[1] Kay Pablo piyanriwa gayed in tiponan, siyabi keyen, Laki mga belag, anggan ngona pag ibeng sa kangay boo boway in kangay remrem panawen sa kangay mga ogali apyaan sa pangkit Diyos.
[2] Paka Ananiyas in mabwat pag poon sa mga sasirdoti karengey ina, kansiyo siyogo in mga sa bangen Pablo keyen, Sampalen sa bibi. Kalbas siyampal wa ngani.
[3] Siyabi wakay Pablo keyen, Kao batay piyarosa Diyos, kao pag agpakagwali waget. Kao asin agtokkaw matang ako kaimo piyagtanong no ako sa mga Batas, bago ako kaimo piyagpasampal baribid sa mga Batas.
[4] Siyabi in asin mga agtaydek keyen, Kao mana mangaas agsonggar sa mabwat pag poon sa mga sasirdoti iidang Diyos?
[5] Keyen wakay Pablo, A mana, mga belag, no nges karai ako katawan ina in mabwat pag poon sa mga sasirdoti, na ako idbatay. Angkataw in siyabi ngani sa mga Agisolat keyen, Ayaw agsonggar sa kanyo poon.
[6] Atawanan Pablo in kalaati asin mga Sadosiyo, in kalaati wakay mga Parisiyo, matang kansiyo siyabi maksen keyen, Mga belag, ako Parisiyo, kadayo kangay amang Parisiyo. Kaya ako piyagpadaet ngona panawen sa kangay atawanan keyen in mga matay batay wakay piyaboway.
[7] Paka siyabi wa Pablo ina, agpalawayan wa osai in mga Parisiyo osai in mga Sadosiyo, mabaslag wa in tiponan.
[8] Angkataw in piyagsabi in mga Sadosiyo keyen in mga matay idbatay wa daan boway, osai keyen idapo mga angil, idapo mga mamaw. Kamay in mga wakay Parisiyo, siro agpaniwala asin pag boo.
[9] Siro boo malpangowan. Kadogay tomaydek in kalaati mga agpatoldo in mga Batas, siro Parisiyo agbangen. Siro agmatiwid maksen keyen, Kami idapo ngiitan daet atai pag mangyan. Kitam yewed katawan, karam apo ngani mamaw miplaong sa kansiyo, karam angil.
[10] Paka maloba wa in siro agpalawayan, in remrem in kapitan keyen karam isag Pablo piyandodo wa. Matang kansiyo siyogo in mga sondalo keyen, Amba kamo ista wa, Pablo agawen, betangen wa sa balay mga sondalo.
[11] Ina daan pag yabi in Kapwan tomaydek sa kay Pablo bangen keyen, Pakaeyaten in kaimo remrem. No nangkataw kao batang agbarita panawen sa kangay atai sa Irosalim, na kataw daan din ina kao batay agbarita sa bayan lakoy Roma.
[12] Paka omaga wa apo mga Odyo maypolongan, mansawet keyen, No Pablo yewed kay kantam mabono, na kitam ayaw kay mamangan pamangnen kamayba minem.
[13] In mga malpangako kataw ina siro labi kay apatnapo ka mangyan.
[14] Kalbas siro pataboy sa mga poon sasirdoti osai sa mga koyay, in piyagsabi keyen, Kanyam wa gayed sawetan kami idbatay mamangan pamangnen kamayba osai wagette ka somol anggan yewed kay kanyam mabono Pablo.
[15] Na ngona ayayen kamo osai in boo mga tanongan sa mabwat pag kapitan keyen, Amba papangkiten wakay atai Pablo. Kamo agpangwat dailan keyen siyo piyagosap kay. Kalbas yewed kay rateng sa kanyo kanyam wa piyagbono.
[16] Kay Pablo belag kagbaiyan apo bodang begle wa. Ina pag begle kabarita ina pag polong keyen Pablo piyagbono. Matang siyo pataboy wa sa balay mga sondalo, matang agbarita kay Pablo.
