[1] Kay Isos tiipon in Labing Dowai ka kansiyo agadar, kansiyo piyakan kabaloyan agboyaw sa daeten pag mga mamaw, osai agpaoraw sa kamaybawa nakay pag maskit.
[2] Anda in mga ngaran in kansiyo labing dowai ka katiwala. In osai Simon piyagawit din Pidro, in kadowai Anris kay Pidro belag, in katolo osai in kaopat siro tayari din Santiyago osai Owan in kay Sibidiyo mga bodang,
[3] in kalima Pilipi, in kaenem Bartolomi, in kapito Tomas, in kawalo Matiyo in agpaningil bowis, in kasiyam Santiyago kay Alpiyo bodang, in kasampo Tadyo,
[4] in kalabing osai Simon in ribildi, in kalabing dowai Odas Iskaryoti in agpadakep kay Isos.
[5] Ina pag Labing Dowai siyogo Isos. Keyen in kansiyo bilin, Kamo ayaw agtaboy sa kobat in mga yewed Odyo, osai kamayba sa nakay pag bayan sa kobat Samariya.
[6] Dayem in kanyo pagtaboyan in mga kasokponan Israil. Siro kagwali mga topa malibangaw.
[7] In kamo agipanaw in kanyo patoldowen keyen, In Diyos bangen wa agpapoon.
[8] Kanyo paorawen in mga maskit, pabowayen wa in mga matay, osai boyawen in mga mamaw. Kamo piyakan idapo bayad, na kamo agpakan wakay sa roma idapo din bayad.
[9] Kamo ayaw agbaba mga kowarta sa kanyo sokloban, kamayba in papil, kamayba pilak kamayba tanso.
[10] In kamo agipanaw ayaw agbaba begyas, osai balokas pamalit, kamayba tapatos, osai sikkor. Angkataw in agpanawen piyagpakan in boo kansiyo pamangnen.
[11] Kamayba bayan lakoy, kamayba bayante, paka kamo rateng kanyo pamangkiten no nakay pag mangyan asin in batay agpabelag sa kanyo, kalbas kamo mamataw sa kansiyo anggan kamo baywi kay ista pag bayan.
[12] In kamo agisoroy asin pag balay na kamo mandalangin keyen, Kamo pakaanggayen in Diyos.
[13] Kalbas no ngani kamo piyabelag in mga mangyan sa balay, na agaway kay in kanyo pandalangin. Kamay no yewed na kanyo wakay kowaen in kanyo pandalangin.
[14] Kamayba sa nakay pag balay, sa nakay pag bayan, no siro dayo agpabelag, dayo agparengey sa kanyo, na kamo panaw wa asin, ragragen in bogabo sa kanyo darapa, in beet siyabi siro batay piyagparosa.
[15] Kangay piyagsabi sa kanyo keyen, Dogayan sa Ibeng Agparosa osai in mga taga asin pag bayan, osai in mga taga Sodoma, taga Gomora, in batay maloba pag parosa in sa mga taga asin agbangen.
[16] Ngona kamo kagwali mga topa kangay piyagsogo sa aronaw bangaw. Kamo agtolad sa mga olay, baatte sandata, osai sa mga bantog kalapati mabait.
[17] Kamo agingat sa mga mangyan, angkataw kamo batay piyagbaba sa mga osap, osai batay piyagpamogbog sa mga balay pagpaniponan.
[18] Panawen kamo agpaniwala sa kangay kamo batay piyagpaadap sa mga gobirnador osai sa mga poon lakoy. Na kamo batay agbarita sa kansiro kadayo sa mga yewed Odyo.
[19] No kamo batay wa piyagosap ayaw agkariyaban no nakay in batay kanyo siyabi, osai no nangkataw in agsabi. Angkataw no rateng in kabetek na kamo batay piyakan in kanyo batay siyabi.
[20] Angkataw in kanyo batay siyabi yewed batang sa kanyo waget remrem, dayem sa Abyan kantam Amang.
[21] Apo mangyan batay agtaboy kansiyo belag sa mga agpamono. Kataw din ina in batay piyagpangwat in amang sa kansiyo bodang. Apo din mga bodang batay mandaeg sa kansiro mga koyay, kansiro piyagpabono.
