[1] Isos agiplaong kay keyen, Kamayba nakay pag mangyan ayaw kantam agremremen kalakoyte, matang kitam idbatay din piyagremrem Diyos kalakoyte.
[2] Angkataw no nangkalakoy in kantam remrem sa roma, na kalakoy din ina in batay remrem Diyos sa kantam, no nakay in kantam piyasibay sa roma, na kalakoy din ina in batay piyasibay Diyos sa kantam.
[3] Nakay batang kaimo piyagngitan in sepet sa mata kaimo belag, bago in yangaw lakoy agiskapet sa kaimo agbangen mata idwa kaimo piyagngitan?
[4] Nakay batang kao agpangaas agsabi sa kaimo belag keyen, Amba aywawa, kangay wa kowaen in kaimo sepet, bago in sa kaimo din mata apo lakoy yangaw agiskapet?
[5] Kao agpakagwali waget agpaniwala. Tokaw kay kowaen in yangaw agiskapet sa kaimo mata, na batay wa kangitan gayed maal, in agkowa in sepet sa kaimo belag.
[6] In mga piyagtalaga sa Diyos ayaw kanyo taboyen sa mga tito, kataw isag kamo siyonggaban, piyangayat. In kanyo mga bogway ayaw agbenglayen sa mga beyek, isag kansiro waget piyanlaedan.
[7] Isos keyen kay, Kamo mangayay sa Diyos, kamo batay piyagpakan, mamangkit wa, kamo batay kangitan, merya wa, kamo batay piyaonaik.
[8] Angkataw in mangayay batay piyakan, in mamangkit batay kangitan, in merya batay piyaonaik.
[9] No agayay tinapay in kanyo bodang, na nakay, idbatay kanyo piyakan bato, Aon?
[10] No agayay isda, na idbatay kanyo piyakan olay, Aon?
[11] Na no kamo kamayba daeten katawan agtaboy maalno sa kanyo mga bodang, na labi kay in kantam Amang sa langit, siyo batay agtaboy in mga maalno sa mga agayay sa kansiyo.
[12] In kanyo beet pangwaten sa kanyo in roma, na kanyo din pangwaten sa mga roma. Ina in beet siyabi in mga Batas Diyos osai in piyagpatoldo in mga poropita.
[13] Isos keyen kay, Misoroy sa kalakoyte pag sakbawan alabat, angkataw in sakbawan agtaboy sa toyongan maslang, in dalan agtaboy sa toyongan bolaos. Karowan in asin agdalan.
[14] Kamay in sakbawan agtaboy sa boway kalakoyte, in dalan agtaboy sa boway rikot. Korangte in kangitan ina pag dalan.
[15] Isos keyen kay, Agingat sa mga agpakagwali waget poropita. In agrateng sa kanyo siro kagwali topa mabait, kamay in kansiro remrem kagwali bangaw matapang.
[16] Siro kanyo batay atawanan panawen sa kansiro daeten pag mga ogali. In talonyong idbatay manggalem bayabas, tagotong idbatay manggalem kapi.
[17] No maalno in poon yangaw, na maalno din in raweg, kamay in daeten pag poon yangaw, na daeten din in raweg.
[18] In maalno pag yangaw, idbatay manraweg daeten, osai in daeten pag poon yangaw idbatay manggalem maalno.
[19] Kamayba nakay pag poon yangaw, no yewed agpanggalem maalno na batay piyagpokan, piyagtebed sa baya.
[20] Na ngani in mga agpakagwali waget pag mga poropita kanyo batay atawanan panawen sa kansiro mga ogali.
[21] Isos keyen kay, Karowan in mga agpangawit sa kangay keyen, Kapwan, Laki Kapwan, kamay siro yewed batay boo bodang Diyos, dayem in mga agogali in beet kangay Amang sa langit.
[22] Dogayan sa kalobosan pag Ibeng aronaw in batay agsabi sa kangay keyen, Laki Kapwan, panawen sa kaimo kami tangona agbarita in kaimo piyagsabi, osai sa kaimo kabaloyan kami agboyaw din mga mamaw, osai in mga idbatay mipangwat kanyam piyangwat.
[23] Kalbas kangay wakay siyabi sa kansiro keyen, Bali wa kamo mga agpamangwat daet. Kamayba nangkadogay ako yewed katawan sa kanyo.
[24] Isos keyen kay, Na no nakay pag mangyan in agparengey atai sa kangay mga piyagsabi, kalbas kansiyo piyagpangwat, na siyo kataw in osai ka mangyan apo katawanan, agtadyok kansiyo balay sa marigen pag diya.
[25] Kalbas toloy bomagyo, bomongkalos wa, in balay yoogyog kowaya. Kamay yewed maregnas, angkataw ina tiyadyok sa marigen pag diya.
[26] Dayem in agparengey atai sa kangay mga bilin, kamay yewed piyagpangwat, na siyo kataw in osai ka mangyan idapo bait, agtadyok kansiyo balay sa lakbowen pag diya.
[27] Kalbas toloy bomagyo, bomongkalos wa, in balay yoogyog kowaya, toloy maregnas wa gayed, idapo wa tera.
[28] Paka Isos kalbas wa agsabi ina pag boo, in mga karowan agpanremrem agkaanggay sa kansiyo agpatoldo.
[29] Siro keyen, Kami kansiyo piyagpatoldo kataw in osai ka apo kabaloyan, yewed kataw in mga agpatoldo in mga Batas Diyos.