[17] Kalbas kay Pablo biyerya osai ka kapitan, siyabi keyen, Anda pag begle kaimo sarigen sa mabwat pag kapitan, angkataw siyo apo batay siyabi sa kapitan.
[18] Kalbas in begle piyaanggat sa mabwat pag kapitan, siyabi keyen, Ako biyerya Pablo in piyagbilanggo, siyogo somarig atai pag begle sa kaimo. Apo kono batay piyagsabi sa kaimo.
[19] Kalbas in begle yaakay in mabwat pag kapitan, piyabokod sa mga karowan keyen, Nakay in kaimo batay siyabi sa kangay?
[20] Keyen wakay in begle, In polong in mga Odyo keyen, No nges goribas kaimo piyalowas wakay Pablo sa boo mga tanongan. Kamay kansiro waget dailan in siyo kono piyagosap kay.
[21] Kamay kao ayaw maniwala sa kansiro angkataw in batay agdamay sa dalan siro labi kay apatnapo ka mangyan. Siro mansawet wa siro idbatay kay mamangan kamayba minem, anggan Pablo yewed kay kansiro mabono. Ngona siro sandata wa gayed, kansiro waget piyagpanaya in kao mangako.
[22] In siyabi in mabwat pag kapitan keyen, Ayaw kaimo agsabiyen kamayba kay nakay keyen ina kaimo wa biyarita sa kangay. Kalbas in begle piyapanaw wa.
[23] Kalbas biyerya in mabwat pag kapitan dowai ka kapitan, siyogo keyen, Anggan isag bayapon kalbas wa manyapon, kanyo sandataen 200 ka sondalo, agyanggat pitompo ka agsakay sa kabayo, apo din 200 ka agbaba torag, matang pataboy sa Sisariya.
[24] Kanyo din sandataen in mga kabayo batay sakayan Pablo, kalbas siyo tontonen kay Gobirnador Pilis. Kanyo alapeten gayed maal.
[25] Kalbas siyo somolat kay Pilis keyen,
[26] Laki Gobirnador lakoy Pilis, ako Kalaodyo Lisiyas in agsolat sa kaimo. Kagwali wa nakay kao?
[27] Anda pag kaliyakiyan in ngaran Pablo diyakep in mga Odyo, kansiro nges batay biyono. Kamay kangay atawanan siyo sa listaan mga taga Roma matang kangay piyaanggat in mga sondalo, matang siyo yewed biyono.
[28] Kangay beet atawanan no nakay in kansiro sombong matang siyo kangay piyapangkit sa kansiro mga tanongan.
[29] Kangay ngiitan in kansiro sombong panawen sa mga Batas mga Odyo, kamay idapo sombong sibay makabono sa kansiyo, kamayba biilanggo.
[30] In ako kabarita keyen apo polong siyo batay piyagbono siyo toloy kangay piyatonton sa kaimo. Kangay wakay siyabi sa mga agsombong keyen sa kaimo wa kansiro sabiyen in sombong.
[31] Kalbas in mga sondalo maniwala sa siyabi. Ina daan pag yabi Pablo kiyowa, tiyonton wa sa bayan Antipatris.
[32] Paka goribas wakay in mga sondalo moli wakay sa balay. In mga waget agsakay sa kabayo in tomonton kay Pablo sa gobirnador.
[33] Paka rateng sa Sisariya Pablo tiyaboy wa sa gobirnador, tiyaboy din in solat.
[34] Paka mabasa wa in solat Pablo tiyanong in gobirnador keyen, Kao taga saano pag kobat? In kansiyo atawanan Pablo taga Silisya
[35] kansiyo siyabi keyen, Kao kangay batay piyagparengey no rateng wa in mga agsombong. Kalbas siyo agsogo keyen, Pablo damayen sa balay lakoy Irodis.