[1] Tangona in betek Irodis in poon lakoy, Isos biyoslot sa bayan Bitliim sa kobat Odiya. Kalbas apo rateng sa bayan lakoy Irosalim mga mangyan Apo Katawanan sa mga magirem. Siro batang ista agbangen sa paglowasan ibeng.
[2] Baatte siro agtanong keyen, Sa nakay in bodangte bayo biyoslot batay poon lakoy sa mga Odyo? Kanyam ngiitan sa paglowasan ibeng in magirem lakoy tanda siyo miboslot wa. Kaya kami atai pataboy, matang agmaal sa kansiyo.
[3] Paka Irodis in poon lakoy karengey ina, toloy wa malingetnget in kansiyo remrem, kadayo in sa boo taga Irosalim.
[4] Kansiyo tiipon in boo mga sasirdoti osai in mga agpatoldo in mga Batas Diyos. Siro kansiyo tiyanong keyen, Sa nakay batay biyoslot in Kiristo?
[5] Siro keyen, Sa bayan Bitliim sa kobat Odiya, angkataw in solat in poropita keyen,
[6] Laki mga taga Bitliim, sa mga bayan lakoy sa Odiya kanyo bayan kalakoy daan din in amat, angkataw asina batay lomwas in osai ka poon lakoy. Siyo batay agalapet sa kangay mga mangyan mga bodang Israil.
[7] Kalbas piyaberya wakay Irodis ina pag mga Apo Katawanan, kamay piyagtago. Kansiyo tiyanong no nangkadogay wa lomwas in magirem lakoy.
[8] Kalbas siro kansiyo piyabilinan keyen, Dali wa, kamo panaw wa. Kanyo pamangkiten gayedte in bodangte. Paka ngiitan wa, kanyo paalamen sa kangay, matang ako din ista kapataboy, agmaal din sa kansiyo. Siro kansiyo wa piyapanaw, piyataboy sa Bitliim.
[9] -
[10] Paka siro karengey wa in bilin in poon lakoy, in mga Apo Katawanan panaw wa. Kalbas in magirem lakoy kansiro ngiitan sa paglowasan ibeng, kansiro wakay ngiitan. Siro agkaanggay wano gayedte. Ina agpanokaw sa kansiro anggan rateng sa pagbalayan in bodangte. Asin wa betek omempet. Paka siro kangitan in magirem lakoy omempet wa,
[11] siro misoroy wa sa balay, kansiro ngiitan in bodangte sa bangen Mariya in kansiyo inang. Siro patalegeb, agmaal sa kansiyo. Kalbas kansiro wa biyoswang in mga palnowan, kansiro tiyaboy sa kansiyo ginto, osai pamada, osai gamot piyagawit mira.
[12] Paka kalbas siro manaynep, piyagayaw wa Diyos domalan kay Irodis, matang siro manlili wa, moli wa sa kansiro kobat.
[13] Paka panaw wa in mga Apo Katawanan, Osi manaynep. Apo angil batang sa Kapwan papangkit sa kansiyo keyen, Miyorog wa, in talinay babaen wa sa Iipto. Kalbas kamo ayaw kay agipanaw ista anggan ako yewed keyen wakay. Angkataw in bodangte batay piyagpamangkit Irodis matang bonowen.
[14] Kalbas miyorog wa Osi, biyaba wa in talinayte. Ina daan pag yabi siro panaw wa pataboy sa Iipto.
[15] Siro ista wa agbalay anggan Irodis matay wa. Kaya kataw ina matang mibaloy wa in siyabi in poropita keyen, Kangay biyerya in kangay bodang batang sa Iipto.
[16] Paka Irodis katawan wa keyen siyo miyesa waget in mga Apo Katawanan, siyo agkagalit wa gayed, kalbas in boo mga bodangte kaliyakiyan sa Bitliim kansiyo wa piyabono, anggan sa mga balabaan kay, in boo bodang anggan dowai wa ka dagon biyono. Kaya kataw ina panawen sa siyabi in mga Apo Katawanan keyen kadogay ina lomwas in magirem.
[17] Matang ina pag betek mibaloy wa in siyabi Irimiyas in poropita keyen,
[18] Apo arengeyan sa Rama agpalpanangis, agpalpanggoong lakoy. Piyagpanangisan Rakir in kansiyo mga bodang. Siyo idbatay maayat, angkataw siro matay wa boo.
[19] Paka matay wa Irodis, Osi manaynep wakay sa Iipto, apo papangkit sa kansiyo osai ka angil batang sa Kapwan.
[20] Keyen in angil, Kao miyorog wa, in talinay paoliyen wakay sa kobat Israil, kataw matay wa in mga agkabono sa bodangte.
[21] Kalbas siyo miyorog wa. Kansiyo wakay biyaba in talinay sa kobat Israil.
[22] Kamay paka kansiyo wakay abaritaan keyen, In kay Irodis wakay bodang Arkilaw in agpoon lakoy sa Odiya, Osi agkalimo pataboy asin. In Diyos apo wakay siyabi sa kansiyo sa taynep, matang siro pataboy wa sa kobat Galiliya.
[23] Siro ista wa agpamataw sa bayante Nasarit. Matang mibaloy wa in siyabi in mga poropita panawen in bodang keyen, Siyo batay piyagawit Nasarino.