[1] Paka kalbas in Ibeng Pamainga agpangaboka wa in ibeng Linggo in dokabai Mariya in taga Magdala pataboy sa lebengan osai in osai ka Mariya.
[2] Kalbas toloy lomoni lakoy. Apo angil siyogo in Kapwan lompot batang sa langit. Kansiyo liigan in bato lakoy bengbeng sa lebengan, ina kansiyo tiyokkawan.
[3] In kansiyo mata makasolap wa labi kagwali kilat, in kansiyo damit maboksi wa labi agbalawas.
[4] In mga agdamay pangkalimowan managelgey, mameypey kagwali wa matay.
[5] Keyen in angil sa dokabai, Ayaw alimowan. Ako katawan in kanyo piyagpamangkit Isos in piyako taite sa kodos.
[6] Kamay siyo idapo wa atai angkataw siyo boway wakay tagoli kataw in kansiyo siyabi. Maanda, kanyo pangkiten in kansiyo batang pagpabolalangan.
[7] Kamo ista wa agbarita sa kansiyo mga agadar keyen siyo boway wakay tagoli, siyo batay tokaw sa kanyo pataboy sa Galiliya. Ista siyo kanyo batay ngiitan. Dali wa, ayaw agpabeya. Ina wa, masabi wa in boo.
[8] Siro maykalaliyan wa panaw sa lebengan. Siro nges agkalimo kay kamay agkaanggay wano. Siro agdalagan wa gayed agtaboy sa mga agadar matang agbarita in mga mibaloy karai.
[9] Sa dalan kay siro tiyagbo wa Isos, siyo miplaong sa kansiro keyen, Kamo kagwali wa nakay? Siro pasabangen, omatang sa kansiyo bitis agmaal wano sa kansiyo.
[10] Isos keyen sa kansiro, Ayaw agkalimo. Dali wa, kamo ista wa sabiyen sa kangay mga pagbelag siro pataboy wa sa Galiliya. Ako kansiro batay ngiitan ista.
[11] Paka in dokabai panaw wa, in amat mga sondalo agdamay sa lebengan pataboy wa sa bayan lakoy. Kansiro biyarita sa mga poon sasirdoti in boo mibaloy.
[12] In mga poon sasirdoti osai in mga koyay maypolongan wa. Kalbas in mga sondalo kansiro piyakan lakoy kowarta.
[13] Siro siyogo keyen, Keyen in kanyo pansabiyen, Karai yabi in kami agesek, asin pataboy in mga agadar kay Isos, kansiro tiyakaw in kansiyo bilog.
[14] Keyen kay in siyabi, Kamayba ina rateng sa gobirnador kamo ayaw agkariyaban. Kami wa in baala asin.
[15] Kalbas kiyowa wa in mga agdamay in kowarta, piyangwat in bilin karai. Matang anggan ngona pag mga ibeng ina daan in piyagsabi in mga Odyo.
[16] In Labing Osai ka agadar pataboy wa sa Galiliya, sa boksor siyabi Isos sa kansiro.
[17] Paka siro maltagbowan wa, Isos kansiro piyagmaal wano, kamay in amat sa kansiro piyagbaslag kay in remrem.
[18] Kalbas Isos pasabangen sa kansiro keyen, Tiyaboy wa sa kangay in boo kabaloyan, kamayba sa langit kamayba sa kobat.
[19] Na kamo panaw wa, kanyo patoldowen in boo mga mangyan matang siro miyanggat sa kangay, baotismowanen sa ngaran in Amang, osai in Bodang, osai in Betek pag Abyan.
[20] Siro kanyo patoldowen maniwala sa boo kangay piyatoldo sa kanyo. Kamo ayaw anaweyan, ako palagi kanyo sarig anggan sa idapo kalobosan.