[22] Panawen kamo agpaniwala sa kangay kamo batay piyagkagalitan boo mangyan. Kamay in agaway kay sa kangay anggan sa kalobosan, na siyo in batay piyaboway.
[23] No kamo piyagpaidapan sa osai ka bayan, na kamo domalagan pataboy sa osai wakay. Kangay piyagsabi sa kanyo yewed kay batay kanyo diyalan in boo mga bayan sa Israil, ako in Bodang Mangyan rateng wa.
[24] In piyagpaadar idbatay lakonaw kay sa kansiyo agpatoldo. In sogowan idbatay lakonaw kay sa kansiyo kapwan.
[25] Agkaanggay in agadar no siyo kataw wa kansiyo agpatoldo, osai in sogowan no siyo kataw in kansiyo kapwan. No in koyay sa talnakiyan yaawit Bilsibol, na labi wa batay piyaglibak in kansiyo talnakiyan.
[26] Na kamo ayaw agkalimo sa mga mangyan. In ngona piyagbetang batay daan piyagngitan, in ngona piyagtago dogayan batay daan atawanan.
[27] In kangay piyagsabi sa kanyo ngona piyagtago sa roma, kanyo wakay sabiyen sa boo. In kangay ngona piyagkimkimot sa kanyo, kanyo wakay pangowen sa boo.
[28] Ayaw agkalimo sa mga agbono sa bilog, kamay siro yewed kabono sa abyan. Dayem in Diyos in apo kabaloyan agbono sa abyan kadayo sa bilog, agbenglay sa toyongan, ina wa in kanyo kalimowanen.
[29] Dowai ka maya piyagpabili osai waget ka sintimos. Kamay kamayba osai waget ka maya idbatay matay no kantam Amang yewed pomayag.
[30] Kamaybawa in kanyo mga abok, boo kansiyo biilang.
[31] Na kamo ayaw agkalimo, angkataw kamo piyagmaal ngani labi kay sa karowan pag mga maya.
[32] No siyo in agpabelag sa kangay sa pangkit mga mangyan, na siyo kangay din batay piyagpabelag sa pangkit kangay Amang sa langit.
[33] Dayem in agpamangyan sa kangay sa pangkit mga mangyan, na ako batay din agpamangyan sa kansiyo sa pangkit kangay Amang sa langit.
[34] Isos keyen kay, Ayaw kanyo agremremen keyen, Kaya ako atai pataboy matang apyaan in mga mangyan. Kaya ako atai pataboy yewed matang apyaan dayem magolo in mga mangyan.
[35] Kaya ako atai matang siro batay aglaban, In bodang kaliyakiyan agla ban sa kansiyo amang, In bodang kagbaiyan aglaban sa kansiyo inang, In manogang aglaban sa kansiyo biyanan.
[36] In batay kaaway osai ka mangyan in kansiyo daan mga kamalay.
[37] Osai in kansiyo koyay osai ako, no in mangyan agpakayawte sa koyay agbangen na siyo yewed maal sa kangay. Osai in kansiyo bodang osai ako, no in mangyan agpakayawte sa bodang agbangen na siyo yewed maal sa kangay.
[38] No siyo yewed sandata agyanggat sa kangay kamayba batay piyagbono, na siyo yewed maal sa kangay.
[39] In agaman kansiyo boway na siyo batay aidapowan. Kamay in aidapowan in kansiyo boway panawen siyo agpaniwala sa kangay, na siyo batay apo.
[40] In agpabelag sa kanyo na ina in agpabelag din sa kangay. Kalbas in agkabeet sa kangay na ina agkabeet din sa Diyos in agsogo sa kangay.
[41] In agpabelag sa osai ka poropita panawen siyo poropita, na in agpabelag batay piyagpakan in bayad kalakoy wa daan in piyagtaboy sa poropita. In agpabelag sa maalno pag mangyan panawen siyo maalno, na in agpabelag batay piyagpakan kalakoy wa daan in piyagtaboy sa maalno.
[42] No siyo in agpakan kamayba osaite ka baso sapa sa kalakoyte pag kangay agadar panawen siyo kangay agadar, na kangay piyagsabi sa kanyo in agpakan batay wa daan piyagpakan kaanggayanan.