[1] Kadogay siyabi Isos sa mga mangyan, kadayo sa kansiyo mga agadar
[2] keyen, In mga agpatoldo in mga Batas osai in mga Parisiyo, kansiro tongkolin in agpaliwanag in mga Batas Mowisis.
[3] Na kanyo pangwaten in kansiro mga piyagpatoldo, maniwala sa kansiro mga batas. Kamay ayaw kanyo agtoladen in kansiro mga ogali. Baina yewed kansiro piyagpangwat in kansiro mga piyagpatoldo.
[4] Siro agimis in mabyat pag panlowan, piyagpababa sa mga mangyan, kamay siro dayo mamaglebey kamaybate in solo, dayo agtolong agpaleteng.
[5] In boo kansiro mga piyagpangwat piyagpapangkit waget sa mga mangyan. Baina piyagpakaslang in mga pagsoroyan mga agiplaong Diyos piyagbekkes sa kansiro mga kiray. Osai piyagpakaaba in agisokbit sa kansiro mga lambong.
[6] Sa mga piyasta kansiro piyagkaanggay in agtokkaw sa lakonaw pag panokkawan bangen in agpapoon. Osai siro agkaanggay agtokkaw sa maal pag panokkawan sa mga balay pagpaniponan.
[7] Siro agkasadapan no siro piyagawit keyen, Agpatoldo. Kansiro piyagkasadapan in siro piyagpakalakonaw in mga mangyan sa mga bayan.
[8] Kamay kamo ayaw agamag sa pagawitan keyen Agpatoldo, angkataw osai waget in kanyo Agpamatoldo, kamo boo tayariyan.
[9] Osai ayaw kanyo agawiten Amang kamayba kay nakay atai sa kobat, angkataw osai waget in kanyo Amang, in Amang sa langit.
[10] Ayaw din kamo agamag sa pagawitan Poon, angkataw osai waget in kanyo Poon, siyo in Kiristo.
[11] In piyagpakoyay sa kanyo kailangan siyo kanyo sogowan.
[12] In agpakabwat batay piyakabwatte. In agpakabwatte batay piyakabwat.
[13] Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Kanyo piyageleg in dalan Diyos, matang in mga mangyan yewed kapasakop sa Diyos. Kamo dayo pasakop sa Diyos kalbas kanyo din piyageleg in dalan matang in mga batay nges pasakop agkaeleg.
[15] Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Kanyo piyagliblibok in boo kobat piyagpotol din in dagat agpamangkit kamayba osai waget ka yewed Odyo kanyo piyagpaakay miyagem sa paniwala mga Odyo. Kalbas paka mipaagem wa, siyo kanyo piyagpangwat labi kay daet sa kanyo.
[16] Maloba in batay parosa sa kanyo. Kamo agakay nges sa mga beleg, bago kamo din beleg. Kamo agpatoldo keyen, No in mangyan manompa keyen kamayba wakay sa balay lakoy Diyos, na kamayba idwa kansiyo piyangwat in kansiyo panompa. Kamay no siyo manompa keyen kamayba wakay sa ginto sa balay lakoy Diyos, na kailangan ngani pangwaten in kansiyo panompa.
[17] Kamo mga beleg, mga idapo atawanan. Yewed piyaglakonaw in ginto, no yewed in balay lakoy DiyoS, angkataw panawen asin kaya in ginto piyagtalaga sa Diyos.
[18] Osai kanyo piyagpatoldo keyen, No in mangyan manompa keyen, kamayba wakay sa pagpanonogan andog, na kamayba idwa piyangwat in kansiyo panompa. Kamay no siyo manompa keyen kamayba wakay sa andog piyagsonog, na kailangan ngani pangwaten kansiyo panompa.
[19] Kamo beleg ngani. Yewed in andog in lakonaw, no yewed in pagpanonogan, angkataw panawen asin kaya piyagtanggap Diyos in andog.
