[1] In betek Apolos sa Korinto, Pablo agipanawan sa agbaw, anggan rateng sa Ipiso. Asin siyo katagbo mga amat wakay pag mga agpaniwala.
[2] Siyabi Pablo sa kansiro keyen, Nakay ina? In kamo maniwala, kamo lames piyakan in Betek pag Abyan? Siro keyen, Yewed. Kami idbatang abaritaan keyen apo Betek pag Abyan.
[3] Kalbas Pablo keyen, Na nakay in beet siyabi in kamo biyaotismowan? Keyen, Kataw in piyatoldo Owan.
[4] Keyen Pablo, Owan agbaotismo sa mga agbenglay kansiro mga daet. Kamay siyo agpatoldo sa mga kasokponan Israil keyen kailangan maniwala sa batay rateng sa kansiyo paoriyan, na ina wa Isos.
[5] Paka karengey ina, siro biyaotismowan wa sa ngaran Isos in Kapwan.
[6] In Pablo omatang sa kansiro siro piyakan in Betek pag Abyan, kalbas siro toloy agiplaongan sa yewed kansiro agiplaong, osai agbarita in mga batang sa Diyos.
[7] Siro mga labing dowai ka mangyan.
[8] Tolo ka bolan Pablo agtaboytaboy sa balay pagpaniponan mga Odyo, yewed agkalimo agpanggisodan sa kansiro, agpilit agakay sa kansiro keyen, Pakapyaen wa in kanyo remrem panawen sa agpapoon Diyos.
[9] Kamay apo mga agsonggar, dayo maniwala. In adar keyen Isos in Kapwan kansiro piyagpansabiyan daet sa boo mga barkadaan. Matang Pablo panaw wa sa kansiro, in mga agpaniwala miyanggat din, kalbas ibengibeng siyo agbarogi sa kay Tirano balay pagpaniponan.
[10] Dowai ka dagon kataw ina, anggan in boo mga taga kobat Asya karengey wa sa barita panawen sa Kapwan, kadayo in mga Odyo, kadayo in mga yewed Odyo.
[11] Pablo piyakan Diyos kabaloyan agpangwat mga makasoyo wano,
[12] anggan in mga apo maskit, no kiyowaan mga panyo, mga lambong batang kay Pablo, na maoraw wa in maskit, panaw wa sa kansiro in mga mamaw.
[13] Apo mga Odyo, balaonan agipanawan. Siro mangaas nges agboyaw mga mamaw agsabi in ngaran Isos in Kapwan. Siro miplaong sa mga mamaw keyen, Sa ngaran Isos in piyagpatoldo Pablo, kamo kangay piyagboyaw. Kamo panaw wa asin pag mangyan.
[14] Osai ka tayariyan pito ka kaliyakiyan, in amang Iskiba. Siyo Odyo, osai ka mabwat pag poon sa mga sasirdoti. Siro agsabi kataw ina,
[15] kalbas in mamaw meles keyen, Isos osai Pablo kangay atawanan, kamay kamo nakay?
[16] Kalbas siro siyonggaban lakoy in piyaglowasan mamaw, siro boo diyaeg, asogatan aro, domalagan wa asin pag balay, idapo wa gayed in mga lambong.
[17] Kalbas ina abaritaan wa in boo mga taga Ipiso, kadayo in mga Odyo, kadayo in mga yewed Odyo, kalbas siro boo agkalimo wa. Kalbas in ngaran in Kapwan Isos labi wa piyagmaal.
[18] Osai din in mga maniwala, aronaw in pasabangen sa amat mga agpaniwala, omamin in kansiro mga piyagpamangwat daet pag ogali.
[19] Aronaw din mga balaonan, biyaba in kansiro mga aklat pamalaon, kansiro tiyebed sa pangkit in boo mangyan. In kalakoyen in bayad ina pag mga papil tangona alaga limampo ka libo ka ibeng agpanawen.
[20] Kataw ina sa kabaloyan in Kapwan in barita panawen sa kansiyo omarabang, agpandaeg lakoy.
[21] Paka kalbas wa ina pag mga mibaloy, Pablo piyagsogo in Abyan manremrem keyen, Ako paya batay sa Irosalim, kamay batay kay domalan sa kobat Masidonya, osai sa kobat Akaya. Siyo keyen, Paka kalbas wa sa Irosalim, kailangan din ako pataboy sa bayan lakoy Roma.
