[1] Laki Tiyopilo, sa tokaw pag aklat kangay siyolat in boo piyangwat Isos, osai piyatoldo, sogod siyo agparakay agpanawen,
[2] anggan sa ibeng siyo piyaonaik sa ogbos. Bayo siyo piyaonaik, sa kabaloyan in Betek pag Abyan, kansiyo piyabilinan in mga katiwala kansiyo iidang.
[3] In Isos batang wa matay siyo makakarowan wakay papangkit sa kansiro, siro kangitan ngani siyo boway wakay gayed. Apatnapo ka ibeng apo ibeng kansiro piyagngitan. In kansiyo piyagbarogi in Diyos agpapoon.
[4] In betek siyo agaway kay sa kansiro siyo agbilin keyen, Ayaw agipanaw sa Irosalim, panayaen in kangay siyabi sa kanyo, in piyangako kangay Amang Diyos.
[5] Angkataw Owan ngani agpansogbo sa sapa. Kamay idwa dogay kamo batay siyogbo sa Betek pag Abyan.
[6] In agkatipon Isos osai in kansiyo mga katiwala siro agtanong sa kansiyo keyen, Laki Kapwan, ngona daan lames in sakopan kaimo wakay piyagpaoli sa mga kasokponan Israil?
[7] Siyo keyen, Yewed maal kamo in katawan in mga kabetek, in mga tarato. Ina sa Diyos Amang, siyo waget in apo kabaloyan agpangwat tarato.
[8] Kamay paka rateng wa sa kanyo in Betek pag Abyan, kamo kansiyo batay piyakan kabaloyan, kalbas kamo batay agbarita panawen sa kangay sa Irosalim, sa boo Odiya, sa Samariya, anggan sa boo kobat.
[9] Paka masabi wa ina, siyo piyaonaik wa sa ogbos, piyaganggatan daan in mga katiwala, anggan siyo biyengbeng wa libo, idwa piyagngitan.
[10] In siyo agonaik siro agtangra kay sa langit, toloy apo dowai ka kaliyakiyan maboksi in lambong agtaydek asin sa kansiro bangen.
[11] In dokalaki miplaong keyen, Laki mga taga Galiliya, nakay batang kamo agtaydek, agtangra sa langit? Isos in kiyowa sa kanyo, piyaonaik sa langit, siyo daan in batay wakay atai pataboy, kataw daan in kanyo ngiitan siyo ista agonaik sa langit.
[12] Kalbas in mga katiwala panaw wa sa boksor Olibowan. Ina bangen sa Irosalim, kadogay agnganga in agipanaw. Siro moli wakay sa Irosalim.
[13] Siro in osai Pidro, in kadowai Owan, in katolo Santiyago, in kaopat Anris, in kalima Pilipi, in kaenem Tomas, in kapito Bartolomi, in kawalo Matiyo, in kasiyam Santiyago bodang Alpiyo, in kasampo Simon in ribildi, in kalabing osai Odas bodang Santiyago. Paka siro rateng wa sa Irosalim, siro monaik sa ogbos pag basag sa balay kansiro pagpamatawan.
[14] Siro boo agpalpandalangin waget, kadayo in mga kagbaiyan, anggan Mariya in inang Isos, osai in kay Isos mga belag kaliyakiyan.
[15] Idwa dogay in mga agpaniwala agkatipon, mga 120 ka mangyan. Kalbas Pidro tomaydek, miplaong keyen,
[16] Laki mga belag, kailangan mibaloy in mga Agisolat, in dodo in siyabi tangona Dabid, in siyo piyaiplaong in Betek pag Abyan. Na ina pag kansiyo siyabi panawen kay Odas in agpatoldo dalan sa mga agdakep kay Isos.
[17] Odas tangona sarig daan kitam, piyakan din bagiyan atai pag panawen.
[18] lTna pag Odas komwa osai ka poro kobat, in bayad in kowarta batang bayad kansiyo tiyampalas. Kalbas siyo malabo agisongkok, malto in boyon, maripatak in pena.
[19] Ina atawanan in boo mga agbalay sa Irosalim, anggan ina pag kobat piyagawit Akildama sa kansiro agiplaong. In beet siyabi Gimai.)
[20] Pidro keyen kay, Na sa aklat Mga Awit Dabid apo siyolat keyen, In pagoliyan ina ayaw wa agalapeten. Ayaw apo asin agpamataw kamayba nakay. Apo din Agisolat keyen, In kansiyo panawen osai wakay in komwa.
[21] Pidro keyen kay, Na in kanyam mga sarig taite in boo betek in Kapwan Isos agipanawan osai kitam,
[22] sogod sa Owan agbaotismo anggan sa ibeng Isos kiyowa sa kantam, na kailangan in osai miyanggat wa sa kanyam, agbarita keyen siyo kangitan ngani Isos boway wakay.
[23] Kadogayte kansiro iidang dowai ka kaliyakiyan, in osai Matiyas, in osai Osi piyagawit Barsabas no yewed Osto.
[24] Kalbas siro maypandalangin keyen, Laki Kapwan, kao katawan in remrem in boo mga mangyan, na kaimo sabiyen no nakay agbangen in kaimo iidang atai pag dowai ka mangyan,
[25] matang siyo kaimo wa katiwala, sa kansiyo wa in panawen biyenglay Odas, in Odas ista pataboy sa pagidapan sibay sa kansiyo.
[26] Kalbas in dokalaki kansiro piyostaan. Matiyas in mandaeg, kalbas siyo piyangwat wa katiwala, siyo wakay in kalabing dowai.