaliwanag sa kangay? Laki, somakay wa kao, atai wa tomokkaw sa kangay bangen.
[32] Sa mga Agisolat in dodo kansiyo piyagbasa keyen, Siyo kataw topa piyagali batay piyagbono. Siyo yewed miplaong kataw in bodang topa yewed agana no piyagogoy.
[33] Siyo piyaidapo kabolowan, idapo tanongan batay mamarengey sa kansiyo. Siyo idapo batay bodang piyagpanggisodan dogayan, angkataw siyo biyono wa, idapo wa.
[34] In apo tongkolin miplaong kay Pilipi keyen, Laki, nakay in piyagpanggisodan in poropita? No siyo daan, no osai wakay ka mangyan?
[35] Kalbas Pilipi miplaong, piyarakay daan asin pag solat siyo agpatoldo sa kansiyo in Maal pag Barita Isos.
[36] Siro agipanaw kay sa dalan, rateng sa linaw. Keyen in apo tongkolin, Baati, apo sapa, maal lames ako biyaotismowan?
[38] Kalbas kansiyo piyaempet in kalisa, siro tanan lompot sa sapa, osai Pilipi, osai in apo tongkolin, kalbas biyaotismowan wa.
[39] Paka siro patakdang wakay, Pilipi toloy wa biyaba in Abyan in Kapwan, siyo idwa piyagngitan ina pag lalaki. In apo tongkolin agipanaw wakay sa kansiyo dalan, agkaanggay wano.
[40] Kamay Pilipi bayo katawan siyo mana sa Asoto wa. Kalbas siyo agipanawan kay, agpatoldo in Maal pag Barita sa boo mga bayante, anggan rateng sa Sisariya.