[22] Kalbas dowai ka kansiyo katolong kansiyo siyogo wa tokaw sa Masidonya, in osai Timotiyo, in osai Irasto. Kamay siyo dogay kayte asin sa Asya.
[23] Asin pag betek apo lakoy golo panawen sa adar in keyen Isos in Kapwan,
[24] angkataw apo mangyan in ngaran Dimitriyo. Siyo pandayan pilak, agpangwat mga balayte rarawan sa pagsambaan Diyana, in kansiro piyagdiyos. Dimitriyo osai in kansiyo mga agpanawen aronaw in agrateng kowarta.
[25] Siro tiipon Dimitriyo, osai in amat kay pag mga pandayan agpangwat kataw ina, kalbas miplaong keyen, Mga laki, kanyo atawanan in kantam kowarta batang atai pag panawen lakonaw.
[26] Kamo kangitan, kamo abaritaan, in piyagpangwat ina pag Pablo. Kansiyo piyagsabi keyen, In mga rarawan piyagpangwat mangyan yewed Diyos. Kalbas aronaw wa kansiyo piyamaakay, yewed waget atai sa Ipiso, no yewed sa boo Asya.
[27] Na karam isag anda in kantam panawen batay piyaglibak. Dimitriyo keyen kay, Yewed waget ina. Kadayo Diyana diyos lakoy kagbaiyan, karam isag kansiyo balay piyagidapo wa kabolowan. Karam isag siyo idbatay wa piyaglakonaw. Bago siyo nges in piyagmaal in boo mga taga Asya, taga boo kobat.
[28] Paka in mga taga Ipiso karengey ina, siro agkagalit wano. Siro mango keyen, Kantam Diyana lakonaw.
[29] In boo bayan agkagolo, kansiro diyarosog dowai ka sarig Pablo, in osai Gayo, in osai Aristarko mga taga Masidonya. Kalbas kansiro giyoyod, siro boo pataboy sa pagpangaronan lakoy.
[30] Pablo beet nges pataboy sa karowan, kamay siyo piyagayaw in mga agpaniwala.
[31] Sa mga poon sa Asya, in amat kay Pablo pagbelag. Siro agayaw wano kay Pablo keyen, Kao ayaw mangaas misoroy asin sa alabat pagpangaronan.
[32] In tiponan agkagolo wano. Baatte mangyan in miplaong maksen, in piyagsabi osai wakay. Aronaw in yewed katawan no nakay batang ina pag matipon.
[33] In kalaati keyen ina panawen kay Aliyanro angkataw siyo piyataydek in mga Odyo. Kalbas Aliyanro agribway in kansiyo bakwaw, in beet nges miplaong sa mga mangyan.
[34] Kamay paka kansiro atawanan siyo Odyo, siro boo agpayraesan agiplaong maksen. Dowai ka boo oras siro keyen, Kantam Diyana lakonaw.
[35] Karowan in agpalpangowan, kamay paka dogay wa in osai ka poon sa bayan kabaloy wa agayaw asin pag aglalae. Siyo keyen, Laki mga taga Ipiso, in bayan Ipiso in agalapet kay Diyana lakoy balay, osai sa bato lakoy in malabo batang sa langit. Boo mga mangyan katawan ina,
[36] ina idbatay masida. Na ayaw wa aglalae, ayaw kay bigla.
[37] In dokalaki kanyo piyaanggat atai, siro idbatang manakaw sa balay lakoy Diyana, idbatang aglibak sa kansiyo.
[38] No ngani Dimitriyo osai kansiyo mga sarig panday apo piyagsombong, na apo mga ibeng pagpangosapan, apo mga tanongan, asina wa in agsombong.
[39] Kamay no kamo apo kay piyagtanong, na batay piyagpolong sa betek agpaltiponan in mga mangyan kataw in sa mga batas.
[40] Ayaw agbigla angkataw karam isag kitam piyagsombong panawen sa golo ngona pag ibeng, kitam idapo batay masabi maal pag dailan no nakay batang anda pag golo.
[41] Paka masabi ina, kansiyo wa liyobos in tipon.