[1] Paka kalbas wakay in agkagolo, in mga agpaniwala biyerya Pablo, kansiyo piyakaeyat kansiro remrem. Kalbas siyo keyen, Ako agipanaw wa. Kalbas siyo panaw wa, pataboy sa Masidonya.
[2] Siyo domalan asin pag mga kobat, agpansabi in mga makaeyat sa kansiro remrem. Kalbas rateng sa kobat Akaya.
[3] Tolo ka bolan siyo asin agpamataw. Kadogayte batay nges somakay sa parkado, pataboy sa Siriya. Kamay siyo abaritaan keyen in mga Odyo batay agbono sa kansiyo, matang siyo manremrem wakay keyen, Na ako paya domalan wakay sa Masidonya.
[4] In agyanggat, in osai Sopatir bodang Piro taga Biriya. Apo din taga Tisalonika, in osai Aristarko, in osai Sigondo. Apo din Gayo taga Dirbi, osai Timotiyo. In taga Asya Tikiko osai Toropimo.
[5] Siro tokaw wa, kami Pablo kansiro piyagpanaya sa Torowas.
[6] Paka kalbas wa in mga ibeng in piyasta agpamangan tinapay idapo pamaistobo, kami somakay wa sa parkado, panaw wa sa Pilipos. Sa kalima ka ibeng kami rateng sa kansiro sa Torowas, kami boo asin agpamataw pito ka ibeng.
[7] In Sabado bayapon kami agkatipon, batay malpamangan. Pablo agpatoldo sa kansiro, agiplaongan dogay, anggan kagwaraan yabi, angkataw siyo batay wa panaw goribas.
[8] In kanyam pagpaniponan basag sa ogbos, aronaw in tinglaw.
[9] Apo begle, in ngaran Yotiko, agibangtol sa bintana. Siyo agrongronga wano. Pablo agiplaongan kay, Yotiko aesekan wa gayed, malabo batang sa katolo ka basag anggan sa diya. Kalbas kansiro yaatang, matay wa mana.
[10] Pablo lomabo, pasapaw sa kansiyo, kiyapet. Keyen, Ayaw pangkariyaban, siyo boway kay.
[11] Kalbas Pablo monaik wakay. Kami maldodowan wa pamangnen, malpamangan. Siyo agpatoldo kay dogay, anggan maboka, kalbas panaw wa.
[12] In begle piyaanggat wakay in mga belag, agpalkaanggayan wano.
[13] Kami tokaw wa somakay sa parkado, angkataw in beet Pablo kansiyo dalan sa kobat agbangen. Kami panaw wa, pataboy sa Ason. Asin kono batay somakay Pablo.
[14] Kami maltagbowan sa Ason, somakay wa din Pablo, kadogayte kami boo rateng sa Mitilini.
[15] Panaw wakay asin, paka goribas rateng sa betek Kiyos, goribas wakay sa Samo, goribas wakay sa Milito.
[16] Pablo keyen, Ayaw wa paya domalan sa Ipiso, matang yewed aglimbang sa Asya. Angkataw siyo agkalaliyan, agpilit agrateng sa Irosalim ikkay ibeng Pintikostis.
[17] Sa Milito Pablo agsogo merya sa mga koyay sa barkadaan mga bodang Diyos sa Ipiso.
[18] Paka siro rateng, siyo miplaong keyen, Kamo katawan in boo kangay mga ogali no kataw nakay, ibat sa ibeng tangona ako rateng atai sa Asya.
[19] Kamayba lakonaw in kangay mga kaidapan batang sa mga remrem daet in mga Odyo, ako agpakabwatte remrem in ako agpanawen anggan agpanangis sa panawen in Kapwan.
[20] Kanyo atawanan in ako agpatoldo sa kanyo ako yewed agkarikoy agsabi kamayba nakay in makamaal sa kanyo. Ako agpatoldo sa kanyo sa mga tiponan, kadayo sa kanyo mga balay.
[21] Kadayo sa mga Odyo, kadayo din sa mga yewed Odyo ako agpilit keyen, Benglayen wa in kanyo mga daet, pasabangen wa sa Diyos, pasandig sa kantam Kapwan IsoKiristo.
[22] Kalbas baanda ako piyagsogo in Abyan pataboy sa Irosalim. Saken no ako batay niyakay ista,
[23] kamay sa baatte bayan kangay diyalan in Betek pag Abyan agsabi sa kangay keyen ako batay piyagbilanggo sa Irosalim, batay piyagpaidapan.
[24] Kamay ako yewed agaman kangay boway, in kangay piyaglakonaw in panawen in tiyaboy in Kapwan Isos sa kangay. In kangay waget beet mibaloy wa ina in agpatoldo in Maal pag Barita keyen in Diyos agpakayawte.
[25] Ako batang agipanawan agpatoldo sa boo mangyan in Diyos agpapoon, kamay ngona ako katawan kangay bilog idbatay wakay ngiitan, kamayba nakay sa kanyo.
[26] Na ngona in kangay piyagsabi, kamayba nakay sa kanyo no siyo yewed piyaboway na yewed sa kangay in daet,
[27] angkataw ako idbatang agkarikoy agpatoldo sa kanyo in boo remrem Diyos kansiyo batay piyangwat.
[28] Kanyo alapeten in kanyo bayo pag boway, osai in sa boo mga agpaniwala, in piyaalapet in Betek pag Abyan sa kanyo. Kanyo ngani alapeten in barkadaan mga bodang Diyos, in kansiyo biili in bayad in katayan kansiyo daan Bodang.
[29] In kangay atawanan, isag paka ako idapo wa atai, apo batay rateng sa kanyo mga matapang pag mangyan kagwali mga balagis, batay agsida sa barkadaan mga bodang Diyos.
[30] Dogayan apo din batang sa kanyo mga batay agpatoldo mga yewed totoo. Siro batay agpamaakay sa mga agpaniwala.
[31] Na kamo agingat. Ayaw agkanawey ako tolo ka dagon kadayo ibeng kadayo yabi ako yewed aglimbang agpatoldo sa kanyo boo, anggan agpanangis.
[32] Ngona kamo kangay piyagpaalapet sa Diyos, osai sa barita keyen siyo agpakayawte wano. Siyo kabaloy agpakaeyat sa kanyo, osai kataboy sa kanyo in boo maal in kansiyo siyandata sa boo kansiyo mga mangyan.
[33] Ako idbatang agamag kowarta, mga sangkap, mga damit, kamayba kay nakay.
[34] Kamo katawan ako wakayte in agpamangkit kowarta, sibay sa kangay mga kailangan, anggan din sa kangay mga sarig.
[35] Sa baatte kabetek kangay piyapangkit sa kanyo kailangan kitam kataw ina ageyat agpanawen matang agtolong sa mga idapo eyat. Remremen in agiplaong Isos in Kapwan, in siyo keyen, Osai in agtaboy, osai in piyagpakan, in agtaboy agbangen in agkaanggay.
[36] Paka Pablo kalbas wa agiplaongan, siro boo omaron pasongo. Siro piyandalangin Pablo.
[37] Siro boo agpanangis. Pablo kansiro piyagkapet, piyagpakayawte.
[38] Kaya siro maloba agrongkot, panawen sa kansiyo siyabi keyen, Kamo idbatay wakay kangitan kangay bilog. Kalbas siyo kansiro siyarig sa mapor.