[1] Kora Pablo rateng sa Dirbi, kalbas sa Lisra. Apo asin osai ka agpaniwala, in ngaran Timotiyo, in inang Odyo agpaniwala din, in amang Girigo.
[2] Timotiyo piyagmaal in boo mga belag sa Lisra, kadayo sa Ikonyo.
[3] In kay Pablo beet Timotiyo paanggaten. Kalbas siyo piyatoli wa Pablo, panawen sa mga Odyo asin pag mga kobat, angkataw siro boo katawan in kansiyo amang Girigo.
[4] In siro agdalan sa mga bayan kansiro biyarita sa mga agpaniwala in mga bilin taite in mga katiwala, osai in mga koyay sa Irosalim keyen kanyo alapeten.
[5] In mga barkadaan agistobo in paniwala, osai ibengibeng agkakarowan.
[6] Kalbas in dokalakiyan Pablo domalan sa mga kobat Pirigya, osai Galasya, angkataw in Betek pag Abyan agayaw siro agpatoldo in barita sa kobat Asya.
[7] Siro rateng sa betek Misya, kalbas batay nges pataboy sa kobat Bitinya, kamay siro yaayaw din asin in Abyan Isos,
[8] matang siro domalan waget sa Misya, mongali, pataboy wa sa Torowas.
[9] Ina pag yabi Pablo manaynep, apo agtaydek mangyan taga Masidonya, agdaing sa kansiyo keyen, Kao atai pataboy sa kobat Masidonya, kami tolongen.
[10] Panawen siyo manaynep kataw ina, kanyam atawanan keyen kami piyagsogo Diyos agpatoldo in Maal pag Barita sa kansiro. Matang kami toloy agpamangkit dalan pataboy sa Masidonya.
[11] Kalbas kami somakay sa parkado, panaw wa sa Torowas, toloy sa kobat Samotrasya. Paka goribas wakay sa bayan Niyapolis,
[12] kalbas monaker sa Pilipos. Ina in lakonaw pag bayan asin pag betek sa kobat Masidonya, piyangwat mga taga Roma. Kami mamataw kayte asin pag bayan.
[13] Paka Ibeng Pamainga, kami lampas sa alabat bayan, pataboy sa sapa. In kanyam remrem karam asin apo poro pandalanginan mga Odyo. Kalbas apo ngani asin mga kagbaiyan agkatipon. Kami malpanokkaw, agpanggisodan sa kansiro.
[14] In osai sa mga kagbaiyan agparengey, in ngaran Lidya, taga bayan Tiyatira. In kansiyo panawen agpamabili kondiman. Siyo datiyan din agsamba sa Diyos. Kalbas in Kapwan agboswang kansiyo remrem, siyo maniwala sa piyagsabi Pablo.
[15] Siyo biyaotismowan, kadayo in kansiyo mga kamalay, kalbas siyo agsabi sa kanyam keyen, Kataw sa kanyo remrem ako agpaniwala ngani sa Kapwan, na kamo mamataw sa kangay balay. Kami kansiyo piilit.
[16] Osai ka ibeng in kami agtaboy sa pandalanginan kami atagbowan osai ka daraga, sogowan piyagalapet. Siyo piyaglowasan iskanto, agsabi in mga batay rateng. In kansiyo mga kapwan mayaman wa panawen sa kansiyo kabaloyan agkataw ina.
[17] Kami kora Pablo kansiyo yaagakagak, agiplaong maksen keyen, Ina pag mga mangyan mga sogowan Diyos in Mabwat sa boo, siro agpatoldo sa kanyo in padalan kamo apaboway.
[18] Ibengibeng siyo agkataw ina, anggan Pablo idwa katiis. Siyo managoli, miplaong sa iskanto keyen, Kao kangay piyagsogo sa kabaloyan IsoKiristo, kao bali wa, ayaw wa asin pag daraga. Kalbas in iskanto toloy wa ngani panaw sa kansiyo.
