[1] In dokalaki Pidro osai Owan agiplaong kay sa mga mangyan, toloy rateng in mga sasirdoti, osai in kapitan sa mga agdamay sa balay lakoy Diyos, anggan in mga Sadosiyo.
[2] Siro agkabais angkataw in dokalaki agpatoldo sa mga mangyan, osai agbarita keyen, Isos piyaboway wakay, matang atawanan keyen batay wakay boway in mga matay.
[3] Kalbas in dokalaki kansiro diyakep, biilanggo anggan omaga, angkataw bayapon wa.
[4] Kamay in mga agparengey karai sa agbarita, aronaw in maniwala. Kalbas in boo mga kaliyakiyan agpaniwala biilang wa, lima ka libo.
[5] Paka omaga wa, agkatipon sa Irosalim in mga poon, osai in mga koyay, anggan in mga agpatoldo in mga Batas.
[6] Asina din Anas in mabwat pag poon sa mga sasirdoti, osai Kaypas, osai Owan, osai Aliyanro, kadayo in boo mga kabelagan in mabwat pag poon sa mga sasirdoti.
[7] Kansiro piyataydek sa kagwaraan in dokalaki, biyotog keyen, Sa nakay pag kabaloyan kamo kapaoraw ina pag pilaw? Nakay in ngaran in agsogo sa kanyo agpangwat kataw ina?
[8] Kalbas Pidro maeyat in remrem batang sa Betek pag Abyan, siyo keyen, Laki mga poon sa mga mangyan, laki mga koyay,
[9] no ngona kami piyagosap panawen agtolong sa pilaw, no nangkataw siyo piyaoraw,
[10] na kailangan kanyo atawanan, anggan in boo mga kasokponan Israil, keyen anda pag mangyan in agtaydek sa kanyo kagwaraan, siyo maal wa panawen sa kabaloyan in ngaran Kiristo Isos taga Nasarit, in kanyo piyako sa kodos, kamay siyo piyaboway wakay Diyos.
[11] Isos in piyagawit in mga Agisolat, in dodo keyen, In towar biyenglay in mga agpangwat balay, siyo in mipangwat wa kalyongan.
[12] Idapo roma kapaboway no yewed Isos waget. Sa boo kobat idapono roma ngaran tiyaboy sa mga mangyan matang kitam piyaboway.
[13] Kalbas in mga poon agsoyo angkataw Pidro yewed agkalimo, osai Owan. Labi kay siro agsoyo in siro katawan in dokalaki mga mangyan waget, idbatang agpasok sa iskolan. Kalbas in mga poon katawan wa keyen in dokalaki batang pagbelag Isos.
[14] Kamay apo in batang pilaw agtaydek asin sa bangen, matang siro idapo masombong sa dokalaki.
[15] Matang in dokalaki piyasoway sa tiponan, kalbas siro maypolongan keyen,
[16] Nangkataw wa lames ina pag dokalaki? Angkataw in boo Irosalim katawan wa siro kapangwat makasoyo lakoy. Ina idbatay kantam atanggiyan.
[17] Na kantam wa ayawen siro agpatoldo agalapet in ngaran Isos kamayba kay nakay, matang ina pag barita idbatay kay piyabarita sa mga mangyan.
[18] Kalbas biyerya wakay in dokalaki, keyen, Ayaw agpatoldo agalapet in ngaran Isos. Ayaw agpamatoldo ina pag ngaran.
[19] Kamay keyen Pidro osai Owan, Remremen kamo no nakay in maal sa Diyos, osai in maniwala sa kanyo, osai in sa Diyos.
[20] Kami idbatay kaempet agbarita in kanyam ngani ngiitan, osai piyarengey.
[21] Kalbas in mga poon labi kay agayaw. Kalbas piyalpas wa in dokalaki. Idapo ngiitan dailan agparosa sa kansiro panawen sa mga mangyan, angkataw in boo mangyan agmaal sa Diyos panawen sa mibaloy.
[22] In pilaw, in piyangwatan ina pag tanda, siyo lampas wa apatnapo ka dagon.
[23] Paka piyalpas wa in dokalaki, siro ista pataboy sa barkadaan mga agpaniwala, agbarita in siyabi in mga poon sasirdoti, osai in mga koyay.
[24] Paka karengey ina, siro boo agpalpandalangin sa Diyos keyen, Laki Kapwan sa boo, kao in agpangwat in langit, osai in kobat, osai in dagat, in boote.
[25] Kao in agsabi, in kaimo Betek pag Abyan in agpasabi sa kaimo sogowan kanyam tangona kakoyayan Dabid keyen, Nakay batang tangona agkabais in mga yewed Odyo? Osai in mga mangyan agpaypolongan in idbatay mibaloy?
[26] In mga poon sa mga kobat agsandata. In mga poon agkatipon, aglaban sa Kapwan, osai sa kansiyo iidang piyangwat Kiristo.
[27] Kalbas atai sa Irosalim siro agkatipon ngani, aglaban kay Isos sa kaimo Betek pag Sogowan, in kaimo iidang. Siro kora Irodis, osai Ponsiyo Pilato, anggan in mga yewed Odyo, kadayo in mga kasokponan Israil.
[28] Siro agkatipon matang mipangwat wa ngani in boo kaimo tangona piyagremrem batay piyangwat sa kaimo kabaloyan.
[29] Laki Kapwan, ngona kao mamarengey sa kansiro pamalimlimo. Kami in kaimo mga sogowan kaimo pakaeyaten in remrem matang yewed agkalimo agpatoldo in kaimo barita.
[30] Palowasen in kaimo kabaloyan matang agpaoraw, agpangwat mga tanda mga makasoyo, sa kabaloyan Isos in kaimo betek pag Sogowan.
[31] Paka siro kalbas wa agpandalangin, in balay pagtiponan liyoni. Kalbas siro boo maeyat in remrem batang sa Betek pag Abyan, matang siro yewed agkalimo agbarita in agiplaong Diyos.
[32] In barkadaan mga agpaniwala osai waget in remrem, in bait. Idapo agpangayaw kansiyo mga sangkap, boo piyalageman.
[33] In mga katiwala apo lakoy kabaloyan agbarita in kansiro ngani ngiitan in Kapwan Isos boway wakay. Piyagngitan siro boo piyagpakayawte gayed in Diyos.
[34] Sa kansiro idapo agkaidapan, angkataw in kansiro ogali in mga apo kobat, apo balay, no siro agpabili, na in abel kowarta biyaba,
[35] tiyaboy sa mga katiwala, matang biyagi sa boo mga agpaniwala no nangkalakoy in piyagkailangan in baatte osai.
[36] Alimbawa, apo mangyan in ngaran Osi, in ngaran yaalis wa in mga katiwala, piyagawit wa Birnabi, in beet siyabi ina Agpakaeyat remrem. Siyo kasokponan Libi taga kobat Sipri katolong sasirdoti.
[37] Siyo apo kobat, kansiyo piyabili. In abel kowarta biyaba, tiyaboy sa mga katiwala.