[1] Paka siro maypolong wa kami batay wa piyataboy sa kobat Italya, Pablo piyaalapet kay Kapitan Olyo, osai in amat pag mga biilanggo. Olyo taga Roma, osai ka kapitan sa barkadaan mga sondalo piyagawit kay Poon Lakoy Sisar Barkadaan.
[2] Kami piyasakay sa mapor batang sa Adramitiyo batay wa panaw agtaboy sa mga bayan sa balabaan dagat sa kobat Asya. Kami panaw wa. Kanyam sarig Aristarko osai ka taga Tisalonika sa kobat Masidonya.
[3] Kagoribasan kami rateng sa bayan Sidon. Kapitan Olyo agpakayawte kay Pablo, siyo pomayag Pablo patagbo sa kansiyo mga pagbelag asin matang siyo piyakan in kansiyo mga piyagkailangan.
[4] Kami somakay wakay, panaw wakay asin kami pasaog badyate agbalaba sa kobat Sipri, angkataw kami piyagtagbo kowaya.
[5] Paka madalan wa in dagat sa betek Silisya osai Pampilya kami rateng sa Mira, osai ka bayan sa kobat Lisiya. Kami lompot wa.
[6] Ista ngiitan Kapitan Olyo in osai ka mapor batang sa Aliyanriya, batay agtaboy sa Italya. Kalbas kami asin wakay piyasakay.
[7] Mainaen in agipanaw, karowan kayte ka ibeng kami agkaidapan bayo rateng sa betek bayan Kinido. Kataw kami piyagtagbo kay in kowaya, kami pabaribid pasaog agbalaba sa kobat Kirita sa betek Salmon.
[8] Kami aidapan agbalaba anggan kami rateng sa bayanan piyagawit Maal pag Saogan, bangen sa bayan Lasiya.
[9] Kami mipadogay anggan makalimo wa in agipanaw sa dagat angkataw bangen wa in pamagyo, kadalan wa in Ibeng Agdaing sa Diyos in Yewed Agpamangan pag ibeng. Matang siyabi Pablo sa kansiro keyen,
[10] Mga laki, kangay atawanan no kitam agipanaw kay na ablayan, aronaw in batay masida, apo din batay maidapo mga palnowan kadayo in mapor, osai apo din batay mga matay sa kantam.
[11] Kamay in Kapitan Olyo yewed maniwala sa siyabi Pablo, dayem sa siyabi in kapwan mapor osai in agpapanaw.
[12] Osai din ina pag bayanan yewed maal pag pagpamatawan anggan kalbas wa in mga bolan pamagyo, matang siyabi in karowan keyen, Dali kay, karam kitam karateng sa bayan Pinisi. Ina osai ka saogan mapor sa kobat Kirita yewed piyagdalanan kowaya bagyo matang maal pag pagpamatawan.
[13] Paka agaroros batang sa dagat kansiro remrem keyen maal wa kitam panaw, matang kansiro wa giyoyod in tidik apo kawit, kalbas agipanaw agbalaba sa kobat Kirita.
[14] Kamay yewed kayte dogay lomwas lakoy in bagyo piyagawit Yorakolon batang sa agbaw.
[15] In mapor piyagbogbog kowaya, idwa kabaloy lomaban, matang kami padaeg wa, pababa wa sa kowaya.
[16] Kami biyaba kowaya mipasaog sa osai ka porote piyagawit Kalaoda. Kalbas kanyam piyaonaik piyasakay sa mapor in bangkate kamayba maidap.
[17] Paka mapaonaik wa ina, in mapor piyagbekkes wa robid lakoy. Siro agkalimo batay midonggol sa yewed malayem sa bangen kobat Libya matang kansiro piyalompot in torda lakoy agitaydek, kalbas palimes waget.
[18] Maloba kay in bagyo matang kagoribasan siro agparakay agbenglay sa dagat in mga palnowan.
[19] Kalbas kagoribasan kay kadayo in kalaati gamit sa mapor biyenglay wa din.
[20] Aronaw wa pag mga ibeng aglened waget, kadayo magirem idapo piyagngitan, osai agaway kay in bagyo maloba wano, matang in kanyam remrem kami idbatay wa boway.
