[1] Ina pag betek in mga agadar pasabangen kay Isos. Siro keyen, Sa mga bodang Diyos nakay in kansiyo piyagpakalakoy?
[2] Biyerya Isos osai ka bodang, piyataydek sa kansiro kagwaraan,
[3] keyen, Kangay piyagsabi sa kanyo, No kamo yewed agiyalis, yewed kataw in mga bodang na kamo yewed ngani mibaloy mga bodang Diyos.
[4] No siyo in agpakalakoyte kataw anda pag bodang, na siyo in lakonaw sa sakopan Diyos.
[5] No siyo in agkaanggay sa osai ka bodang kataw tai, panawen sa kangay, na ako in piyagkaanggayan.
[6] Keyen kay Isos, Kamayba nakay in agpamaakay sa daet sa bodangte agpasandig sa kangay, na in maal kay sa kansiyo in eketanen lakoy bato kansiyo leey, kalbas siyo leggeben sa dagat.
[7] Maidap wano sa kobat panawen sa mga makadaet. Kamayba nangkadogay idbatay maidapo in mga makadaet, kamay makalimo in batay mibaloy sa agpamaakay sa daet.
[8] No kaimo bakwaw in agakay sa kaimo matang kao agpangwat daet, kamayba bitis, na dodowen wa, benglayen wa. Maal kao pataboy sa boway idapo kalobosan osai waget in bakwaw no bitis, sa biyenglay sa baya idapo kalobosan dowai ka bakwaw no bitis.
[9] No kaimo mata in agakay sa kaimo matang kao agpangwat daet na kasloten wa, benglayen wa. Maal kay in kao pataboy sa boway idapo kalobosan osai waget in mata sa dowai ka mata biyenglay sa baya idapo kalobosan.
[10] Kamo agingat, ayaw agrengrengen kamayba nakay pag bodangte. Ayaw agkalibangaw in kansiro mga angil baatte agpangkit sa kangay Amang sa langit.
[12] Nakay in kanyo remrem? No in osai ka mangyan apo osai ka daan ka topa, no in osai malibangaw, na kansiyo batay biyaliwan in siyamnapot siyam sa boksor, matang siyo mamangkit wakay in malibangaw, aon?
[13] Paka kansiyo ngiitan ina, kangay piyagsabi, ina pag osai kansiyo batay kiyaanggayan labi kay sa siyamnapot siyam in idbatang malibangaw.
[14] Na kataw din ina in beet kantam Amang sa langit ayaw maidapo kamayba osai ka bodangte kataw tai.
[15] Isos keyen, No kaimo belag agpangwat daet sa kaimo na kao pataboy sa kansiyo paalamen in kansiyo piyangwat daet. Ayaw agpaparengeyen sa amat. No siyo mamarengey sa kaimo na siyo kaimo wakay belag.
[16] Kamay no siyo dayo mamarengey, na kaimo paanggaten in osai, no yewed dowai ka mangyan, matang in kanyo piyanggisodan kansiro din piyarengey, kalbas piyatonayan dowai no yewed tolo.
[17] No siyo dayo kay mamarengey sa kansiro na kaimo sabiyen sa barkadaan mga bodang Diyos. Kalbas no dayo kay din mamarengey asin, na siyo kaimo wa paagemen sa mga yewed agpaniwala, kataw in mga agpaningil bowis.
[18] Keyen Isos, Kangay piyagsabi sa kanyo kamayba nakay in kanyo piyagayaw sa kobat, na ina batay din piyagayaw sa langit. Osai kamayba nakay in kanyo piyayagan sa kobat, na ina batay din piyayagan sa langit.
[19] Kangay kay din piyagsabi sa kanyo, no in dowai sa kanyo malsiyayon atai sa kobat no nakay in batay piyagayay sa pandalangin, na ina batay tiyaboy sa kanyo in kangay Amang sa langit.
[20] Kamayba saano agtipon in dowai, tolo sa kangay ngaran, na ako asin daan sa kansiro kagwaraan.
[21] Pidro pasabangen kay Isos, keyen, Laki Kapwan, No isagte isagte agpangwat daet sa kangay in kangay belag, na makanangkaro kangay libangawen in kansiyo daet? Makapito lames?
[22] Keyen Isos, Ayaw waget makapito, no yewed makapitompo ka pito.
[23] Angkataw in Diyos agpapoon kataw tai. In osai ka poon lakoy batay wa mandegdeg in mga otang in kansiyo mga sogowan.
[24] In tokaw kansiyo biyerya in apo otang laksa laksa ka piso.
[25] Panawen siyo idapo pambayad, siyogo in kansiyo kapwan keyen, Pabiliyen wa siyo, kadayo in kansiyo babai, anggan in kansiro mga bodang, osai din in boo kansiro kasangkapan, matang kabayad.
[26] In sogowan agpaselang wa gayed sa kansiyo kapwan, agdaing wano keyen, Ako agayay kayte rogar, laki, kangay piyagbayadan in boo kangay otang.
[27] Kalbas kansiyo kapwan apakayawtean. Piyaidapo wa in kansiyo otang, piyaoli wa in sogowan.
[28] Kamay paka panaw wa in sogowan, kansiyo ngiitan kansiyo kapwa sogowan apo otang sa kansiyo 100 ka piso. Ina kansiyo siyonggaban, siyakal, keyen, Agbayad wa kao in kaimo otang.
[29] Kalbas ina agpaselang wa gayed sa kansiyo agdaing wano keyen, Ayaw kay, laki, ako idapo kay bayad, kamay ako agbayad daan dogayan.
[30] Kamay siyo dayo maniwala. Kansiyo biilanggo in kansiyo sarig sogowan, anggan siyo yewed kay agbayad.
[31] Paka ina ngiitan in kalaati mga sogowan, siro maloba agremrem. Siro pataboy sa kansiro kapwan, giisod in boo piyangwat.
[32] Kalbas in tokawan pag sogowan biyerya wakay in kapwan, keyen, Kao in aleleng wano pag sogowan. Panawen kao agdaing sa kangay, liibangaw wa in boo kaimo otang.
[33] Ako agpakayawte sa kaimo na kailangan din kao agpakayawte sa kaimo kapwa.
[34] Kalbas abaisan in poon, siyo piyabilanggo wa anggan siyo yewed agbayad.
[35] Na no yewed boo remrem kanyo piyaglibangaw in daet kanyo belag, na kataw daan ina in batay piyangwat sa kanyo in kangay Amang sa langit.