[1] Paka siyabi Isos ina pag boo siyo panaw wa sa Galiliya, pataboy sa kobat Odiya sa ripay Ordan.
[2] Siyo yaagak in karowan ka mangyan. Ista siro kansiyo piyaoraw.
[3] Apo mga Parisiyo pasabangen sa kansiyo, siyo kansiro nges piyagsandaw. Siro keyen, Maal lames sa mga Batas in lalaki agbenglay kansiyo babai kamayba nakay in dailan?
[4] Keyen Isos, Kanyo ngani piyagbasa sa mga Agisolat in keyen sa parakayan siro piyangwat Diyos kaliyakiyan osai kagbaiyan?
[5] Kalbas siyabi keyen, Ina in dailan kaya in kaliyakiyan batay pasoway wa sa mga koyay, maysarig wa in taybalang. Siro mibaloy osai waget.
[6] Na siro idwa dowai, no yewed osai waget. Na in piyaysarig in Diyos ayaw agpalsowayen in mangyan.
[7] Manggisodan kay sa kansiyo in mga Parisiyo keyen, Na nakay batang siyogo Mowisis keyen, In babai pakanen solat pagrigenan sa palsowayan, bayo biyenglay?
[8] Keyen Isos, Panawen sa marigen in kanyo remrem kaya Mowisis keyen, Kalobante kamo agbenglay sa kanyo mga babai. Kamay sa parakayan yewed kataw ina.
[9] Na kangay piyagsabi sa kanyo no siyo in agbenglay sa kansiyo babai kamay idbatang manggaraw in babai, kalbas mamangkit wakay sa osai ka kagbaiyan, na in kaliyakiyan wa daan in manggaraw. Kadayo in mamangkit sa kagbaiyan biyenglay, na ina agpanggaraw din.
[10] Kalbas keyen in mga agadar, No kataw ina in taybalang, na in maal kay ayaw wa mamangkit.
[11] Keyen Isos, Yewed boo kabaloy maniwala asin pag piyagpatoldo, ina waget in mga piyakan Diyos ina pag kabaloyan.
[12] Angkataw aronaw dailan kaya in amat kaliyakiyan yewed kapamangkit babai. In kalaati bating wa daan in siro biyodang, apo din mga biyating mangyan, kalbas apo din yewed mamangkit babai matang agpanawen sa panawen Diyos. No siyo in kabaloy maniwala asin pag piyagpatoldo na dali wa.
[13] Apo agbaba mga bodang kay Isos, matang kansiyo ramrosen osai pandalanginen. Kamay in mga agbaba siyabiyan in mga agadar.
[14] Kamay Isos keyen, Bayansiyo pasabangen atai kangay in mga bodang. Siro ayaw agayawen, angkataw sa mga kataw siro in Diyos agpapoon.
[15] Kansiyo piyanramros in mga bodang. Kalbas siyo panaw wa.
[16] Apo wakay osai ka kaliyakiyan pasabangen kay Isos keyen, Laki Agpamatoldo, nakay lames in maal kangay pangwaten matang ako apo in boway idapo kalobosan?
[17] Keyen Isos, Nakay batang ako kaimo piyagtanong no nakay in maal? Osai waget in maal. No kao beet apo in boway na kao maniwala sa mga Batas.
[18] Siyo keyen, Mga nakay? Keyen Isos, Ayaw agbono mangyan, ayaw agpanggaraw, ayaw agpanakaw, ayaw agsabi baribid,
[19] pagmaalen in kaimo mga koyay, osai pagmaalen in roma mangyan kataw daan kao.
[20] Keyen in begle, Ina pag boo kangay wa piyagpaniwala. Nakay kay in kangay pangwaten?
[21] Keyen Isos, No kao beet sibay, na kao panaw wa, pabiliyen wa in kaimo mga sangkap. In abel kowarta taboyen wa sa mga agkaidapan. Na kao batay kabel mga sangkap sa langit. Kalbas kao atai wakay miyanggat wa sa kangay.
[22] Paka karengey ina in begle, siyo panaw wa agrongkot angkataw siyo aronaw sangkap.
[23] Siyabi Isos sa kansiyo mga agadar keyen, Totoo in kangay piyagsabi, maidap mibaloy bodang Diyos in aronaw sangkap.
[24] Kangay wakay piyagolit sa kanyo, maidap komislot sa salay karayom in osai ka ayop lakoy piyagawit kamilyo, kamay labi kay maidap sa aronaw sangkap in pasakop sa Diyos.
[25] In ina arengeyan in mga agadar siro maloba wano agsoyo. Siro keyen, No kataw ina na nakay in batay apaboway?
[26] Siro tiyerekan Isos, keyen, Ina idbatay mipangwat mga mangyan, kamay sa Diyos in boote batay mipangwat.
[27] Siyabi Pidro, Baanda, kanyam wa biyaliwan in boote, miyanggat wa sa kaimo. Na nakay wakay lames in batay tiyaboy sa kanyam?
[28] Keyen Isos, Anda kanyo remremen. No dogayan sa bayo wakay pag kobat ako in Bodang Mangyan agtokkaw wa sa kangay lakoy pagpanokkawan agpapoon, na kamo in mga miyanggat sa kangay batay din agtokkaw sa mga tokkawan agpapoon sa labing dowai ka barkadaan mga kasokponan Israil.
[29] Osai no siyo agbaliwan in kansiyo balay, kansiyo mga belag, osai mga koyay, mga bodang, mga kobat panawen sa kangay, na siyo batay piyakan osai ka daan ka mga kataw in kansiyo biyaliwan. Osai batay piyakan in boway idapo kalobosan.
[30] Kamay aronaw mga tokaw batay apaoriyan, aronaw din mga paoriyan batay manokaw.