[19] Paka in mga kapwan katawan idapo wa batay pakinabang asin pag kagbaiyan, Pablo osai Silas diyakep, giyoyod, piyataboy sa palingki, sa mga poon.
[20] Siro piyaadap sa mga poon taga Roma keyen, Anda pag dokalaki Odyo, agpagolo sa kantam bayan.
[21] Siro agpatoldo mga ogali piyagayaw sa kantam batas. Kitam mga taga Roma yewed maal agalapet ina, agpamangwat ina.
[22] In boo karowan somonggab kay dokalaki, in kansiro mga lambong giyoyod in mga poon, agsogo keyen, Bogbogen wa oway.
[23] Paka piyamogbog wa gayed, siro diyekse sa bilanggowan. In bilin sa agdamay keyen, Ayaw galot in agdamay.
[24] Angkataw ina in bilin, siro siyoroy sa potok bilanggowan, piyangaw.
[25] Kagwaraan wa yabi Pablo agpandalangin, osai Silas, agbaren mga awit sa Diyos, in mga amat piyagbilanggo agparengey.
[26] Toloy lomoni lakoy, anggan mamaglebey wa in pagtadyokan bilanggowan, in boo mga sakbawan toloy mangaboswang, in boo piyagbilanggo mangalowat in karakara.
[27] Apolawan in agdamay, kangitan agiboswang in mga sakbawan, in remrem mipalpas wa in mga piyagbilanggo. Toloy liyakso kansiyo pisaw, batay wa nges pabono.
[28] Kamay Pablo mango keyen, Ayaw agpabono. Kami anda daan, boo.
[29] Kalbas merya in agdamay, omayay tinglaw, toloy misoroy, patalegeb sa bangen Pablo osai Silas, agtagelgey, agkalimo.
[30] Kalbas siro kansiyo piyalabas sa bilanggowan keyen, Laki dokalaki, nakay lames in kailangan kangay pangwaten, matang ako piyaboway?
[31] Siro keyen, Maniwala kao kay Isos, sa Kapwan, na kao batay piyaboway, kadayo in kaimo mga kamalay.
[32] In barita panawen sa Kapwan piyatoldo sa kansiyo kadayo sa boo galem kansiyo balay.
[33] Yabi daan in dokalaki piyaanggat in agdamay, yoogas in kansiro mga sogat. Kalbas siyo toloy biyaotismowan, kadayo in kansiyo mga kamalay, boo.
[34] Kalbas in dokalaki piyaonaik sa kansiyo balay, piyakan pamangnen. In agdamay agkaanggay, osai in boo kansiyo kamalay, angkataw agpaniwala wa sa Diyos.
[35] Paka ibeng wa, in mga poon agsogo polis keyen, In dokalaki kaponi palpasen wa.
[36] Kalbas in agdamay agbarita kay kora Pablo keyen, In mga poon apo wa siyogo agpalpas sa kanyo, na kamo panaw wa, ayaw nges apo kamay nakay.
[37] Kamay siyabi Pablo sa mga polis keyen, Ayaw kataw ina. Kamayba idapo ngiitan daet sa kanyam, kami kansiro piyabogbog sa pangkit mga mangyan, kami biilanggo, bago kami sa listaan mga taga Roma. Kalbas nakay, kami batay piyagpalpas piyagtago? Ayaw. Siro daan in atai pataboy in agpalpas sa kanyam.
[38] Kalbas in mga polis agsabi ina pag barita sa mga poon. Paka katawan in mga poon in dokalaki sa listaan mga taga Roma, siro agkalimo.
[39] Matang siro ista pataboy sa bilanggowan, agdaing kay dokalaki agpalpas sa kansiro. In mga poon agsabi keyen, Amba, kamo nges panaw wa atai pag bayan.
[40] Kalbas in dokalaki panaw wa sa bilanggowan, pataboy wa kay Lidya balay, asin ngiitan in mga belag. In dokalaki agiplaong in mga agpakaeyat sa remrem, kalbas panaw wa asin pag bayan.