[1] Paka kadalan lima ka ibeng pataboy sa Sisariya Ananiyas in mabwat pag poon sa mga sasirdoti, sarig in kalaati pag mga koyay, sarig din osai ka katawan gayed agmatiwid in ngaran Tirtolo. Pablo kansiro siyombong kay Gobirnador Pilis.
[2] Paka Pablo piyalowas wa, piyarakay wa Tirtolo in agsombong. Keyen in kansiyo siyabi, Laki Gobirnador Pilis, kao lakonaw, kaya kami apyaan atai pag kobat panawen kao katawan wano agpapoon. Dogay wa kaimo piyagpakapya in boway sa kanyam kobat, matang ngona badya wa maal.
[3] Ina kanyam atawanan matang kamayba saano kao baatte kanyam piyagkaanggayan.
[4] Kamay karam kao apo panawen. Kamay kataw kao mabait wano, na kao mamarengey kadogayte waget sa kanyam piyagsabi sa kaimo.
[5] Kanyam ngiitan ina pag Pablo aleleng, agpanggolo sa mga Odyo sa boo mga kobat. Siyo agpapoon sa panig in mga Nasarino.
[6] Osai din kansiyo nges piilit agpanrames sa balay lakoy Diyos, matang siyo kanyam diyakep.
[8] Na siyo kaimo wa tanongen. Kaimo batay atawanan totoo in boo kanyam mga siyabi panawen sa kansiyo.
[9] Ina in siyabi Tirtolo. Kalbas in mga Odyo agiyayon sa kansiyo sombong. Siro keyen, Boo betek in kansiyo siyabi.
[10] Paka Pablo piyaiplaong in gobirnador siyo keyen, Laki Gobirnador, kangay atawanan kao dogay wa tanongan sa mga mangyan atai pag kobat, matang ako agkaanggay agaman kangay boway sa kaimo adap.
[11] Sogod ako rateng sa Irosalim matang agsamba anggan ngona na labing dowai waget ka ibeng. Ina toloy batay kaimo atawanan no kao agtanong.
[12] Ako yewed kansiro ngiitan agpalsisagotan kamayba kay nakay sa galem balay lakoy Diyos. Ako idapo din agrengke manggolo sa mga balay pagpaniponan mga Odyo, kamayba sa nakay pag betek sa bayan.
[13] Siro idapo din asabi patonay nges sa kansiro mga pasaen sa kangay.
[14] Kamay anda in kangay piyagamin, in ako agsamba sa Diyos in piyagmaal tangona kanyam mga kakoyayan, na in kangay piyagpaniwalaan in Adar Isos. Kamay in mga agpasaen sa kangay keyen ina baribid pag adar. Bago kangay din piyagpaniwalaan in boo mga Batas Mowisis osai in mga siyolat in mga poropita.
[15] In kangay piyagpanaya sa Diyos kataw din in kansiro, in batay wakay piyaboway Diyos in boo mga mangyan, kadayo in mga maal kadayo in mga daeten.
[16] Matang ako baatte agpilit agpangwat maal sa pangkit Diyos kadayo din sa mga mangyan matang apyaan in kangay remrem.
[17] Apo mga dagon ako idapo sa Irosalim. Kalbas ako moli wakay ista agbaba tolong sa mga agkaidapan sa kangay mga kabelagan mga kasokponan Israil, osai agandog mga ayop sa Diyos.
[18] Kangay wa piyangwat in ogali aglobos pangako, kalbas ako kansiro ngiitan sa galem balay lakoy Diyos. Yewed karowan in asin mangyan, idapo din agkagolo.
[19] Kamay apo asin mga Odyo taga Asya. No siro apo ngiitan daet sa kangay, na siro wa nges in atai pataboy agsombong sa kaimo.
[20] No yewed in mga mangyan atai in agsabi no nakay in kansiro ngiitan sa kangay daet in ako taite piyagosap kansiro mga tanongan.
[21] Karam kansiro remrem keyen daeten in kangay mango sa adap in mga tanongan keyen, Kaya ako kanyo piyagpadaet ngona panawen sa kangay atawanan in mga matay batay wakay piyaboway.
[22] Lakonaw in kay Pilis atawanan panawen sa Adar Isos, matang kansiyo wa piyaempet in osap keyen, No rateng wa atai in Kapitan Lisiyas na kangay batay piyagremrem in kanyo osap.
[23] Kalbas in kapitan siyogo Pilis keyen, Pablo damayen, kamay ayaw maloba, osai ayaw agayawen in kansiyo mga pagbelag agtolong sa kansiyo.
[24] Paka apo wakay mga ibeng diyalan, rateng wakay Pilis osai in kansiyo babai in ngaran Dorosila, siyo Odyo. Kalbas biyerya wakay Pablo. Kansiro piyarengey in piyagsabi Pablo panawen sa agpaniwala kay Kiristo Isos.
[25] Kamay paka kay Pablo piyagpaliwanag in agpangwat in betek, osai in agsakop sa kantam remrem, kadayo in parosa agrateng, na Pilis alimowan wa, toloy keyen, Kao panaw wa. No ako katokor wakay na kao piyagberya wakay.
[26] In remrem Pilis siyo batay piyakan Pablo kowarta matang makakarowan Pablo piyagberya agbarogi wakay.
[27] Kadalan wa dowai ka dagon piyalitan wa Pilis. Porsiyo Pisto wakay in gobirnador. In beet Pilis in mga Odyo agkaanggay daan sa kansiyo matang Pablo biyaliwan sa bilanggowan.