[1] Keyen Isos, In kabetek ako in Bodang Mangyan agrateng batay agpoon lakoy, kataw anda in alimbawa. Apo sampo ka daraga lomabo sa balay, in baatte osai apo kansiyo tinglaw. Siro agtagbo sa kaliyakiyan batay kiyasal.
[2] In lima katawanan, in lima wakay idapo bait.
[3] -
[4] In mga katawanan, siro agsandata langis karam maplek isag kansiro tinglaw, in mga wakay idapo bait idapo wa sandata langis.
[5] Dogay wano in agrateng in kaliyakiyan batay piyagkasal, anggan siro boo aesekan wa.
[6] Kalbas paka kagwaraan wa yabi apo wa ngani mango keyen, Agrateng wa in kaliyakiyan. Mipolaw wa, tagbowen wa.
[7] In sampo ka daraga toloy mipolaw, kalbas piyamalakonaw in igang kansiro mga tinglaw.
[8] Kalbas in mga idapo bait miplaong sa mga katawanan keyen, Kami agayayte kanyo langis, agkaplek wano kanyam tinglaw.
[9] Kamay keyen in mga katawanan, Na karam idbatay sibay sa kantam boo. In maal kay kamo panaw wa, kamo bomili kay sa tindaan.
[10] Matang in lima ka daraga idapo bait toloy wa lomabo. Siro agbili kay rateng wa in kaliyakiyan batay piyagkasal, in lima ka daraga sandata daan, siro wa in kansiyo sarig monaik sa balay apo kainan. Kadogay toloy wa biyengbeng in sakbawan.
[11] Kalbas rateng wakay in lima ka daraga idapo bait. Siro agpango keyen, Laki, kami din paonaiken.
[12] Kamay keyen in kaliyakiyan, Nakay pag mga mangyan kamo? Ako yewed katawan sa kanyo.
[13] Keyen Isos, Na ngam kamo agdamay, angkataw yewed kanyo atawanan in ibeng osai in kabetek.
[14] Keyen Isos, In ako in Bodang Mangyan agpoon kataw din osai ka mangyan batay panaw batay sa adayonaw. Kansiyo biyerya in kansiyo mga sogowan, kalbas kansiyo piyaalapet sa kansiro in kansiyo mga kasangkapan.
[15] In baatte osai piyakan kowarta sibay sa kansiyo batay abaloyan. In osai piyakan lima ka libo ka piso, in kadowai dowai ka libo ka piso, in katolo in tiyaboy osai ka libo ka piso. Kalbas panaw wa in kapwan.
[16] In piyakan lima ka libo ka piso toloy wa agpanawen agtinda anggan siyo kaabel wakay lima kay ka libo ka piso pakinabang.
[17] Kataw din ina in piyangwat in piyakan dowai ka libo ka piso. Siyo kaabel din pakinabang dowai kay ka libo ka piso.
[18] Kamay in piyakan osai ka libo ka piso lompot wa, toloy agkali sa diya, kansiyo wa biyetang in kowarta tiyaboy in kapwan.
[19] Paka dogay wa naw moli wakay in kapwan ina pag mga sogowan. Siro piyagbotog wa.
[20] Kalbas pasabangen in piyakan lima ka libo ka piso, agbaba din in pakinabang lima wakay ka libo. Siyo keyen, Laki, anda daan in lima ka libo ka piso kaimo piyaalapet sa kangay. Anda wakay in pakinabang kangay abel lima din ka libo.
[21] Keyen in kapwan, Aa yadi. Kao maal pag sogowan yewed aglimbang. Angkataw kao maalno pag paalapetan in kalakoyte, na kao kangay batay piyagpaalapetan in lakonaw. Aywawa, kita wa agpalkaanggay.
[22] Pasabangen din in piyakan dowai ka libo ka piso, keyen, Laki, anda wa in dowai ka libo ka piso kaimo piyaalapet sa kangay. Anda wakay in pakinabang kangay abel dowai din ka libo.
[23] Keyen in kapwan, Aa yadi. Kao maalen pag sogowan yewed aglimbang. Angkataw kao maalno pag paalapetan in kalakoyte, na kao kangay batay piyagpaalapetan in lakonaw. Aywawa, kita wa agpalkaanggay.
[24] Pasabangen wakay in piyakan osai ka libo ka piso. Siyo keyen, Laki, kangay atawanan kao matapang pag mangyan. Kao agani sa yewed kaimo tiyogda, kao agbetang sa yewed kaimo liyayap.