[20] Na ngani, in siyo agpanompa keyen kamayba wakay sa pagpanonogan andog, na in beet siyabi yewed waget in pagpanonogan no yewed kadayo in boo asin piyagandog.
[21] Osai in siyo agpanompa keyen kamayba wakay sa balay lakoy Diyos na ina yewed waget in balay no yewed kadayo in Diyos in agpamataw asin pag balay.
[22] Osai in siyo agpanompa keyen kamayba wakay sa langit na in beet siyabi in pagpanokkawan Diyos sa langit, kadayo in Diyos wa daan in asin agtokkaw.
[23] -
[24] Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Baina kanyo piyagtaboy sa Diyos in kasampo ka bilog in mga baranoy, mga tanglad, mga golayen, kamay idwa kanyo piyagpangwat in lakonaw pag mga Batas, kataw in agpangwat in betek, in agpakayawte, osai in mabait. Kataw ina kanyo piyagkowa in neknekte sa kanyo batay piyaginem, kamay kanyo piyagtelen in kamilyo lakoy. In lakonaw pag mga Batas in kailangan ngani kanyo paniwalaen kamay ayaw din anaweyan in agtaboy in kasampo. Kamo ngani mga beleg pag agpaakay.
[25] Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Kanyo piyagogas in awak in lisap osai in palato, kamay in galem maakno kanyo mga piyagagaw, mga piyagtakaw.
[26] Kamo in mga Parisiyo beleg. Kanyo wa tokaw ogasen in galem agbangen in lisap osai in palato, na batay din malinis in awak.
[27] Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Kamo kagwali mga lebengan piyagpaboksi, maalen sa pangkit in awak, kamay sa galem boo wano marames, mga bitol mangyan matay.
[28] Kataw ina ngani kamo. Sa pangkit mangyan maalen, kamay sa kanyo galem aleleng wano, kamo agpakagwali waget.
[29] Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Kanyo piyagpakapya in mga lebengan in mga poropita osai piyagpakaalen in mga lebengan in mga maalen pag mga mangyan.
[30] Osai kamo keyen, No nges kami agkaboway tangona in kabetek in kanyam mga kakoyayan, na kami idbatay agtolong agbono sa mga poropita.
[31] Na sa kanyo piyagsabi kataw ina na kanyo piyagamin kamo bodang in mga agpamono sa mga poropita.
[32] Dali, lobosen wa kamo in piyarakay in kanyo mga kakoyayan.
[33] Kamo mga olay, talnakiyan dopong. Idapo batay padalan kamo batay mipalpas sa parosa toyongan.
[34] Na ngani, ako batay agsogo sa kanyo mga poropita, mga katawanan, mga agpatoldo in mga Batas. Na in kalaati kanyo batay biyono, in kalaati batay piyako sa kodos. In kalaati kanyo batay biyogbog sa kanyo mga balay Diyos, kanyo batay piyagboyaw sa aronaw bayan.
[35] Matang batay sa kanyo in parosa sa agbono sa boo mga mangyan maalen sa boo kobat sigod Abil in idapo daet anggan kay Sakaryas bodang Barakyas. Siyo in kanyo biyono sa paywaraan in pagsonogan andog osai in balay lakoy Diyos.
[36] Kangay piyagsabi sa kanyo in mga mangyan agkaboway ngona in batay piyarosa panawen ina pag boo mga agbono.
[37] Isos keyen kay, Irosalim, laki mga taga Irosalim. Kanyo piyagbono in mga poropita. In mga siyogo Diyos kanyo biyenglayan bato anggan matay. Makakarowan wano nges kangay beet kamo yaalapet kataw in manok aglemlem sa kansiyo mga sipsipan, kamay kamo dayo.
[38] Na in kanyo balay lakoy Diyos batay piyagbaliwan wa gayed.
[39] Kangay piyagsabi sa kanyo, sigod ngona idbatay wa kanyo ngiitan ako anggan sa kanyo remrem keyen, Agkaanggay in agrateng agbaba in kabaloyan in Kapwan.