[21] Paka dogay wa yewed agpalpamangan in mga mangyan sa mapor, Pablo tomaydek kalbas miplaong keyen, Mga laki, no nges kamo maniwala taite sa kangay siyabi, no nges kitam yewed panaw sa Kirita, na kitam idbatay aratengan kaidapan kataw tai.
[22] Kamay ngona pakaeyaten ngani in kanyo remrem angkataw idapo batay matay sa kantam, kamaybawa osai waget. Kamay in mapor batay masida wa gayed.
[23] Angkataw karai yabi papangkit sa kangay osai ka angil batang sa Diyos kangay Kapwan, in kangay piyagpaniwalaan.
[24] Kansiyo siyabi keyen, Ayaw agkalimo, laki Pablo. Kao batay ngani paadap sa Poon Lakoy Sisar. Osai angkataw kao piyagpakayawte in Diyos, in boo kaimo mga sarig sa mapor batay kansiyo piyagpaboway.
[25] Na laki mga laki, pakaeyaten in kanyo remrem, angkataw ako agpasandig sa Diyos keyen batay ngani mibaloy in boo kansiyo siyabi sa kangay.
[26] Kamay in mapor batay mibenglay sa osai ka poro.
[27] Sa kalabing opat wa ka yabi kami piyagbagyo sa dagat Adriyatiko, paka kagwaraan wa yabi in remrem in mga agpapanaw sa mapor keyen tomag bangen wa in kobat.
[28] Kansiro siyokat in kalayemen in sapa, dalwampo ka depa. Ista kayte siyokat wakay, labing lima waget ka depa.
[29] Siro agkalimo in mapor batay mibalbay sa mga bato lakoy matang kansiro liyabo opat ka tidik apo kawit sa paori. Kalbas mandalangin keyen agkaboka wa nges.
[30] In mga agpapanaw sa mapor batay nges maypandalagan sa mapor, matang kansiro piyalooy in bangkate. Siro agpakagwali batay aglabo tidik apo kawit sa tokawan.
[31] Kamay siyabi Pablo kay Kapitan Olyo osai sa mga sondalo keyen, No ina pag mga mangyan panaw sa mapor na kamo idbatay boway.
[32] Matang tiyaras wa in mga sondalo in mga eket in bangkate, bayansiyo malabo sa dagat.
[33] Paka agkaboka wa siro boo piyagpilit Pablo malpamangan, keyen, Labing opat wa ka ibeng kamo agkariyaban, idapo kiyoman kamayba nakay.
[34] Kitam wa ngani mamangan, mga laki, matang kitam maeyat matang boway. Idapo batay maidapo sa kantam kamayba osai wagette ka abok.
[35] Paka siyabi wa ina Pablo, siyo komwa pamangnen kalbas mandalangin agkaanggay sa Diyos, siro boo karengey. Kansiyo piyandoros in pamangnen, mamangan wa.
[36] Siro boo piyakaeyat wa in remrem, kalbas siro din agkoman wa.
[37] Kami boo sa mapor 276 ka mangyan.
[38] Paka kami bosog wa kansiro wa biyenglay sa dagat in tera tirigo, matang langkay in mapor.
[39] Paka maboka wate siro apo ngiitan kobat kamay yewed kansiro atawanan no nakay pag kobat. Kamay kansiro ngiitan osai ka sokol apo bowanginan. In kansiro polong no kabaloy na ista wa patakdangen in mapor.
[40] Matang kansiro biyogloy in mga eket sa paori, biyaliwan wa sa galem dagat in mga tidik apo kawit. Kansiro din liyowat in eket sa mga tablate pampapeles, osai piyataydek in torda sa tokawan agbangen, matang in mapor biyaba nges kowaya sa bowanginan.
[41] Kamay in mapor midonggol sa kalayemte. In tokawan agbangen somaray wa sa bowangin, idwa apaglebey, in paoriyan agbangen piyagbalbayan sapa lakoy anggan agpangadodog.
[42] In remrem in mga sondalo bonowen wa in boo mga biilanggo, karam romangoy domalagan.
[43] Kamay siro yaayaw in Kapitan Olyo angkataw kansiyo beet Pablo ayaw agbonowen. Kansiyo siyogo in mga katawan romangoy lomokso wa sa sapa romangoy wa anggan sa balabaan.
[44] In amat wakay kansiyo siyogo miskapet sa mga tabla, no yewed sa mga towar batang sa mapor, palotang wa. Kataw ina kami boo rateng sa bowanginan boway daan.