[1] Isos agpangwat wakay mga alimbawa.
[2] Siyo keyen, In Diyos agpapoon kataw in osai ka poon lakoy agsandata batay malpamangan sa kasal kansiyo bodang kaliyakiyan.
[3] Siyogo in kansiyo mga sogowan agberya sa mga mangyan piyagpanaya, kamay siro agkabibel.
[4] Kalbas siyo agsogo wakay sa amat wakay pag mga sogowan keyen, Sabiyen sandata wa in pamangnen, biyono wa in mga piyataba baka. In pamangnen madimla wa. Ayaw wa agpabeya.
[5] Kamay siyo yewed daan piyagpaniwala in mga piyagpanaya. Siro panaw sa kansiro beet pagtaboyan, in osai sa kansiyo agay, in osai sa kansiyo anap boway.
[6] In kalaati wakay, kansiro siyonggaban in mga sogowan, biyogbog, biyono wa.
[7] In poon lakoy agkagalit wano. Siyogo wa in kansiyo mga sondalo, riipor wa ina pag mga agpamono, piyasonog in kansiro bayan lakoy.
[8] Siyabi in poon lakoy sa kansiyo mga sogowan keyen, Sandata wa in pamangnen, kamay in mga piyagpanaya yewed sibay in kaalenen.
[9] Na kamo ati wa sa mga dalan, no kamo kangitan mangyan na keyen, Kitam wa sa kasalan.
[10] Panaw wa in mga sogowan, gomisod sa aronaw mangyan pag dalan, in atagbo mangyan piyaanggat wa kamayba daeten pag mangyan, kamayba maal, anggan maakno wa, boo wa mangyan in tongkodan balay.
[11] In poon lakoy asin pataboy piyanroris in mga mangyan, kansiyo ngiitan osai ka mangyan in lambong yewed pangkasal.
[12] Siyo keyen, Laki, nakay batang kao kaisoroy atai pataboy idapo lambong pangkasal? Idwa meles in mangyan.
[13] Siyabi in poon lakoy sa kansiyo mga sogowan keyen, Bakosen kansiyo mga bakwaw, kansiyo bitis, benglayen wa istanaw sa lened, sa mga agpanangis, agtogait in ngipen.
[14] Isos aglobos kansiyo alimbawa keyen, Aronaw in piyagberya, kalbas korangte in piyagidang.
[15] Panaw wa asin in mga Parisiyo. Kansiro piyagpaypolongan matang Isos asalaod sa kansiyo mga agiplaong.
[16] Matang piyataboy kay Isos in kansiro mga agadar, agyanggat in mga mangyan Irodis. Siro keyen, Laki Agpamatoldo, kanyam atawanan kao betek, totoo in kaimo mga piyagpatoldo ogali makaanggay sa Diyos. Osai kao yewed agkalimo sa mga mangyan angkataw kao yewed agpangidang mangyan.
[17] Nakay in maal sa mga Batas, no agbayad bowis sa poon lakoy Sisar, no ayaw wa? Nakay in kaimo remrem?
[18] Kamay atawanan Isos in kansiro mga daet pag remrem matang siyo keyen, Kamo mga agpakagwali waget. Nakay batang ako kanyo piyagsalaod?
[19] Amba, ako papangkiten in kowarta pambowis. Kalbas siyo piyakan osai ka kowarta bakal.
[20] Isos keyen, In rarawan atai, nakay pag mangyante? Kay nakay ngaran in agisolat atai?
[21] Siro keyen, Kay Sisar. Kalbas keyen Isos, No kataw ina na taboyen kay Sisar in sa kansiyo, osai sa Diyos in sa Diyos.
[22] In siro karengey ina siro agsoyo. Siro panaw. Isos biyaliwan wa.
[23] Ina daan pag ibeng apo mga Sadosiyo pataboy kay Isos. Siro yewed agpaniwala keyen apo boway wakay. Kansiro siyabi sa kansiyo
[24] keyen, Laki Agpamatoldo, siyabi Mowisis keyen no in osai ka lalaki matay idapo bodang, na kailangan in kansiyo belag miskapet wakay sa babai matang siro mamodang. No apo bodang na in kapwan in matay daan.
[25] Atai sa kanyam tangona apo pito ka kaliyakiyan. in panganay taybalang wa, toloy matay idapo kay bodang. Matang kansiyo babai biyaliwan wa sa kansiyo ariyan.
[26] Kataw din ina in mibaloy sa waraan, kadayo sa katolo, anggan rateng sa bongsowan.
[27] Matay wa siro boo, bayo matay wakay din in kagbaiyan.
[28] Na, no in mga matay boway wakay, na nakay in batay piyagawit lalaki angkataw kansiyo liyalaki siro boo?
[29] Keyen Isos, Kamo bagya, yewed kanyo piyangkit in mga Agisolat, osai in kabaloyan Diyos.
[30] Angkataw sa dogayan pag boway idapo taybalang. Boo wa daan kataw in mga angil sa langit.
[31] Panawen sa dogayan pag boway, yewed kay mana kanyo biyasa sa mga Agisolat in siyabi Diyos sa kanyo
[32] keyen, Ako in Diyos in piyagmaal Abraam, piyagmaal Isaak, piyagmaal Akob. In Diyos piyagmaal yewed in mga matay no yewed in mga boway.
[33] In karowan mangyan karengey ina siro agsoyo kay Isos piyatoldo.
[34] Paka abaritaan in mga Parisiyo keyen in mga Sadosiyo diyaeg wa Isos, siro maypolongan wa.
[35] In osai agpatoldo in mga Batas. Siyo agtanong agtepeng kay Isos keyen,
[36] Laki Agpamatoldo, sa boo mga Batas nakay in lakonaw?
[37] Keyen Isos, Kantam pagmaalen in Diyos kantam Kapwan, in boo kantam galem, boo eyat, boo remrem.
[38] Ina in lakonaw sa boo mga Batas.
[39] In kadowai kataw daan ina keyen, Kantam pakayawteen in amat mangyan kataw daan in agpakayawte sa kantam sadiri.
[40] In boo mga Batas osai in piyagpatoldo in mga poropita ina boo agisagalem asin pag dowai ka Batas.
[41] In agkatipon in mga Parisiyo Isos agtanong sa kansiro,
[42] keyen, In Kiristo, nakay in kanyo remrem? Siyo lames kay nakay kasokponan? Siro keyen, Kay Dabid.
[43] Keyen Isos, Na nakay batang Dabid, in siyo piyagpatoldo in Abyan Diyos siyo agawit sa Kiristo keyen Kapwan? Angkataw in siyabi Dabid keyen,
[44] Siyabi in Kapwan sa kangay Kapwan keyen, Kao tomokkaw atai sa kangay pamalang agbangen, Kao kangay bisi anggan in mga aglaban sa kaimo boo wa kangay piyasakop sa kaimo.
[45] Na no in Kiristo piyagawit din Dabid keyen Kapwan, na nangkataw masabi keyen siyo kasokponan Dabid?
[46] In mga Parisiyo idapo wano kabeles kay Isos. Ibat asin idapo kapangaas agtanong sa kansiyo.