[25] Ako agkalimo, matang kangay wa biyenben sa diya in kaimo kowarta. Anda daan in kaimo osai ka libo.
[26] Keyen in kapwan, Kao pag sogowan, aleleng, bibelen. Kao nges mana katawan ako agani sa yewed kangay tiyogda, ako agbetang sa yewed kangay liyayap.
[27] Na nakay batang yewed kaimo liyabo sa bangko in kangay kowarta matang in ako rateng wakay apo wa pakinabang?
[28] Kalbas siyabi wakay sa kansiyo polis keyen, Dali wa, kowaen wa sa kansiyo in osai ka libo. Taboyen wa sa apo sampo ka libo.
[29] Angkataw no siyo in apo na piyagpakan kay, anggan karowan wa gayed. Kamay no siyo in idapo, na kadayo in baywi kay sa kansiyo piyagkowa wa din.
[30] Ina pag sogowan in idapo kabolowan benglayen wa sa lened. Ista wa siyo batay maloba agpanangis anggan agtogait in kansiyo ngipen.
[31] Keyen Isos, Batay rateng in Bodang Mangyan piyagpalowas wa in kansiyo kalakoyen, piyagpaanggat in boo kansiyo mga angil. Kalbas siyo batay tomokkaw sa kansiyo pagpanokkawan lakoy agpoon.
[32] Kalbas in boo mga mangyan batay piyagtipon sa kansiyo bangen, siro kansiyo batay piyagpalsowayan kataw in agalapet topa, kansiyo piyagpasoway sa topa in mga kambing.
[33] In mga topa batay sa pamalang agbangen, in mga kambing sa tagwala agbangen.
[34] Kalbas batay siyabi in Poon lakoy sa mga mangyan sa kansiyo pamalang agbangen keyen, Mga Laki, kamo in mga piyakaanggay kangay Amang, aywawa, kamo wa in agkapwan sa sakopan siyandata sa kanyo ibat tangona kay naw in piyangwat in kobat.
[35] Angkataw in ako agkayawes kanyo piyakan pamangnen, in ako agkainem kanyo piyakan sapa, in ako taga adayonaw kanyo piyakan esekan.
[36] In ako idapo wa damit kanyo piyakan, in ako apo maskit ako kanyo piyagalapet, in ako piyagbilanggo ako kanyo piyagtolong.
[37] Kalbas ina in maalno pag mga mangyan batay somagot keyen, Laki Kapwan, kao idbatang kanyam ngiitan agkayawes kalbas kanyam piyakan pamangnen, no yewed agkainem kalbas kanyam piyainem.
[38] Kao idbatang kanyam ngiitan taga adayonaw kalbas kanyam piyakan esekan, idapo din batang idapo damit kalbas kanyam piyakan.
[39] Kao idbatang kanyam ngiitan apo maskit no yewed piyagbilanggo kalbas kanyam tiyolong.
[40] Batay wakay keyen in Poon lakoy, Totoo ngani in kangay piyagsabi sa kanyo, in kanyo piyangwat ina sa kangay mga belag piyagpakalakoyte, na ina sa kangay wa daan kanyo piyangwat.
[41] Kalbas in Poon lakoy batay wakay keyen sa mga mangyan sa kansiyo tagwala agbangen, Kamo in mga piyanompaan, bali wa kamo. Ista wa kamo sa baya idbatay matay, in siyandata sa diyablo osai sa kansiyo mga mamaw.
[42] Angkataw in ako agkayawes ako yewed kanyo piyakan pamangnen, in ako agkainem ako yewed kanyo piyakan sapa.
[43] In ako taga adayonaw ako yewed kanyo piyakan esekan, in ako idapo damit ako yewed kanyo piyakan, in ako apo maskit, osai piyagbilanggo ako yewed kanyo tiyolong.
[44] Siro batay somagot keyen, Laki Kapwan, Kao idbatang kanyam ngiitan agkayawes, agkainem, taga adayonaw, idapo damit, apo maskit, piyagbilanggo, kalbas kao idwa kanyam tiyolong.
[45] Kalbas in Poon lakoy batay wakay keyen sa kansiro, Totoo ngani in kangay piyagsabi sa kanyo, in kamo dayo agtolong sa kangay mga belag piyagpakalakoyte, na sa kangay wa daan kamo dayo agtolong.
[46] Ina pag mga dayo agtolong batay piyataboy sa parosa idbatay lobos, kamay in maalno pag mga mangyan batay piyakan boway idbatay din lobos.