[1] Apo mga Parisiyo osai mga agpatoldo in mga Batas Diyos batang sa Irosalim pasabangen kay Isos,
[2] agsabi keyen, Nakay batang biyaliwan in kaimo mga agadar in ogali kantam mga kakoyayan? Siro agpamangan in kansiro bakwaw yewed piyagogas kataw in kantam ogali.
[3] Isos keyen, Nakay batang kanyo din piyagbaliwan in Batas Diyos panawen sa mga ogali kanyo mga kakoyayan?
[4] Siyabi in Diyos keyen, Pagmaalen in kaimo mga koyay. Osai keyen, In agiplaong daet sa kansiyo koyay, na kailangan siyo bonowen.
[5] Kamay kanyo piyagpatoldo keyen, No siyabi osai ka mangyan sa kansiyo mga koyay keyen, In kangay nges tolong sa kanyo tiyaboy wa sa Diyos,
[6] na idwa kailangan agalapet sa koyay. Na panawen sa ogali kanyo mga kakoyayan kanyo wa piyagidapo kabolowan in agiplaong Diyos.
[7] Kamo mga agpakagwali waget agpamwala. Betek in kay Isaiyas siyabi batang sa Diyos panawen sa kanyo keyen,
[8] Anda pag mga mangyan, in kansiro piyagsabi agmaal sa kangay, kamay in kansiro remrem adayonaw sa kangay.
[9] Idapo kabolowan in siro agsamba sa kangay. In kansiro piyagpatoldo sogo waget mangyan.
[10] Biyerya Isos in mga mangyan, kalbas kansiyo siyabi keyen, Kanyo parengeyen, remremen anda in kangay batay piyagsabi.
[11] In agisoroy sa bibi idapo makarames sa mangyan sa pangkit Diyos. Dayem in aglowas sa bibi, ina in makarames.
[12] Pasabangen kay Isos in mga agadar keyen, Kaimo lames atawanan in mga Parisiyo agremrem wa in kaimo siyabi?
[13] Siyo keyen, Batay giyabot in baatte togda no yewed kangay Amang sa langit in agtogda.
[14] Bayansiyo siro. Siro agakay nges bago siro beleg. No beleg in agakay sa beleg, na siro tanan batay malabo sa balao.
[15] Siyabi Pidro keyen, Sabiyen sa kanyam in beet siyabi in alimbawa.
[16] Keyen Isos, Kamo din lames idapo atawanan?
[17] Kamo lames yewed katawan in misoroy sa bibi rateng sa boyon, kadogay lampas wakay?
[18] Dayem in batang sa bibi, ina batang sa remrem. Ina in makarames sa mangyan sa pangkit Diyos.
[19] Nangkataw sa bait batang in daet pag remrem, in agbono mangyan, in agpanggaraw, in marames pag ogali, in agpanakaw, in agpatotoo yewed betek, in agbintang.
[20] In mga ina in agparames sa mangyan sa pangkit Diyos. Kamay in agkoman yewed agogas bakwaw, ina yewed agparames sa mangyan sa pangkit Diyos.
[21] Isos panaw wa ista pataboy sa kobat bangen sa bayan Tiro osai bayan Sidon.
[22] Pasabangen sa kansiyo osai ka kagbaiyan taga Kanaan ista agoli. Malakas in miplaong keyen, Laki Kasokponan Dabid, kao agpakayawte kangay. In kangay bodang kagbaiyan maloba wa piyagpaidapan mamaw.
[23] Isos idwa somagot. In mga agadar pasabangen sa kansiyo keyen, Taboyen wa in kansiyo piyagayay, matang idapo wa ina pag agpangopango sa kantam paori.
[24] Isos keyen, Ako siyogo sa mga waget kasokponan Israil. Siro kagwali mga topa malibangaw.
[25] Kalbas pasabangen wakay in kagbaiyan, agpaselang sa kansiyo keyen, Kapwan, ako tolongen.
[26] Keyen Isos, Yewed maal kiyowa in pamangnen sa mga bodang kalbas tiyaboy sa mga tito.
[27] Keyen in kagbaiyan, Aon ngani, Kapwan, kamay in mga tito agpamangan in mga lopisan malabo sa kansiro kapwan.
[28] Siyabi Isos sa kagbaiyan keyen, Kao ngani agpasandig sa Diyos. Agibaloy in kaimo piyagayay. Ina daan maoraw wa kansiyo bodang.
[29] Isos panaw asin pataboy wakay sa balabaan dagat Galiliya. Siyo monaker sa boksorte, tomokkaw.
[30] Malpanrateng in karowan wano mangyan apo piyagbaba mga pilay, mga bakwil, mga beleg, mga yewed katawan miplaong, aronaw kay roma. In boo mga apo maskit piyabolalang sa bangen Isos, siro piyaoraw.
[31] In mga mangyan agsoyo paka ngiitan kaiplaong wakay in mga yewed katawan miplaong, maal wakay in mga bakwil, kapanaw wakay in mga pilay, kangitan wakay in mga beleg. Kalbas siro agmaal sa Diyos in piyagmaal Israil.
[32] Biyerya Isos in kansiyo mga agadar keyen, Ako agpakayawte atai pag mga mangyan. Tolo wa ka ibeng siro agyanggat sa kangay, idapo wa pamangnen. Yewed maal siro kangay piyapanaw no yewed kay kakoman, karam siro malibed sa dalan.
[33] Keyen in mga agadar, Idapo atai balay. Na saano batay kitam mangayay pamangnen sibay sa karo ina mangyan?
[34] Keyen Isos, Angkalakoy in kanyo pamangnen? Siro keyen, Pito ka tinapay, apo dinte isda.
[35] In karowan mangyan piyatokkaw Isos sa diya.
[36] Kansiyo kiyowa in pito ka tinapay osai in mga isda. Kalbas agpasalamat sa Diyos. Piyanlotok wa in tinapay, tiyaboy sa mga agadar. Kansiro wakay biyagi sa mga mangyan.
[37] Malpamangan in boo, mangabosog. Tiipon in tera mga dodo tinapay, pito ka galang lakoy makno.
[38] Opat ka libo ka lalaki in mamangan. Apo din mga kagbaiyan, apo din mga bodang.
[39] In mga mangyan piyapanaw wa Isos. Siyo somakay wa sa bangka, pataboy sa kobat Magadan.