[1] Ina pag betek Owan in Agbaotismo rateng wa sa moyod sa kobat Odiya. Asina siyo agpatoldo
[2] keyen, Benglayen wa in kanyo mga daet, kataw in Diyos bangen wa agpapoon.
[3] Ina pag Owan in piyagsabi Isaiyas in poropita in siyo keyen, Apo agpango sa moyod keyen, Kanyo sandataen in batay dalan in Kapwan, pakapyaen wa kamo in kansiyo mga batay dalan.
[4] In kay Owan piyangwat damit boybol kamilyo, in sesel sa baris balat kambing. In kansiyo piyagkoman doron osai daiket.
[5] Kalbas pataboy sa kansiyo in mga taga Irosalim, anggan sa boo Odiya, kadayo din in mga agbalay sa balabaan sapa Ordan.
[6] Siro agsabi in kansiro mga daet, kalbas siro biyaotismowan wa Owan sa sapa Ordan.
[7] Kamay kansiyo ngiitan aronaw mga Parisiyo kadayo mga Sadosiyo agrateng batay agpabaotismo. Kansiyo siyabi sa kansiro keyen, Kamo kagwali mga dopong. Nakay in agpatoldo sa kanyo domalagan sa parosa Diyos agrateng?
[8] Pangwaten wa in mga maal pag ogali, matang atawanan in mga mangyan keyen biyenglay wa ngani in kanyo mga daet.
[9] Kamo ayaw mangaas agsabi keyen, Kami idbatay piyarosa Diyos angkataw kami kay Abraam mga kasokponan. Kangay piyagsabi sa kanyo batang atai pag mga bato in Diyos kabaloy agpangwat mga kasokponan Abraam.
[10] In wasay agisandata wa batay agpokan sa mga yangaw anggan sa mga dalig. Kamayba nakay pag yangaw yewed agpanggalem maal batay piyagpokan, piyagbenglay sa baya.
[11] Owan keyen kay, Panawen kamo agbenglay in kanyo mga daet kamo kangay piyagsogbo sa sapa. Dayem in agrateng sa kangay paori, siyo in batay agsogbo sa kanyo sa Betek pag Abyan osai sa baya. Siyo in apo kabaloyan labi kay kataw ako. Ako kalakoyte, yewed sibay kamayba sogowan aglowat waget kansiyo tapatos.
[12] Kansiyo wa piyagatang in kansiyo birao, kansiyo batay piyagpalsoway in mga paray, in beter batay piyagbetang, kamay in laya batay piyagtebed sa baya idapo kalobosan.
[13] Isos batang sa Galiliya pataboy kay Owan sa sapa Ordan. Isos beet biyaotismowan.
[14] Kamay Owan nges dayo. Siyo keyen, Nakay batang kao in agpasabangen sa kangay? Ako agbangen in kailangan kaimo biyaotismowan.
[15] Kamay siyabi Isos keyen, Bayansiyo mibaloy ngona ina. Ina maal kanta pangwaten, kataw ina in beet Diyos. Kalbas Owan pomayag wa.
[16] Paka Isos biyaotismowan wa siyo toloy patakdang sa sapa. Maboswang in langit, kalbas kansiyo ngiitan in Abyan Diyos aglompot kagwali bantog kalapati, omapon sa kansiyo.
[17] Apo osai ka agiplaong batang sa langit keyen, Anda in kangay piyagmaal pag Bodang, in kangay wano piyagkaanggayan.