[1] Paka Isos mongali wa batang sa bolod, siyo yaanggatan karowan wano pag mangyan,
[2] Kalbas pasabangen osai ka mangyan kagwali piyagpanyakit, siyo agpaselang domaing kay Isos keyen, Laki no kao beet agpaoraw sa kangay maskit, na kao kabaloy.
[3] Siyo yaatang Isos keyen, Ako beet ngani, maal wakay ngona kao. Toloy idapo wakay ngani in kagwali panyakit.
[4] Isos keyen, Ina ayaw kaimo agsabiyen kamayba kay nakay pag mangyan. No yewed kao ista wa papangkit sa sasirdoti matang siyo keyen, Kao maal wakay. Kalbas kaimo wa taboyen sa Diyos in siyabi sa Batas Mowisis, na batay atawanan in mga mangyan keyen in kaimo maskit maoraw wa.
[5] Paka Isos rateng sa Kapirnaom, osai ka kapitan sa mga sondalo taga Roma pasabangen sa kansiyo, agdaing
[6] keyen, Laki, in kangay sogowan maloba wano in agkaidapan, yewed kapaglebey, siyo agibolalang daan sa balay.
[7] Keyen Isos, Ako batay ista, siyo kangay piyagpaoraw.
[8] Kamay siyabi in kapitan keyen, Laki, ako kalakoyte, yewed sibay matang kao monaik sa kangay balay. Kao miplaong waget, na batay maoraw in maskit kangay sogowan.
[9] Angkataw ako sakop sa mga mabwat pag poon, osai ako apo din mga sondalo sakop sa kangay. No kangay siyabi sa osai keyen, Kao ista wa, na toloy wa siyo ista. No kangay wakay siyabi sa osai keyen, Aywawa, na toloy wa siyo agpasabangen. No ako keyen sa kangay sogowan, Ina pangwaten, na toloy wa kansiyo piyagpangwat.
[10] Paka Isos karengey ina siyo agsoyo. Kansiyo siyabi sa mga agyanggat sa kansiyo keyen, Kangay piyagsabi sa kanyo, kamayba atai sa mga taga Israil, ako idbatang kangitan kaloba ina in agpasandig sa Diyos.
[11] Ayaw agkanawey, aronaw in taga paglowasan ibeng, osai taga paglabowan ibeng batay malpamangan osai Abraam, Isaak, kadayo Akob sa sakopan Diyos.
[12] Kamay aronaw sa mga kasokponan Israil maal nges piyasoroy sa sakopan, kamay siro batay biyenglay sa lened ista wa sa adayonaw. Ista siro batay agpanangis lakoy anggan agpaldeet wa in ngipen.
[13] Kalbas siyabi Isos sa kapitan keyen, Kao moli wa. Kataw kao agpasandig sa Diyos, na batay mibaloy in kaimo piyagayay. Ina daan pag betek maal wakay in kansiyo sogowan.
[14] Isos pataboy sa kay Pidro balay. Kansiyo ngiitan ista in kay Pidro babai inang agpalibay, apo maskit, maibeng in bilog.
[15] Yaatang Isos in kansiyo bakwaw, kalbas toloy maoraw in maskit. In inang miyorog, toloy wakay agalapet kay Isos.
[16] Ina daan pag bayapon aronaw mga piyaglowasan mamaw in biyaba kay Isos. Siyo miplaong waget, domalagan wa in mga mamaw. Piyaoraw wa din in boo apo maskit.
[17] Kataw ina mibaloy in siyabi Isaiyas in poropita keyen, Kansiyo kiyowa in kantam mga maskit. Kansiyo biyaba in kantam mga momoy.
[18] Paka ngiitan Isos in karowan pag mga mangyan sa bangen, siyo agsogo sa kansiyo mga agadar keyen, Kitam wa motol sa ripay dagatte.
[19] Pasabangen osai ka agpatoldo in mga Batas, keyen, Laki Agpamatoldo, ako batay miyanggat sa kaimo kamaybawa kao sa nakay pataboy.
[20] Keyen Isos, In mga alamid apo pagoliyan sa leyang, in mga bantog apo din pogadan, kamay ako in Bodang Mangyan idapo pagpangesekan.
[21] In osai sa kansiyo mga agadar agsabi keyen, Laki Kapwan, maal lames ako moli kay ngonate anggan kangay wa malebeng in kangay amang?
[22] Kamay keyen Isos, Kao miyanggat wa sa kangay. Bayansiyo in mga matay in aglebeng in kansiro mga matay.
[23] Isos somakay sa bangka, osai in kansiyo mga agadar.
[24] Isos agesek. Toloy apo bagyo, in bangka agkabangen tiyabonan sapa.
[25] In mga agadar pataboy kay Isos, siyo piyolaw keyen, Laki Kapwan, kami tolongen. Kitam agkaleggeb wa.
[26] Keyen Isos, Nakay batang kamo agkalimo? Nakay ina, kamo yewed agpasandig sa Diyos? Kalbas siyo miyorog, in kowaya kansiyo siyabiyan osai in dagat, kalbas apyaan wakay in boo.
[27] Siro agsoyo wano keyen, Nakay lames pag mangyan ina? Kamaybawa kowaya, kamaybawa dagat agpaniwala sa kansiyo.
[28] Paka Isos rateng sa ripay dagatte, sa kobat Gadara, siyo tiyagbo dowai ka mangyan batang sa lebengan. Siro piyaglowasan mga mamaw, matapang wano, anggan idapo kapangaas domalan asin pag kobat.
[29] Siro toloy mango keyen, Bodang Diyos, nakay in kaimo panawen sa kanyam? Kao lames atai pataboy matang kami kaimo piyakaskitan sa yewed kay kabetek?
[30] Sa yewed adayonaw ista, karowan wano pag beyek agpaypanlongkod.
[31] In mga mamaw agdaing kay Isos keyen, No kami kaimo piyagboyaw, na kami pasoroyen ista sa karowan pag beyek.
[32] Keyen Isos, Dali wa, panaw wa kamo. Kalbas siro panaw wa, misoroy wa sa mga beyek. In mga beyek toloy wa domalagan sa lintoy, mangalabo sa dagatte, siro mangaleggeb wa.
[33] In mga agalapet beyek toloy wa domalagan pataboy sa bayan. Ista kansiro biyarita in boo mipangwat, kadayo in mibaloy sa mga piyaglowasan mamaw.
[34] Kadogay in boo mangyan asin pag bayan ista pataboy kay Isos. Paka kansiro ngiitan siro agdaing sa kansiyo keyen, Kao panaw wa, ayaw atai sa kanyam kobat.